२ कार्तिक , काठमाण्डौ ।
दक्षिण एसियाली महिला फुटबलको महाकुम्भ महिला साफ च्याम्पियनसिपमा आज घरेलु टोली नेपालले आफ्नो पहिलो खेल खेल्दै छ ।आठौं संस्करणको साफ च्याम्पियनसिपअन्तर्गत दोस्रो खेलमा नेपालले भुटानसँग खेल्न आँटेको हो ।
त्रिपुरेश्वरस्थित दशरथ रंगशालामासाँझ ५ः३० बजेबाट सुरु हुने खेलमा समूह ‘बी’ मा रहेका नेपाल र भुटानले खेल्न लागेका हुन् । साविक उपविजेता नेपाल र भुटान भिड्नुअघि दिउँसो १ः३० बजे श्रीलंका र माल्दिभ्सले खेल्ने छन् ।
फुटबलको सर्वोच्च निकाय फिफाको वरीयता हेर्दा नेपाल ९८औं स्थानमा छ भने भुटान १७३औं स्थानमा छ । दक्षिण एसियाली राष्ट्रको वरीयताअनुसार नेपाल दोस्रो र भुटान पुछारमा छ । साफकै पनि विगतको प्रदर्शन नियाल्दा सन् २०२२ मा भुटानले सेमिफाइनल यात्रा तय गर्नुबाहेक अरू उपलब्धि हासिल गर्न सकेको छैन ।
नेपालले भने विगत पाँच संस्करणमा फाइनल पुगेर उपविजेतामा चित्त बुझाएको छ । सन् २०१० देखि सुरु भएको महिला साफमा नेपाल सन् २०१६ को चौथो संस्करण बाहेक सबैमा फाइनल पुगेको थियो ।
बंगलादेशमा भएको पहिलो संस्करणमा भारतले नेपाललाई १–० गोलले हराउँदै उपाधि जितेको थियो भने श्रीलंकामा भएको दोस्रो संस्करणमा भारतले नेपाललाई ३–१ गोलले हरायो । पाकिस्तानमा भएको तेस्रो संस्करणको उपाधि भिडन्तमा नेपालले भारतसँग ६–० गोलको लज्जास्पद हार बेहोरेको थियो ।
चौथो संस्करण भारतमा भएको थियो, जहाँ नेपाल सेमिफाइनलसम्म पनि पुग्न पाएन । त्यसबेला घरेलु टोलीले बंगलादेशलाई ३–१ गोलले हराउँदै उपाधि घरमै राख्यो । पाँचौं संस्करणयता महिला साफ नेपालमै हुँदै आइरहेको छ ।
सन् २०१९ मा भएको पाँचौं संस्करणमा आयोजक नेपाललाई ३–१ गोलले हराउँदै भारतले उपाधि छिन्यो ।अघिल्लो संस्करणमा भने घरेलु टिम नेपाल बंगलादेशसँग ३–१ गोलले नै हा¥यो । अब, यसपालि भने नेपाल उपाधि घरमै राख्ने लक्ष्यमा छ ।
तथापि, नेपालले भुटानसँगको खेलदेखि नै सचेत हुनु जरुरी छ । नेपाली महिला टोलीले भुटानविरुद्ध कहिल्यै हार बेहोर्न परेको छैन । हुन त भुटानसँग नेपालको भेट हुने भनेकै साफमा मात्रै हो। अहिलेसम्म यो टोलीसँग भिड्दा नेपालले चार खेलमा २३ गोल गरेको छ ।
तर, भुटानले भने एक गोल पनि फर्काउन सकेको छैन ।यस्तोमा भुटान नेपालका लागि सहज प्रतिद्वन्द्वी हुन सक्छ । तथापि, घरेलु टोली नेपालले पनि राम्रो तयारी गर्न पाएको छैन । अझ नेपालले दशरथ रंगशालामा अभ्यास गरेको भनेको एकदिन मात्रै हो ।
मुख्यप्रशिक्षक राजेन्द्र तामाङ पनि भुटानलाई कमजोरी टोली भने आँक्दैनन् । विगत र अहिलेको भुटानमा धेरै फरक रहेको उनी औंल्याउँछन् । भुटानले ग्रास्ट रुटदेखि नै महिला फुटबललाई विशेष प्रथामिकतामा राखेको छ ।
उसले राष्ट्रिय टोलीको बेन्च स्ट्रोङ बनाउन यु–१४ देखि नै लिग गरिरहेको छ ।त्यसैले भुटान यसपल्ट युवा टोली लिएर काठमाडौं आइपुगेको छ । तर, नेपाली टोलीमा भने उहीँ पुराना खेलाडी छन् ।
थपिएको भनेको एकमात्रै नयाँ खेलाडी हुन सजनी थोकर । पहिलो चरणमा १८ नयाँ खेलाडी बोलाएपनि समय कम हुँदा पुरानैलाई प्राथमिकता दिन परेको तामाङ बताउँछन् । अझ, भुटानसँगको खेलमा नेपाली टोलीकी प्रभावशाली स्ट्राइकर सावित्री भण्डारी ‘साम्बा’ को अनुपस्थिति नेपाली टोलीलाई खड्किनेछ ।
फ्रान्सको एन एभेन्ट गेङगाम्पबाट व्यावसायिक फुटबल खेल्दै आएकी साम्बालाई क्लबले फुकुवा गर्न नमानेपछि पहिलो खेल गुमाउनु परेको हो ।यद्यपि, उनी दोस्रो खेलपछि टोलीमा आबद्ध हुनेमा मुख्यप्रशिक्षकतामाङ विश्वस्त छन् ।
यसैबीच हिजोको उद्घाटन खेलमा भने पाँचपल्टको विजेता भारतले विजयी सुरुआत गरेको छ। त्रिपुरेश्ववरस्थित दशरथ रंगशालामा बिहीबार भएको खेलमा पाकिस्तानलाई ५–२ ले पराजित गर्दै भारतले सुखद सुरुआत गरेको हो।
जितसँगै समूह ए मा रहेको भारतले तीन अंक जोडेको छ। योसँगै सेमिफाइनल पुग्ने सम्भावना बलियो बनेको छ। यो समूहमा भारत र पाकिस्तानबाहेक बंगलादेश पनि छ।
