३१ भदौ, एजेन्सी ।
पोर्चुगिज स्ट्राइकर क्रिस्टियानो रोनाल्डो बिरामी परेका छन् । अल नासरबाट साउदी प्रो-लिग खेलिरहेका रोनाल्डोलाई ‘भाइरल इन्फेक्सन’ ले सताएको हो ।
आइतबार विज्ञप्ति जारी गर्दै अल नासरले कप्तान रोनाल्डोको ज्यानलाई सन्चो नभएको जनाएको छ । क्लबका चिकित्सकले स्वास्थ्य जाँच गर्दा भाइरल इन्फेक्सन देखिएको हो ।
स्वास्थ्य अवस्था कमजोर महसुस गरेका रोनाल्डोलाई आराम गर्न दिइएको छ । यसैले अल नासरले एएफसी च्याम्पिन्स लिग इलाइट खेल्ने टोलीमा समावेश गरेको छैन ।
रोनाल्डोबिनाको टोली आइतबार नै लिग खेल्न इराकको राजधानी बगदाद पुगेको छ ।
