२८ भदौ, काठमाडौं ।
नेपालमा जापानिज इन्सेफलाइटिस (जेई) को संक्रमणबाट मृत्यु हुनेको संख्या १४ पुगेको छ । जबकि, गत वर्षमा सात जनाले जेईका कारण ज्यान गुमाएका थिए ।
परिवार कल्याण महाशाखाको तथ्यांकअनुसार गत १५ साउनयता जापानी इन्सेफ्लाइटिस संक्रमितको संख्या ६१ पुगेको छ । विभिन्न जिल्लाबाट ६ सय ९५ जना जापानिज इन्सेफलाइटिसका शंकास्पद बिरामीको नमुना परीक्षण गरिएको थियो ।
जसमा हालसम्म ६१ जनामा सङ्क्रमण पुष्टि भएको हो । संक्रमण पुष्टि भएकामध्ये २२.९५ प्रतिशत अर्थात् १४ जनाको मृत्यु भएको महाशाखाले जनाएको छ ।
मृत्यु हुनेमा कैलाली, कपिलवस्तु, पाल्पा, चितावन, सिन्धुली, रौतहट, सर्लाही, सिराह, सुनसरी र झापा जिल्लाका छन् । प्रयोगशालामा पुष्टि भएका बिरामी धेरैजसाे १५ वर्षभन्दा कम उमेरका छन् ।
परिवार कल्याण महाशाखाका अनुसार गत वर्ष १०७ जनामा जापानिज इन्सेफलाइटिसको सङ्क्रमण पुष्टि भएको थियो । विशेषगरी साउन र भदौ महिनामा जेइको संक्रमणदर उच्च हुन्छ ।
संक्रमितमध्ये २९ जना १५ वर्षमुनिका बालबालिका छन् । जापानी इन्सेफलाइटिस क्युलेक्स जातको पोथी लामखुट्टेले सार्ने गर्छ । यो रोग लागेपछि कडा टाउको दुखाइ, उच्च ज्वरो र मस्तिष्क सुन्निने जस्ता लक्षणहरू देखिन्छन् । उपचारपछि निको भए पनि पक्षाघातको समस्या रहन सक्छ ।
