३० भदौ, विराटनगर ।
नयाँ सिजनको स्पेनिस ला लिगामा साविक विजेता रियल मड्रिडले तेस्रो जित निकालेको छ । शनिबार राति आफ्नो पाँचौं खेल खेलेको रियलले रियल सोसिडाडलाई उसैको मैदानमा २–० गोलले हराएको हो ।
एनोइटामा रियललाई जिताउन भिनिसियस जुनियर र केलियन एमबाप्पेले एक-एक गोल गरे । उनीहरू दुवैले पेनाल्टीमार्फत गोल गर्दै रियललाई जिताएका हुन् ।
पहिलो हाफ गोलरहित बराबरीमा सकिएको खेलको ५८औं मिनेटमा कार्लो एन्सेलोट्टीको टोलीलाई भिनिसियसले पेनाल्टीमार्फत गोल गर्दै अग्रता दिलाएका थिए ।
अर्डा गुलरले डिबक्सको किनाराबाट प्रहार गरेको बल सर्जियो गोमेजको हातमा लागेको थियो । त्यसपछि रियलले पेनाल्टी पाएको हो ।एमबाप्पेले ७५ औं मिनेटमा अर्को पेनाल्टी गोल गर्दै रियललाई तीन अंक दिलाए ।जितसँगै दोस्रो स्थानमा रहेको रियलले ११ अंक जोडेर शीर्ष स्थानको बार्सिलोनालाई दबाब थपेको छ । लगातार चार खेलमा जित निकालेको बार्सिलोना १२ अंकसहित शीर्ष स्थानमा छ ।
आज बेलुकी ८ बजे बार्सिलोनाले पाँचौं स्थानको जिरोनासँग खेल्नेछ ।
