३१ भदौ, एजेन्सी ।
विश्वकै सर्वाधिक चर्चित र लोकप्रिय गायक माइकल ज्याक्सनका दाजु टिटो ज्याक्सनको पनि निधन भएको छ । अमेरिकन संगीतकार टिटोको ७० वर्षको उमेरमा आइतबार निधन भएको हो ।
टिटोका परिवारले सोमबार उनको निधनको पुष्टि गरेको अन्तर्राष्ट्रिय सञ्चारमाध्यमले जनाएका छन् । न्यु मेक्सिकोदेखि ओक्लाहोमा सडक यात्रामा रहेका बेला हृदयघातका कारण उनको निधन भएको बताइएको छ । तथापि, उनको निधनको आधिकारिक कारण भने सार्वजनिक गरिएको छैन ।
सन् २००३ मा संगीततर्फ पाइला चालेका टिटोले एक साताअघि मात्र इंग्ल्यान्डमा आफ्नो प्रस्तुती दिएका थिए । टिटोले आफ्ना भाइहरूका साथ त्यहाँ प्रस्तुती दिएका थिए । इन्डियानाको ग्यारीमा जन्मिएका उनले सन् २०१६ मा ‘टिटो टाइम’ र २०२१ म ‘अन्डर योर स्पेल’ नामक दुई एल्बम रिलिज गरेका छन् ।
टिटो ज्याक्सनका आठ दाजु–भाइमध्येका एक थिए । त्यसमध्ये पप गीतका राजा मानिने माइकल ज्याक्सनको २५ जुन २००९ मा निधन भएको थियो । अन्तर्वार्तामा १५० वर्षसम्म बाँच्ने चाहना राख्ने गरेका उनको ५१ वर्षको उमेरमा निधन भएको थियो । मृत्यु प्रोपोफल र बेन्जोडायजेपाइनजस्ता औषधिको ओभर डोजले गर्दा हृदयाघातका कारण निधन भएको थियो ।
ज्याक्सन परिवारका अधिकांश सदस्य गीत–संगीत क्षेत्रमा छन् । टार्ली ज्याक्सन, ज्याकी ज्याक्सन, मार्लो ज्याक्सन, रेन्डी ज्याक्सन र जर्माइनलगायत ज्याक्सन दाजु–भाइ लामो समयदेखि गीत–संगीतमा सक्रिय रहेका छन् । माइकल, टिटो, जर्माइन, ज्याकी र मार्लोन मिलेर ज्याक्सन–५ को निर्माण गरेका थिए । जसकारण माइकल विश्व पपसम्राट बनेका थिए ।तर, अब टिटो र माइकल भने सांगीतिक क्षेत्रबाट मात्र नभएर संसारबाट नै अस्ताएका छन् ।
