१ कार्तिक , काठमाण्डौ ।
नेपाल प्रिमियर लिग (एनपीएल)मा आन्तरिक रुपमा अक्सनबाट खेलाडी छनोटपछि विदेशी खेलाडी भित्र्याउने क्रमपनि सुरु भएको छ । फ्रेन्चाइज पोखरा एभेन्जर्सले अमेरिकाका विकेटकिपर तथा ब्याटर आन्द्रेस गौसलाई अनुबन्ध गरेको छ ।
एनपीएलमा आबद्ध हुने पहिलो विदेशी खेलाडी बनेका छन् । एनपीएल १५ मंसिरबाट ६ पुससम्म हुँदैछ । त्यसका लागि पोखराले ३० वर्षीय खेलाडी आन्द्रेसलाई अनुबन्ध गरेको जनाएको छ । दायाँ हाते ब्याटरसंग वेस्टइन्डिजको क्यारेबियन प्रिमियर लिग(सिपीएल), ग्लोबल टि ट्वान्टी क्यानडा, मेजर लिग क्रिकेट, इन्टरनेशनल लिग टि ट्वान्टी लिग खेलेको अनुभव छ ।
यो वर्ष अमेरिका र वेस्टइन्डिजमा आयोजना भएको टि ट्वान्टी विश्वकपमा गौस अमेरिकाको लागि सर्वाधिक रन जोड्ने खेलाडी रहेका थिए । उनले ६ खेलमा १५१.०३ को स्ट्राइट रेटमा २ सय १९ रन बनाएका थिए ।
प्रतियोगितामा गौसले दुई अर्धशतक समेत बनाएका थिए । टि ट्वान्टी विश्वकपमा अमेरिकाले सुपर ८ मा प्रवेश गर्दै ऐतिहासिक नतिजा निकालेको थियो । उमेर समूहमा दक्षिण अफ्रिकाको लागि खेलेका थिए ।
उनले अमेरिकाबाट २० अन्तर्राष्ट्रिय खेलमा पाँच सय ९८ रन बनाएका छन् । अमेरिकाबाट तीन एकदिवसीय खेल्दा एक सय ५२ रन बनाएका छन् । पोखरा एभन्जर्सका मालिक सुबोध त्रिपाठीले गौसलाई उच्च प्रदर्शनका लागि शुभकामना दिएका छन् ।
पहिलो पटक नेपालमा लिग खेल्न लागेका गौसले उत्साहित रहेको बताएका छन् । यसअघि टोलीले इन्डियन प्रिमियर लिग (आइपिएल)मा चेन्नई सुपर किङ्सको प्रतिनिधित्व गरिसकेका राजिव कुमारलाई मुख्य प्रशिक्षकमा नियुक्त गरेको थियो ।
उनी चेन्नईका ब्याटिङ र फिल्डिङ प्रशिक्षक हुन् । पोखराको मार्कीमा नेपाल राष्ट्रिय क्रिकेट टोलीका ओपनर कुशल भुर्तेल छन् । टोलीमा कुशलसंगै सागर ढकाल, आकाश चन्द, किरण कुमार ठगुन्ना, नारायण जोशी, बिपिन खत्री, दिलिप नाथ, तृत राज दास, सुनम गौतम, दिनेश खरेल, अमृत गुरुङ रहेका छन् ।
नेपाली खेलाडी छनोटका गत साताको आइतवार अक्सन भएको थियो । विदेशी खेलाडी टिमहरुले सिधै अनुबन्ध गर्न सक्नेछन् । एनपीएलमा सफल विदेशी खेलाडी र प्रशिक्षकहरुको आवागमनले नेपाली क्रिकेटको व्यवसायिकता थप बढ्ने साथै विश्वको नजर समेत यसमा पर्ने विश्लेषण गरिएको छ ।
यसअघि सम्पन्न अक्सनबाट समेत नेपाली क्रिकेटरले राम्रो आर्थिक लाभ लिएका छन् । एनपीएलमा सहभागी ८ टिमले १० खेलाडीका लागि समान ९० लाखसम्म खेलाडी छनोटमा खर्चिएका छन् ।
हरेक फ्रेन्चाइज टोलीमा कुल १६ खेलाडी हुनेछन् । चार विदेशी खेलाडी र एक ट्यालेन्ट हन्टबाट आउनेछन् । यसबाहेक हरेक टिमले मार्की खेलाडीलाई २० लाख खर्चिएका छन् । फ्रेन्चाईज टिममा पनि ठूलो राशिमा सम्झौता भएको छ ।
क्यान र फ्रेन्चाइज मालिकबीच १० वर्षको सम्झौता भइसकेको छ । तर एनपीएल भित्र विवाद देखिएको छ । एनपीएललाई लिएर पूर्व क्रिकेटर तथा व्यवसायी आमिर अख्तरले नेपाल क्रिकेट संघ क्यानलाई चेतावनी दिएका छन् ।
नेपाल प्रिमियर लिग एनपीएल कम्पनीको रुपमा आफ्नो नाममा दर्ता रहेको र सो सम्बन्धि सम्पूर्ण अधिकार आफ्नो हुने दाबी गर्दै आमिरले क्यानलाई आफ्नो सहमति बिना फ्रेन्चाईज प्रतियोगिता अघि नबढाउन चेतावनी दिएका हुन् ।
आमिर अख्तरले क्यानसामु चेतावनीयुक्त चुनौती दिएपनि क्यान भने यसको ट्रेडमार्क आफैमा रहेको भन्दै ढुक्क देखिएको छ । क्यानले अख्तरको दाबीलाई अस्वीकार गरेको छ। क्यानका प्रवक्ता छुम्बी लामाका अनुसार नेपालभित्र क्रिकेट गतिविधि सञ्चालनको अधिकार क्यानलाई नै छ।
