२६ भदौ, एजेन्सी ।
कोलम्बियन स्टार फुटबलर जेम्स रोड्रिग्वेज जुलाई र अगस्टबीचको एक क्लबविहीन थिए । ब्राजिलियन क्लब साओ पाउलोबाट व्यवसायिक फुटबल खेलिरहेका उनले युरोपियन लिग फर्किने मनसायका साथ उक्त क्लब छोडेका थिए ।
युरोप फर्किने मानसिकता बनाएका उनले साओ पाउलोसँगको सम्झौता रद्द गरे गरेका थिए । त्यसबीचमा ला लिगा क्लब एट्लेटिको मड्रिड र इटालियन क्लब लाजियोसँग नजिक भएका थिए । तर, ३३ वर्षीय रोड्रिग्जेलाई दुवै क्लबले ‘धेरै बूढो भए’ भनेर भित्र्याउन मानेनन् ।
तर, उनै रियल मड्रिडका पूर्वखेलाडी रोड्रिग्वेजलाई ला लिगा क्लब रायो भालेकानोले विश्वस्त भएर अनुबन्ध गर्यो । त्यहाँबाट डेब्यु बाँकी नै रहेको अवस्थामा उनले कोलम्बियाका लागि उत्कृष्ट प्रदर्शन गरिरहेका छन् ।
हुन त रोड्रिग्वेजले हालै सम्पन्न कोपा अमेरिकामा कोलम्बियाका लागि उत्कृष्ट प्रदर्शन गरेका थिए । उनले एक गोल गर्दा ६ वटा गोलमा पास मिलाउँदै कोलम्बियालाई फाइनलसम्म पुर्याएका थिए ।तथापि, फाइनल खेलमा कोलम्बिया अर्जेन्टिनासँग अतिरिक्त समयमा पराजित हुँदा उनी कोपा अमेरिकाको ट्रफी उचाल्नबाट चुके । तर, रोड्रिग्वेजको प्रदर्शनलाई मूल्यांकन गर्दै आयोजकले उनलाई प्रतियोगिताकै उत्कृष्ट खेलाडी घोषणा गर्यो ।
फेरि एकपटक उनले आफूलाई प्रमाणित गरिदिएका छन् । यो तथ्यांकले बोल्छ । विश्वकप छनोटअन्तर्गत अर्जेन्टिनासँगको खेलमा एक गोल र एक असिस्ट गरेका रोड्रिग्वेजले कोलम्बियाका लागि पछिल्ला आठ खेलमध्ये १० गोलमा आफ्नो योगदान दिएका छन् । अर्थात् उनले तीन गोल गर्दा सात गोलमा पास मिलाएका छन् ।
रोड्रिग्वेजले पाराग्वेसँगको खेलमा दुई गोलमा पास मिलाएका छन् भने कोस्टारिकाविरुद्ध एउटा गोलमा असिस्ट गरेका छन् । पानामाविरुद्ध दुई गोल गर्न भ्याएका उनले उरुग्वेविरुद्ध एउटा गोलमा पास मिलाएका छन् ।
आज भएको अर्जेन्टिनासँगको खेलमा भने उनले एक गोल र एक असिस्ट गरे । जसमा कोलम्बियाले घरेलु मैदानमा साविक विजेता अर्जेन्टिनालाई २-१ गोलले हराएर बदला लिएको थियो । कोलम्बिया र अर्जेन्टिनाले गत जुलाईमा कोपा अमेरिकाको उपाधि भिडन्तमा प्रतिस्पर्धा गरेका थिए, जसको अतिरिक्त समयमा गोल गर्दै अर्जेन्टिनाले उपाधि जितेको थियो ।
दुई महिनापछि कोलम्बिया र अर्जेन्टिनाले फेरि एकपटक खेलेका थिए, जसमा कोलम्बियाले अर्जेन्टिनासँग बदला लिएको हो । घरेलु मैदानमा कोलम्बियालाई जिताउन यर्सन मस्क्युरा र जेम्स रोड्रिग्वेजले एक-एक गोल गरे । अर्जेन्टिनाका निकालेस गोन्जालजले गरेको गोल सान्त्वना बनेको थियो ।
रोड्रिग्वेज सम्मिलित कोलम्बिया सन् २०२६ मा हुने विश्वकप छनोटका एउटा पनि खेल नहार्ने एकमात्र टोली हो । सन् २०१४ को विश्वकपमा सर्वाधिक ६ गोल गरेर गोल्डेन बुट पाएपछि रियलमा अनुबन्ध हुने मौका पाएका रोड्रिग्वेजले त्यहाँबाट दुई वटा ला लिगा र दुई वटा च्याम्पियन्स लिगको उपाधि जितेका छन् । बायर्नबाट दुईचोटी जर्मन बुन्डेसलिगा जितेका उनले राष्ट्रका लागि एक सय आठ खेलमा २९ गोल गरेका छन् ।
