२७ भदौ , काठमाण्डौ ।
नेपाली कांग्रेसका महामन्त्री गगन थापाले चलचित्र ‘साम्बाला’लाई ओस्कारका लागि योग्य भएको बताएका छन् । यो निकै खुसीको विषय भएको उनले बताएका छन् । चलचित्र रिलिजको पूर्वसन्ध्यामा गगनले ‘साम्बाला’ निर्देशक मिनबहादुर भामलाई शुभकामना दिँदै यो सिनेमा हेर्न पनि आग्रह गरेका छन् ।
“प्रिय भाइ मीन, तिमी हाम्रो पुस्ताको अब्बल सिनेकर्मी हो । ओस्कारवर्दी चलचित्र साम्बाला निर्माण गरेकोमा बधाई र सफलताको शुभकामना । कांग्रेसीहरूले त आफ्नो परिवारको एउटा सदस्य अन्तर्राष्ट्रिय ख्याति प्राप्त सिनेकर्मी हो भन्दा थप गर्व गर्नसक्ने विषय हो,” गगनले सामाजिक सञ्जाल फेसबुकमा लेखेका छन्, “साम्बाला सिनेमा हलमा भदौ २८ गते आउँदैछ, प्रतिक्षामा छु। सबैलाई हेर्न आग्रह पनि गर्दछु ।”
आइतबार भएको प्रिमियरमा चलचित्र हेर्न कांग्रेसका अर्का महामन्त्री विश्वप्रकाश शर्मा भने पुगेका थिए । गगन भने प्रिमियरमा गएका थिएनन् । मिन नेपाली कांग्रेस आवद्ध व्यक्ति हुन् । उनी मुगुबाट प्रतिनिधिसभा सदस्यको समानुपातिकतर्फ सिफारिस भएका थिए ।
चलचित्रमा तिब्बतीय जनजीवन समेटिएको छ । बहुपति विवाहित एक गर्भवती महिलाले व्यापार गर्न ल्हासा पुगेर बेपत्ता भएका श्रीमान् खोज्दा भोग्नुपरेको कष्टकर यात्रा चलचित्रमा प्रस्तुत गरिएको छ । ‘साम्बाला’मा उच्च हिमाली भेगको भूगोल छ । त्यहाँ हिउँमा जीवन खोज्ने मानिसहरू छन् ।
तीनजना दाजुभाइसित उनको विवाह हुन्छ । जेठो टासी, माइलो कर्म, कान्छो दावा । माइलो सानैदेखि लामा बनेर गुम्बामा छन् । टासी व्यापारको क्रममा तिब्बत जान्छ । यता पेमा गर्भवती छन्। तर, त्यो गर्भ टासीको होइन भन्ने हल्ला गाउँमा चल्छ । त्यो कुरा ल्हासामा रहेका टासीले सुन्छन् ।
अनि गर्भवती पेमा श्रीमान् टासीलाई खोज्न कठिन यात्रामा निस्किन्छिन् । यही कथाका दृश्यहरु चलचित्रमा हेर्न सकिन्छ । बर्लिन, लोकार्नो जस्ता अन्तर्राष्ट्रिय फिल्म फेस्टिभलहरुमा प्रर्दशन पूर्व स्क्रिप्टले नै संसारभर करोडौँ रुपैयाँको पुरस्कार जितेको सम्बाला १४ करोड लगानीमा बनेको नेपालको अहिलेसम्मकै महँगो चलचित्र हो ।
‘साम्बाला’मा थिन्ले ल्हामो, सोनम तोपदेन, कर्मा शाक्यलगायतको मुख्य भूमिका छ । चलचित्रको कथा मिन भाम र अभिनास विक्रम शाहले संयुक्त रूपमा लेखेका छन् । भाम निर्देशित ‘साम्बाला’ हेर्नकै लागि बलिउडबाट नवाजुद्दीन सिद्दिकी र अनुराग कश्यप नेपाल आएका थिए ।
साम्बाला हेरेपछि नवाजुद्दीनले आफ्नो अपेक्षाभन्दा माथिको नेपाली फिल्म रहेको बताएका छन् । उनले फिल्म आश्चर्यजनक र सुन्दर रहेको र आफूले अपेक्षा नगरेको समेत बताएका छन् । उनले सम्बालका कलाकारहरूको अभिनयको पनि तारिफ गरेका छन् ।
