२५ भदौ, विराटनगर ।
एर्लिङ हाल्यान्ड सम्मिलित नर्वेले चौथौ संस्करणको युरोपियन नेसन्स लिगमा पहिलो जित दर्ता गरेको छ । सोमबार राति भएको दोस्रो चरणको खेलमा नर्वेले घरेलु मैदानमा अस्ट्रियालाई २-१ गोलले हराएको हो ।
नर्वेस्थित युरेभालमा भएको खेलमा नर्वेलाई जिताउन हालान्ड र फेलिक्स हर्न मिहरेले एक-एक गोल गरे । अस्ट्रियाका मार्सेल सबिट्जरले गोल गरेका थिए ।
फेलिक्स हर्न मिहरेको गोलमा नर्वेले सुरुआती अग्रता लिएको थियो । तर, नवौं मिनेटमा लिएको त्यो अग्रता नर्वेले जोगाउन सकेन ।प्याट्रिक विमरले उपलब्ध गराइदिएको बलमा मार्सेल सबिट्जरले गोल गर्दै अस्ट्रियालाई खेलमा फर्काए ।
तथापि, निर्धारित खेल सकिन १० मिनेट बाँकी हुँदा हाल्यान्डले गोल गर्दै नर्वेलाई जिताए । खेलको ८३औं मिनेटमा नर्वेले अर्को गोल थपे पनि उक्त गोललाई भिएआर रेफ्रीले मान्यता दिएनन् ।
योसँगै नर्वेले दुई खेलबाट चार अंक जोडेको छ । नर्वेलाई पहिलो खेलमा काजकिस्तानले गोलरहित बराबरीमा रोकेको थियो। अस्ट्रियाको भने समान खेलमा एक अंक छ।
