३० भदौ, काठमाडाैं ।
सत्तारूढ नेपाली कांग्रेसका राष्ट्रियसभाका सांसद किरणबाबु श्रेष्ठले प्रमुख प्रतिपक्षी नेकपा माओवादीका अध्यक्ष पुष्पकमल दाहाल ‘प्रचण्ड’ लाई जथाभावी नबोल्न भन्दै चेतावनी दिएका छन् ।
आइतबार राष्ट्रियसभा बैठकमा विशेष समय लिएर बोल्दै सांसद श्रेष्ठले १०० दिन पनि नपुग्दै सरकारको विरोध नगर्न आग्रह गरे । उनले प्रचण्डले सत्ताबाट बाहिरिनेबित्तिकै जथाभावी बोल्ने काम गरेको भन्दै आपत्ति जनाए ।
उनले भने, ‘अहिले गठबन्धनको सरकार बनेको १०० दिन पनि पुगेको छैन । सय दिन नपुग्दै यहाँ विभिन्न किसिमको विरोध, बाधा, अवरोधहरू सिर्जना गर्न थालिएको छ । यो प्रजातन्त्रका लागि राम्रो सन्देश पनि होइन । त्योतर्फ पनि हामी ध्यान दिऊँ भन्ने मलाई लाग्छ ।’
प्रचण्डले मुलुक बंगलादेश र श्रीलंका बन्छ भनेर जनतामा भ्रम छर्ने प्रयास गरेको बताउँदै सांसद श्रेष्ठले अभिव्यक्ति स्वतन्त्रताको नाममा जथाभावी बोल्दै हिँड्ने काम नगर्न पनि चेतावनी दिए ।उनले भने, ‘हिजोसम्म सत्तामा छौं । हिजोसम्म सरकारमा छौं । सरकारबाट निस्कन पाएको छैन–बंगलादेश र श्रीलंका भन्छौं । अनि त्यसको हिजोसम्मको दोषको भागी लिने न नलिने ? यस्ता अभिव्यक्तिहरूले नेपाली जनतामा भ्रम सिर्जना गर्छ। त्यो भ्रम सिर्जना गर्ने काम हामी नगरौं । प्रजातन्त्र भनेको अभिव्यक्ति स्वतन्त्रता हो । स्वच्छन्दता होइन । जे मन लाग्यो, त्यही बोल्ने किसिमको स्वच्छन्दता होइन ।’
