३० भदौ, विराटनगर ।
प्रतिनिधिसभा बैठकको अवरोध हटाउन सभामुख देवराज घिमिरेले दलहरूको बैठक बोलाएका छन् । प्रमुख प्रतिपक्षी दल नेकपा माओवादी केन्द्रले ‘हिंसा’ शब्दलाई लिएर अवरुद्ध गरेको सदन खुलाउने प्रयासस्वरूप सभामुख घिमिरेले बैठक डाकेका हुन् ।
आइतबार बिहान ११ बजेका लागि घिमिरेले प्रमुख दलका प्रमुख सचेतक र सचेतकको बैठक बोलाएका हुन् । सत्तारूढ नेकपा एमाले सचिव योगेश भट्टराईले भदौ १२ गते बोलेको माओवादी ‘हिंसा’ शब्द संसद्को रेकर्डबाट हटाउन नपर्ने घोषणा सभामुखले गरेपछि संसद्मा अवरोध सिर्जना भएको हो ।
भदौ २६ गतेको बैठकमा सभामुखले हिंसा शब्द असंसदीय नभएको घोषणा गरेपछि माओवादीले संसद् अवरुद्ध गरेको थियो । माओवादी हिंसा शब्द संसद्को रेकर्डबाट नहटाएसम्म बैठक चल्न नदिने निर्णय माओवादीले संसदीय दलको बैठकबाटै गरेको छ ।
संसद् सचिवालयको परामर्शमा सभामुखले सो शब्द हटाउनु नपर्ने घोषणा गरेका थिए । प्रतिनिधिसभाको बैठक आइतबार दिउँसो १ बजेको लागि बोलाइएको छ ।
