२९ भदौ, विराटनगर ।
राष्ट्रिय क्रिकेट टोलीका पूर्वकप्तान सन्दीप लामिछाने नेपाल प्रिमियर लिगआबद्ध विराटनगरको मार्की खेलाडी बनेका छन् । देश तथा विदेशका विभिन्न लिगको अनुभवले निखारिएका सन्दीप विराटनगरका मार्की प्लेयर बनेका हुन् ।
२४ वर्षीय सन्दीप ग्लोबल आइकनका रूपमा परिचित छन् । २०७८ साल मंसिर २९ गते ज्ञानेन्द्र मल्ललाई विस्थापित गर्दै राष्ट्रिय टोलीको कप्तान बनेका सन्दीपले २०७९ भदौमा निलम्बित भएका थिए । सन्दीप निलम्बनमा परेपछि उनको स्थान रोहितकुमार पौडेलले लिएका छन् ।
आफ्ना समर्थक युवतीलाई आर्थिक अवस्थाको फाइदा उठाएर बलात्कार गरेको आरोप लागेपछि बर्खास्तीमा परेका सन्दीपले लामो समय क्रिकेट खेल्न पाएनन् । केही समय त उनले पुर्पक्षका लागि थुनामा पनि बस्नु परेको थियो ।
२०७९ कात्तिकमा पुर्पक्षका लागि थुनामा गएका सन्दीपले २० लाख रुपैयाँ धरौटी बुझाएर रिहा भएका सोही वर्षको पुस २९ गते रिहा भएका थिए । अदालतले निर्दोष साबित गरेसँगै क्यानले सन्दीपको निलम्बन फुकुवा गरेको थियो ।
त्यसयता राष्ट्रिय टोलीबाटै खेलिरहेका सन्दीप ‘लक्की ड्र’ मार्फत् विराटनगरको मार्की प्लेयर चुनिएका हुन् । मार्की खेलाडीले २० लाख रुपैयाँ पाउने छ । एनपिएल खेल्ने अरू खेलाडी अक्सनमार्फत छानिने छन् ।
आगामी मंसिर १५ देखि पुस ६ गतेसम्म कीर्तिपुरस्थित त्रिवि मैदानमा आयोजना हुँदै छ । जसका लागि नेपाल क्रिकेट संघ (क्यान)ले शुक्रबार आठ मार्की प्लेयरको नाम सार्वजनिक गरेको थियो । शनिबार आयोजित कार्यक्रममा ती मार्की प्लेयरको टिम टुंगो लगाइएको हो ।
जसअनुसार सन्दीप विराटनगरको मार्की प्लेयर बन्दा काठमाडौंको मार्की प्लेयरमा करण केसी, पोखराको कुशल भुर्तेल, चितवनको कुशल मल्ल, जनकपुरको आसिफ सेख, लुम्बिनीको रोहित पौडेल, कर्णालीको सोमपाल कामी र सुदूरपश्चिमको दीपेन्द्रसिंह ऐरी मार्की प्लेयर बनेका छन् ।
एनपिएलमा विराटनगर, जनकपुर, काठमाडौं, चितवन, पोखरा, लुम्बिनी, कर्णाली र सुदूरपश्चिमले भाग लिँदैछन् । क्यानले दुई वर्षअघि भारतीय कम्पनीलाई नेपाल टी–२० लिग आयोजनाको जिम्मेवारी दिएको थियो । तर उक्त लिग खेल मिलेमतो र आर्थिक अनियमितिता लगायत विषयमा विवादित बनेपछि क्यानले त्यसलाई रद्द गरेर आफैं एनपिएल आयोजना गर्ने निर्णय गरेको हो ।
