२९ भदौ, काठमाडौं ।
एन्फा महिला लिगअन्तर्गत कोशी प्रदेशले संकटा फुटबल क्लबसँग बराबरी खेल्दै अंक बाँडेको छ । शनिबार आफ्नो पाँचौं खेल खेलेको कोशीले संकटासँग गोलरहित बराबरी खेलेको हो ।
त्रिपुरेश्वरस्थित दशरथ रंगशालामा भएको खेलको निर्धारित समय दुवै टोलीले गोल गर्न सकेनन् । यससँगै कोशी पाँच खेलमा १० अंकसहित तालिकाको तेश्रो स्थानमा उक्लिएको छ ।
समान पाँचवटै खेलमा पाँच अंकसहित संकटा सातौं स्थानमा छ । चार खेलमा १० अंकसहित एपीएफ फुटबल क्लब शीर्ष स्थानमा छ ।
महिला लिगमा लगातार तीन जित निकालेको कोशीको बुधबार मात्र अपराजित यात्रामा ब्रेक लागेको थियो । विभागीय टोली नेपाल पुलिस क्लबसँग ४-० गोलले हारेसँगै कोशी प्रदेशको अपराजित यात्रामा ब्रेक लागेको हो ।कोशीले महिला लिगको उद्घाटन खेलमा स्याङ्जाको वालिङ नगरपालिलाई ४–० गोलले हराएको थियो । दोस्रो खेलमा कोशीले बागमती युवा क्लबलाई २–१ गोलले पराजित गरेको थियो भने तेस्रो खेलमा कर्णाली प्रदेशलाई ४–० ले हराएको थियो ।
