२४ भदौ , एजेन्सी ।
अमेरिकी राष्ट्रपति जो बाइडेनले आफ्नो कार्यकालमा नयाँ रेकर्ड बनाएका छन् । तर यो रेकर्ड काम गरेर होइन बिदा धेरै लिएर बनेको हो । ८१ वर्षको बृद्ध अवस्थामा समेत राष्ट्रपतिका रुपमा अमेरिकाको नेतृत्व गरिरहेका बाइडेन उमेरकै कारण आलोचित बनिरहेका बेला उनले आफ्नो चार वर्षे कार्यकालमा ५३२ दिन बिदा लिएको सार्वजनिक भएको छ ।
न्युयोर्क पोस्टको रिपोर्टका अनुसार बाइडेनले राष्ट्रपति पद ग्रहण गरेको १३२६ दिन भइसकेको छ । बाइडेनले यी दिनको ४० प्रतिशत बिदा लिएका हुन् भने उनले ७९४ दिन मात्र काम गरेका छन् । रिपोर्टका अनुसार बाइडेनले हरेक १० दिनमा ४ दिन बिदा लिइरहेका छन् । अमेरिकामा कुनै पनि व्यक्तिले प्रत्येक वर्ष औसत ११ दिन बिदा पाउँछन् ।
यसका अनुसार बाइडेनले ४ वर्षमा जति बिदा लिएका छन्, एक साधारण अमेरिकी व्यक्तिलाई ४८ वर्ष लाग्छ । यो अमेरिकी इतिहासमा कुनै पनि राष्ट्रपतिले लिएको सबैभन्दा धेरै बिदा हो । यसअघि ट्रम्पले आफ्नो कार्यकालमा १४६१ दिनमा २६ प्रतिशत अर्थात् ३८१ दिन बिदा लिएका थिए । जबकि बराक ओबामा र रोनाल्ड रेगन आफ्नो कुल कार्यकालको ११ प्रतिशत दिन मात्र बिदामा थिए ।
जिम्मी कार्टरले राष्ट्रपतिको रुपमा ७९ दिन मात्रै बिदा लिएका थिए । विश्वको उथलपुथलका बीच अमेरिकी राष्ट्रपतिले यति लामो समय बिदा लिएको भन्दै बाइडेनको आलोचना भइरहेको छ । बाइडेनका सहयोगीहरूले अमेरिकी राष्ट्रपति जहिले पनि बिदामा गएको बेला आफ्नो काममा जोडिएको अवस्थामा रहने बताएका छन् ।
उसले नियमित रूपमा आवश्यक कलहरू प्राप्त गर्ने र सजिलै सम्पर्क गर्न सकिने अवस्थामा बसेको स्पष्ट गरेका छन् । बाइडेन अमेरिकामा राष्ट्रपति पद सम्हाल्ने सबैभन्दा वृद्ध नेता हुन् । ८० वर्षीय डेमोक्र्याट नेताले जनवरी २०, २०२१ मा राष्ट्रपतिको रूपमा शपथ लिएका थिए । उनी रिपब्लिकन उम्मेदवार डोनाल्ड ट्रम्पलाई हराएर अमेरिकाको राष्ट्रपति बनेका थिए ।
दोस्रो कार्यकालका लागि पनि चुनावी मैदानमा आउँन चाहेका बाइडेन आफ्नै पार्टीमा समेत चर्को आलोचना भएपछि पछाडि सकेका छन् । त्यसपछि आफ्नी उपराष्ट्रपति कमला ह्यारिसलाई राष्ट्रपति उमेद्वारका रुपमा अघि बढाउँदै आफ्नो कार्यकालबाट विट मार्न लागेका बाइडेनलाई जाँदाजाँदै भने ठूलो झट्का लागेको छ ।
उनको छोरा हन्टर बाइडेनले जानीजानी कर छलीको ९ अभियोगमा आफूलाई दोषी स्वीकार गरेका छन् । यसअघि हन्टर बाइडेनले सन् २०१६ र २०१९ को बीचमा जानाजानी १४ मिलियन डलरको कर नतिरेको आरोप अस्वीकार गरेका थिए । ५४ वर्षीय हन्टर बाइडेन आफू निर्दोष रहेको दाबी गर्दै मुद्दाको सामना गर्न चाहन्थे, तर अभियोजकहरूको आपत्तिपछि उनी ‘दोष स्वीकार गर्न राजी’ भएका हुन् ।
तीन महिनाअघि उनी बन्दुक राख्ने र लागुऔषध प्रयोगका छुट्टाछुट्टै मुद्दामा उनी दोषी ठहर भएका थिए । न्यायाधीश मार्क स्कार्सीले हन्टर बाइडेनले दोष स्वीकार गरेको खण्डमा उनलाई अधिकतम १५ वर्षसम्मको जेल सजाय र ५ देखि १० लाख डलरसम्म जरिवाना हुने बताएका छन् । उनको सजायबारे निर्णय राष्ट्रपतिको चुनाव सकिएको एक महिनापछि डिसेम्बर १६ मा लिइनेछ, जतिबेला उनका पिता जो बाइडेनको कार्यकाल समाप्त हुनेछ ।
त्यसो त राष्ट्रपति बाइडेनले यसअघि नै आफ्ना छोरालाई माफी दिलाउन आफ्नो शक्ति प्रयोग नगर्ने बताइसकेका छन् । अमेरिकामा नोभेम्बरमा राष्ट्रपतिको निर्वाचन हुँदैछ भने जनवरी २० देखि नयाँ राष्ट्रपतिले आफ्नो कार्यारम्भ गर्नेछन् ।
