९ मंसिर , काठमाण्डौ।
शुक्रबार सत्तारुढ दल एमालेले काठमाडौंको दरबारमार्गमा जागरण अभियान गर्दैगर्दा फोहर गरेको भन्दै काठमाडौं महानगरपालिकाले एक लाख जरिवाना तोक्यो। महानगरकी उप–मेयर सुनिता डंगोलसमेत सहभागी एमालेको सभाका सहभागीहरूले सडक तथा पेटीहरूमा फोहोर गरेको भन्दै महानगरले एमालेलाई जरिवाना गरेको पत्र सार्वजनिक भयो।
तर एमालेले भने सो जरिवाना पत्र बुझ्न नै अस्वीकार गरेको छ । काठमाडौं महानगरपालिकाले तोकेको एक लाख जरिवानाको पत्र बुझ्न सत्तारुढ दल नेकपा एमालेले अस्वीकार गरेको हो । आइतबार जरिवानापत्र बुझाउन पार्टी कार्यालय पुगेको महानगरको टोलीलाई आफूहरू आयोजक नभएको भन्दै एमालेले पत्र बुझ्न अस्वीकार गरेको हो ।
पत्र लिएर पुगेको टोलीलाई एमालेले पत्र नबुझी फिर्ता गरेको हो । महानगरपालिकाले फोहरमैला व्यवस्थापन ऐन, २०६८ र काठमाडौं महानगरपालिकाको आर्थिक ऐन, २०८१ बमोजिम जरिवाना तोकिएको बताएको छ ।
एमालेले पत्र बुझ्न नमानेपछि महानगरको टोली फर्किएको छ । यसअघि दिएको पत्रमा एमालेले ‘रेस्पोन्स’ नगरेपछि बालेनले अर्को पत्र दिएर पठाएका हुन् । एमाले कार्यालयमा नगरप्रहरी सचिव महानगरका कर्मचारी पुगेका थिए ।
पत्रका बारेमा एमालेको तर्फबाट आधिकारिक जवाफ आएको छैन। नेताहरूले सामाजिक संजाल तथा मिडियाहरूबाट महानगरको जरिवाना नतिर्ने भन्दै आएका छन्। सामाजिक संजालमा महानगरको पत्र सार्वजनिक हुनासाथ पार्टीका महासचिव शंकर पोखरेलले महानगरका मेयर बालेन शाह एमालेविरुद्ध परिचालित भएको बताएका थिए ।
सामाजिक सञ्जाल फेसबुकमा लेख्दै उनले कार्यक्रम समापन पछि सङ्कलन गरिएको फोहोर उठाउन महानगरपालिकालाई गाडी पठाइदिन अनुरोध गर्दा त्यसको साटो फोहोर गरिएको भन्दै मेयरको निर्देशनमा जरिवानाको प्रचार गरिएको भनेका थिए।
मेयर बालेनको निर्देशनमा महानगरले एमालेलाई जरिवानाको पत्र काटेको भन्दै अहिले एमालेका नेताहरु रुष्ट छन्। एमाले उपमहासचिव प्रदीप ज्ञवालीले पनि यसलाई बालेनको पूर्वाग्रह नै देखिने तर्क गरे।
उनका अनुसार कार्यक्रममा स्वयम्सेवकहरुले आफैं सरसफाइ गरिरहँदा पनि कार्यक्रम नसकिँदै २ बजे नै पत्र लेख्नु त पूर्वाग्रह देखिन्छ। उता, पूर्वमन्त्रीसमेत भएका एमालेका नेता महेश बस्नेतले त मेयर बालेनले एमालेबाट १ लाख भिख मागेको आरोप लगाएका छन् ।
केन्द्रीय कार्यालय सचिव भिष्म अधिकारीले जरिवाना तिर्ने कुरा नभएको बताएका थिए । त्यसअघि एमाले प्रचार विभागका प्रमुख राजेन्द्र गौतमले पनि ‘औचित्यहीन चिर्कटो’ भन्दै आफूहरूले महानगरले तोकेको जरिवाना नतिर्ने बताएका थिए। म
हानगरको पत्रमा फोहोर मैला व्यवस्थापन ऐन २०६८ र काठमाडौँ महानगरपालिकाको आर्थिक ऐन २०८१ अनुसार सार्वजनिक स्थलमा कार्यक्रम गर्दा फोहोर तथा वातावरण प्रदूषण गराएको भन्दै एक लाख रुपैयाँ जरिवाना गरिएको उल्लेख छ।
पत्रमा नगर प्रहरी निरीक्षक लीलाराज गाछाले हस्ताक्षर गरेका छन्। खासगरी बालेन र एमाले अध्यक्ष तथा प्रधानमन्त्री केपी शर्मा ओलीबीचको टकराब पछिल्लो समय विभिन्न विषयमा सतहमा देखिँदै आएको छ।
ओली–बालेन दुरी लामै समयदेखि चलिआएको छ। ओलीले सुकुम्बासी बस्तीमा डोजर लगाउनु गलत भएको टिप्पणी गरेपछि बालेन र ओलीबीचको दूरी बढ्दै गएको छ ।
