१८ मंसिर, एजेन्सी ।
अमेरिकी सहायक विदेशमन्त्री डोनाल्ड लु नेपाल आउने भएका छन् । प्रधानमन्त्री केपी शर्मा ओली चीन भ्रमणमा रहेकै बेला लु नेपाल भ्रमणमा आउन लागेका हुन् । लुले दक्षिण एसियाका भारत, श्रीलङ्का र नेपालको भ्रमण आजबाट एक हप्तासम्म गर्ने अमेरिकी सरकारको स्टेट डिपार्टमेन्टले उल्लेख गरेको छ ।
उनी एमसीसी बहसका क्रममा यस अगाडि पनि पटक पटक नेपाल आइसकेका छन् । भारतबाट श्रीलङ्का अनि नेपाल भ्रमण गरेर यात्रा अन्त्य गर्ने बताइएको छ । नेपाली पक्षबाट भने भ्रमणको कुनै औपचारिक जानकारी सार्वजनिक भएको छैन ।
अमेरिकी राष्ट्रपति जो बाइडेनको सत्ताको अन्तिम समयमा लुको दक्षिण एसिया भ्रमण हुने भएको हो । आगामी जनवरी २० पछि बाइडेनको बहिर्गमन र ट्रम्पको आगमन हुँदैछ । लु ले आजदेखि १० डिसेम्बर सम्मको भ्रमणका लागि यी देशहरूमा आउन लागेका हुन् ।
उनी अमेरिकाको दक्षिण एवं मध्य एसिया मामिला हेर्ने सहायक विदेशमन्त्री हुन् । अमेरिकी विदेश मन्त्रालयका अनुसार लुले नेपालमा रहँदा शीर्ष नेता र युवा नेताहरूसँग भेटवार्ता पनि गर्नेछन् । भेटवार्ता पर्यावरण संरक्षण, महिला सशक्तीकरण, सांस्कृतिक संरक्षण र नेपालको समृद्धिमा सहयोग बढाउने विषयमा केन्द्रित हुने अमेरिकी विदेश मन्त्रालयले जनाएको छ ।
उनको यो भ्रमणले दक्षिण एसियाका साझेदार मुलुकसँगको सम्बन्ध मजबुत हुने र क्षेत्रीय समृद्धिका लागि बल पुग्ने अमेरिकाको विश्वास छ । लुले यसअघि पनि तीन पटक नेपालको भ्रमण गरिसकेका छन् । पछिल्लो पटक उनी गत वर्ष असार २९ गते पनि नेपाल आएका थिए ।
नेपालका प्रधानमन्त्री चीन भ्रमणमा रहेको र सो भ्रमणमा चिनियाँ परियोजना बेल्ट एण्ड रोड इनिसिएटिभ(बीआरआई) बारे पनि केही सम्झौता हुनसक्ने अनुमानका बीच अमेरिकी मन्त्रीको भ्रमण हुन लागेको हो ।
