६ असोज, काठमाण्डौ।
चर्चित मेडिकल व्यवसायी दुर्गा प्रसाईं पक्राउ परेका छन् । साइबर अपराध गरेको कसुरमा काठमाडौं जिल्ला अदालतले प्रसाईंसहित तीनजनाविरुद्ध पक्राउ पुर्जी जारी गरेपछि प्रसाईंलाई आज प्रहरीले उनको भक्तपुरस्थित निवसबाटै पक्राउ गरेको छ।
विद्युतीय कारोबार ऐन अनुसारको कसुरमा नेपाल प्रहरीको साइबर ब्युरोको टोलीले आइतबार उनलाई पक्राउ गरेको हो । प्रसाईंलाई भक्तपुरस्थित उनकै घरबाट पक्राउ गरिएको साइबर ब्युरोका एसपी दीपकराज अवस्थीले बताएका छन् ।
साइबर व्युरोबाट पक्राउ गर्न गएका प्रहरी एक घण्टासम्म पनि ढोका नखोलेपछि प्रहरी भ¥याङ लगाएर घरको कम्पाउण्डमा प्रवेश गरेको थियो । त्यसक्रममा प्रसाईंका अंगरक्षकलाई नियन्त्रणमा लिइएको प्रहरीले जनाएको छ ।
साइबर व्युरोबाट डीएसपीको नेतृत्वमा गएको प्रहरी टोली, महानगरीय प्रहरी परिसर भक्तपुर र ठिमी वृत्तको समन्वयमा उनलाई पक्राउ गरिएको हो । प्रसाईसहित उनीसँगै रहने युट्युवरहरु प्रकाशचन्द्र दाहाल र जीवन पाण्डेविरुद्ध साइबर ब्युरोमा परेको उजुरीका आधारमा प्रहरीले गत साता नै जिल्ला अदालत काठमाडौंबाट पक्राउ पुर्जी लिएको थियो ।
रास्वपा नेतृ लगायत पीडित महिलाले उनीहरुविरुद्ध साइबर व्युरोमा जाहेरी दिएका थिए विभिन्न व्यक्तिको चरित्रहत्या गर्ने,बेश्यावृति गरेको आरोप लगाउँने तथा आपत्तिजनक अभिव्यक्ति दिने गरेको भन्दै उजुरी परेपछि अदालतको अनुमतिमा पक्राउ गर्नुपरेको प्रहरीले जनाएको छ ।
पक्राउ परेपछि प्रसाईंले आफ्नो शरीरमा एक थोपा रगत रहेसम्म पनि केपी ओलीविरुद्ध लड्ने बताएका छन् । प्रहरीले आफ्नो गाडीमा प्रवेश गराउँदै गर्दा प्रसाईले आफूलाई भ्रष्टाचारी जस्तो व्यवहार नगर्न आग्रह गरेका थिए ।
बुधबार काठमाडौं जिल्ला अदालतका न्यायाधीश महेन्द्र खनालको इजलाशले प्रसाईंसहित तीन जनाविरूद्ध पक्राउ पुर्जी जारी गरेको थियो । दुई युट्युवर जीवन पाण्डे र प्रकाशचन्द्र दाहालविरुद्ध उनीहरूकै युट्युवमा दुर्गा प्रसाईँले बोलेको विषयलाई लिएर उजुरी परेको थियो ।
पछिल्लो समय प्रसाईंले ‘राष्ट्र राष्ट्रियता धर्म संस्कृति र नागरिक बचाउ अभियान’को नाममा गतिविधि गरिरहेका छन् । उनले विभिन्न उद्योगी, व्यवसायी, नेताहरुविरुद्ध आधारहीन टिप्पणी गर्दै आएका छन्
