६ मंसिर, काठमाण्डौ।
राष्ट्रिय प्रजातन्त्र पार्टीका अध्यक्ष राजेन्द्र लिङ्देनले बुधबार सुदूरपश्चिमको डोटीमा आयोजित पार्टी कार्यक्रममा भने ‘केपी ओलीले अब कति वर्ष चलाइराख्न पाए भने यो देश बन्छ होला त, तपाईको सुखको दिन आउँछन् होला त, हाम्रा युवाहरुले यही देशभित्र गरिखाने वातावरण बन्छ होला त ?,
शेरबहादुर देउवालाई छैटौं–सातौं कति पटक प्रधानमन्त्री बनाइदिए यो देश बन्ला ? वा प्रचण्डलाई फेरि फर्काइदिए बन्छ होला’, ‘कांग्रेस, एमाले र माओवादीको परपरसम्म हेर्नुस्, यीनीहरुका कुन चाहिँ मान्छेलाई प्रधानमन्त्री बनायो भने यो देश बन्छ होला ?’, उनले भने , ‘थाकेको बेइमान र भ्रष्ट नेतृत्व बोकेर तपाईले आफ्नो सुखी जीवन देख्न पाउनुहुन्न ।’
हिन्दु राष्ट्र र राजासंस्थाको वकालत गरिरहेको राप्रपाका अध्यक्ष लिङ्देनको यो अभिब्यक्ति यस्तो समयमा आएको छ । जतिबेला वर्तमान सरकारका मन्त्रीहरु फेरबदल गर्ने चर्चा चलिरहेको छ।
७दलीय गठबन्धन सरकार गठन गर्ने समझदारी गर्दा देखिने नै प्रधानमन्त्री समेत आलोपालो गर्ने सझदारी गरेका प्रमुख सत्तारुढ दल नेपाली कांग्रेस र नेकपा एमालेका शीर्ष नेतृत्वले पहिलो कार्यकाल एमाले अध्यक्ष केपी शर्मा ओलीलाई प्रधानमन्त्री चुनेका छन् भने दोस्रो कार्यकालमा शेरबहादुर देउवा प्रधानमन्त्री बन्ने छ ।
सहमति अनुशार २ वर्षका लागि प्रधानमन्त्री बनेका ओलीको दिनगन्ती सुरु भइसकेको छ । र यो गन्ती अरु कसैले नभएर सरकारकै गृहमन्त्री रमेश लेखकले गरेका छन् । आज धनगढीमा प्रेस युनियनले आयोजना गरेको पत्रकार सम्मेलनमा गृहमन्त्री लेखकले २०८४ सम्म यो गठबन्धन कायम रहने दाबी गर्दै अबको १ वर्ष ८ महिनापछि वर्तमान प्रधानमन्त्री परिवर्तन भई नेपाली कांग्रेसका सभापति शेरबहादुर देउवा प्रधानमन्त्री बन्ने बताए।
मन्त्रीहरुको फेरबदल हुने चर्चाका बीच गृहमन्त्री लेखकले मन्त्री परिवर्तन हुने कुरा हल्ला मात्र रहेको बताए । उनले आजका मितिसम्म मन्त्री हेरफेर हुने कुरामा कुनै छलफल नभएको दाबी गरे। गृहमन्त्री लेखकले प्रधानमन्त्रीय पद्धतिमा प्रधानमन्त्रीले आवश्यकताअनुसार मन्त्री हेरफेर गर्न सक्ने बताए।
उनले भने– दुई दलको सरकार भएकाले मन्त्री हेरफेर गर्दा छलफल गरेर मात्र हुन्छ तर अहिलेसम्म त्यस्तो छलफल भएको छैन। प्रधानमन्त्रीले गर्ने चीन भ्रमणका विषयमा दुई दलबीच खटपट भएको छ नि भन्ने सञ्चाररकर्मीको जिज्ञासामा गृहमन्त्री लेखकले सामान्य छलफलको विषयलाई ठूलो बनाएर बेकारको हल्ला चलाएको दाबी गरे।
उनले भने– एमाले र कांग्रेसबीच कुनै पनि विषयमा असमझदारी छैन, दुई दल मुख्य प्रतिस्पर्धी भए पनि मिलेर सरकार चलाइरहेका छौँ, २०८४ को निर्वाचनसम्म सहज मिलेर जान्छौँ। नयाँ प्रधानमन्त्री नियुक्तलगत्तै विदेश भ्रमणमा जाने परम्परा रहेको बताउँदै गृहमन्त्री लेखकले भारत वा चीन कुन देश अगाडि जाने भन्ने विषय सामान्य रहेको उल्लेख गरे।
उनले भने– प्रधानमन्त्रीको चीन भ्रमणको मिति तय भइसकेको छ, चीन भ्रमणलगत्तै भारत भ्रमण गर्नुहुन्छ। गृहमन्त्रीले बीआरआइबीको विषयमा खटपट रहेको विषयको बचाउ गरेपनि हिजो पत्रकार सम्मेलन नै गरेका एमाले नेताले कांग्रेस तर्फ लक्षित गर्दै सहमति भइसकेको बीआरआईलाई गिजोलेको टिप्पणी गरेका छन् ।
एमालेका उपमहासचिव प्रदीप ज्ञवालीले सत्ता साझेदार नेपाली कांग्रेसप्रति लक्षित गर्दैै चिनियाँ परियोजना बेल्ट एन्ड रोड इनिसियटिभ (बीआरआई)मा पहिले हस्ताक्षर गरेको भए पनि अहिले गिजोल्न थालेको आरोप लगाएका हुन्।
बुधबार ज्ञवालीले भने, ‘उहाँहरुले नै हस्ताक्षर गर्नुभयो, पछि गिजोल्न लाग्नुभयो।’ सन् २०१७ मा माओवादी केन्द्रका अध्यक्ष पुष्पकमल दाहाल ‘प्रचण्ड’को नेतृत्वमा सरकार हुँदा नेपाली कांग्रेसबाट परराष्ट्रमन्त्री रहेका प्रकाशशरण महतले बीआरआई सम्झौतामा हस्ताक्षर गरेका थिए।
ज्ञवालीले उक्त सम्झौतापछि ९ परियोजना नेपालले छानिसकेको भन्दै त्यसमा लगानीको ढाँचा भने अझैं टुंगिन बाँकी रहेको बताए। उनले भने, ‘बीआरआईमा ९ परियोजना छानेका छौँ, तर फन्डिङ मोडालिटीमा प्रवेश नै गरेका छैनौँ।’
यही बीआरआईमा सहमति नजुटेपछि प्रधानमन्त्री ओलीको चीन भ्रमणको संयोजनको जिम्मा पाएकी परराष्ट्र मन्त्री आरजु राणाको चीन भ्रमण समेत अन्योलमा परेको छ ।
