२९ कार्तिक , काठमाण्डौ।
आफूलाई निर्मला पन्त हत्या प्रकरणको प्रत्यक्षदर्शी बताउने नवराज अर्याललाई प्रहरीको केन्द्रीय अनुसन्धान ब्युरोले छाडेको छ । उनले दिएको टेलिभिजन अन्तर्वार्ताबारे सोधपुछ गरेर परिवारलाई जिम्मा लगाइएको ब्युरोका एसपी होविन्द्र बोगटीले बताएका छन् ।
अर्याललाई उनकी छोरीले जिम्मा लिएकी हुन् । करारको जागिरबाट २०७७ मा लाइसेन्सको कारण बर्खास्त गरेपछि उनि विचलित भएको अनुसन्धान अधिकृतहरूले बताएका छन् । लाइसेन्सका कारण आफूले दुख पाएको उनले अन्तरवार्तामा समेत उल्लेख गरेका छन् ।
अर्याल तत्कालीन खानेपानी मन्त्री बिना मगरको चालक थिए । सो क्रममा अर्यालले कञ्चनपुरमा निर्मला पन्तको बलात्कार र हत्या भएको आफूले प्रत्यक्ष देखेको पत्रकार ऋषि धमलासँगको टेलिभिजन अन्तर्वार्तामा दाबी गरेका छन् ।
तर, उनको दाबी पुष्टि नभएको केन्द्रीय अनुसन्धान ब्युरोले बताएको छ । उनले घटनामा सम्लग्नभएकाहरुको नाम समेत आफूले बताउने भन्दै बताउने विभिन्न प्रयास गरेपछि भेट्न नदिइएको बताएका छन् ।
तर प्रहरीले उनले भनेका नामहरु घटनासँग सम्बन्धित नरहेको बताएको छ । अर्यालको भनाई कतैबाट पनि पुष्टि नहुने भन्दै प्रहरीले मिडिया देखेर त्यस्तो कुरा बोलेको बयानका क्रममा बताएका छन् ।
यो प्रकरणमा अन्तर्वार्ता लिने पत्रकार ऋषि धमलासँग पनि प्रहरीले सोधपुछ गरेको थियो । त्यसक्रममा अन्तर्वार्ता हटाउने सहमति भएको प्रहरीले बताएको छ । आफूले निर्मलाको बलात्कार हुँदै गरेको देखेको बयान दिएपछि प्रहरीले अर्याललाई बोलाएको थियो ।
प्रहरीले उनकी श्रीमतीलाई समेत बोलाएर अर्यालको पृष्ठभूमिबारे सोधपुछ गरेको थियो । त्यसक्रममा जागिरबाट निकालिएपछि उनी विक्षिप्त भएको खुलेको प्रहरीको भनाइ छ । अन्तर्वार्ता बाहिरिएपछि संवेदनशील कुराहरू प्रसारण हुँदा आममानिसमा गलत सन्देश जाने भन्दै कसैले दाबी गरेकै आधारमा प्रकाशन, प्रसारण नगर्न पनि सीआईबीले अनुरोध गरेको छ।
