७ असोज, काठमाण्डौ ।
श्रीलंकाका पूर्वराष्ट्रपति गोटाबाया राजापाक्षे काठमाडौं ओर्लिएका छन् । उनी निजी भ्रमणको रुपमा लुम्बिनी घुम्न आएको बताइएको छ । उनी भुटानबाट ड्रुक एयरको जहाज मार्फत त्रिभुवन अन्तर्राष्ट्रिय विमानस्थलमा अवतरण गरेको काठमाडौंस्थित श्रीलकंन दूतावास स्रोतले पुष्टि गरेको छ ।
भुटान भ्रमण सकेर राजापाक्षे नेपाल आएका हुन् । श्रीलंकाका नयाँ राष्ट्रपति अनुरा दिसानायकेले शपथ लिँदै गर्दा पूर्वराष्ट्रपति राजापाक्षे काठमाडौं ओर्लिएका हुन् । शनिबार भएको निर्वाचनबाट श्रीलंकाको राष्ट्रपतिमा दिसानायके निर्वाचित भएका थिए ।
पूर्वराष्ट्रपति राजापाक्षे लुम्बिनी भ्रमणका लागि नेपाल आएको नेपालस्थित श्रीलंकन दूतावासले जनाएको छ । बौद्ध धर्मावलम्बी राजापाक्षे गौतम बुद्धको जन्मस्थल लुम्बिनीका अलावा नवलपरासीको शाश्वत् धामस्थित बुद्धिस्ट सेन्टरमा समेत पुग्ने कार्यक्रम छ ।
गृह मन्त्रालय स्रोतका अनुसार सोमबार बिहान श्रीलंकन एयरलाइन्समार्फत राजापाक्षे त्रिभुवन अन्तर्राष्ट्रिय विमानस्थलमा ओर्लिएका थिए । दिसानायके निर्वाचित भएसँगै श्रीलंकामा राजापाक्षे परिवारको राजनीतिक दबदबामा ग्रहण लागेको थियो ।
अघिल्लो चुनावमा दिसानायकेले यिनै राजपाक्षेसँग प्रतिस्पर्धा गरेका थिए । तर, आर्थिक मन्दी चर्किएपछि दुई वर्षअघि श्रीलंकामा चर्केको आन्दोलनबाट राजापाक्षे अपदस्थ भएका थिए । उनी आन्दोलन चर्किएपछि देश छाडेर भागेका थिए ।
पछि भने उनी स्वदेश फर्किएर श्रीलंकामा नै बसेका थिए । राजापाक्षेपछि रनिल विक्रमासिंघे राष्ट्रपति भएका थिए । पछिल्लो निर्वाचनमा राजापाक्षेले आफ्ना भतिज नमल राजापाक्षेको पक्षमा मत मागेका थिए ।
राजापाक्षे परिवारको पुरानो राजनीतिक ‘लिगेसी’का बावजुद नमल भने लज्जास्पद रुपमा पराजित बने । नमल गोटाबायाका दाजु महिन्दाको जेठो छोरा हुन् । गोटाबाया श्रीलंकाका पूर्वराष्ट्रपति एवं पूर्वप्रधानमन्त्री महिन्दा राजापाक्षेका भाइ हुन् ।
पछिल्लो समय राजापाक्षे परिवारले राजनीतिमा भने जनविश्वास गुमाउदै गएको छ । भर्खरै सम्पन्न राष्ट्रपति निर्वाचनमा पूर्वराष्ट्रपति गोटाबाया राजपाक्षेका छोरा नमल राजपाक्षेको जमानत जफत भएको छ । उनले केबल १ प्रतिशत मत मात्रै पाएका छन् ।
