८ असोज , काठमाण्डौ।
सुनको भाउले नेपाली बजारमा लगातार तेस्रो दिन नयाँ रेकर्ड कायम गरेको छ । नेपाल सुन–चाँदी व्यवसायी महासंघका अनुसार आज मंगलबार छापावाल सुन प्रतितोला ५०० रुपैयाँले बढेर १ लाख ५९ हजार ७०० रुपैयाँ कायम भएको छ ।
नेपाली बजारमा सुनको मूल्यमा यही असोज ६ गतेदेखि दैनिक नयाँ रेकर्ड बन्दै आएको छ । सोमबारको तुलनामा मंगलबार सुनको मूल्य तोलामा ५०० रुपैयाँले बढेको छ । यसअघिको उच्च मूल्य सोमबार छापावाल सुन प्रतितोला एक लाख ५९ हजार २०० रुपैयाँमा कारोबार भएको थियो ।
महासंघका अनुसार, गएको आइतबार छापावाल सुन प्रतितोला एक लाख ५८ हजार ८०० रुपैयाँमा कारोबार भएको थियो । चाँदीको मूल्य भने तोलामा पाँच रुपैयाँले घटेको छ । चाँदी प्रतितोला एक हजार ९१५ रुपैयाँमा कारोबार भइरहेको महासंघले जनाएको छ ।
सोमबार चाँदी प्रतितोला एक हजार ९२० रुपैयाँमा कारोबार भएको थियो । पछिल्लो समय इजरायल–प्यालेस्टाइन द्वन्द्वको प्रभाव तथा युक्रेनमाथि रुसको हमलाका कारण लगानीकर्ताहरुले सुरक्षित लगानीको रुपमा सुनतर्फ आकर्षित भएका छन् ।
यस्तै, अमेरिकी फेडरल रिजर्भले ०.५० प्रतिशत बिन्दुले ब्याजदर घटाएपछि पनि सुनमा लगानीकर्ता आकर्षित बनेको विश्लेषण गरिन्छ । अन्तर्राष्ट्रिय बजारमा सुनको मूल्य बढेसँगै नेपाली बजारमा पनि त्यसको असर परेको व्यवसायीहरु बताउँछन् ।
अन्तर्राष्ट्रिय बजारमा सोमबार सुनको भाउ प्रति औंस २ हजार ६ सय ६० डलरमा पुगेको थियो । सुनको भाउ यस वर्ष अहिलेसम्म २८ प्रतिशतले बढेको छ र ४५ वर्ष यताकै उत्कृष्ट वार्षिक प्रतिफलतर्फ अघि बढेको छ ।
यदि सुन डिसेम्बर ३१ सम्म यो स्तरमा रह्यो भने सन् १९७९ पछि सुनमा लगानी गर्नेहरुका लागि यो सबैभन्दा राम्रो वार्षिक प्रतिफलको वर्ष हुनेछ । ४५ वर्षअघि सुनले एक वर्षमा १२६ प्रतिशत प्रतिफल दिएको थियो ।
मल्टि कमोडिटी एक्स्चेन्जमा सुनको कारोबार तीव्र गतिमा भइरहेको अन्तराष्ट्रिय संचारमाध्यामहरुले उल्लेख गरेका छन् । अमेरिकी फेडले ब्याजदर आधा अंकले घटाएपछि सुनको भाउमा असर परेको बताइन्छ ।
विश्वभर बढ्दै गएको भूराजनीतिक तनावका कारण सुनको भाउ बढिरहेको छ । आगामी दिनमा सुनको भाउ अझै बढ्ने अनुमान गरिएको छ।
