२८ भदौ , विराटनगर ।
नेपाललाई पारा ओलम्पिकमा ऐतिहासिक कांस्य पदक दिलाएकी पारा तेक्वान्दोकी खेलाडी पलेशा गोवर्धनको बैंक खातामा सरकारले ६५ लाख रुपैयाँ जम्मा गरिदिएको छ । सरकारले शुक्रबार डिजिटल माध्यमबाट २१ वर्षीया पलेशाको खातामा उनले पाउने ६५ लाख पुरस्कार रकम जम्मा गरिदिएको हो ।
पुरस्कार रकम जम्मा गरेपछि एक कार्यक्रमबीच प्रधानमन्त्री केपी शर्मा ओलीले पलेशालगायत अन्य सम्मान गरेका छन् । सो कार्यक्रममा पलेशाको खाताको रकम जम्मा भइसकेको जानकारी गराइएको हो । सो अवसरमा प्रधानमन्त्री ओलीले नेपाली खेलाडीको खेल अन्तर्राष्ट्रिय स्तरमा प्रतिस्पर्धा गर्न सक्ने अवस्था रहेको बताए ।
यस्तै, प्रशिक्षक कविराज नेगीलाई ५ लाख ८५ हजार पुरस्कार व्यवस्थापक २ लाख ९२ हजार पुरस्कार रकम दिइएको छ । सरकारले राष्ट्रिय खेलकुद विकास नियमावली २०७९ अनुसार उक्त पुरस्कार दिएको हो ।
सो नियमावलीअनुसार समर ओलम्पिक्स, विन्टर ओलम्पिक्स ,पारालिम्पिक्स, विशेष ओलम्पिक्स र विश्व कप फुटबल जित्नेलाई ६५ लाख रुपैयाँ पुरस्कार निर्धारण गरिएको छ ।नियमावलीमा व्यक्तिगततर्फ स्वर्ण पदक जित्नेलाई १ करोड ३० लाख, रजत पदक जित्नेलाई ९७ लाख र कास्य पदक जित्नेलाई ६५ लाख रुपैयाँ पुरस्कार दिने व्यवस्था रहेको छ ।
यही व्यवस्थाअनुरूप सरकारबाट पुरस्कृत हुने उनी पहिलो नेपाली खेलाडी बनेकी छन् ।
पलेशा हाल चीनको सांघाइको तोङजी विश्वविद्यालयमा आर्किटेक्चर अध्ययन गरिरहेककी छन् । उनी बागबजारकी हुन् । उनको जन्मिदै बायाँ हातको कुहिनामुनिको भाग थिएन । विद्यालयस्तरदेखि नै तेक्वान्दोमा आकर्षित भएकी २० वर्षीय पलेशाले सन् २०१६ देखि पारा तेक्वान्दो खेल थालेकी हुन् ।
त्यसपछि विभिन्न अन्तर्राष्ट्रिय प्रतियोगितामा सहभागिता जनाएकी उनले दजर्नौं अवार्ड जितेकी छन् । उनलाई कविराज लामाले प्रशिक्षण दिइरहेका छन् ।
