२ पुष ,काठमाण्डौ।
दक्षिण प्रशान्त महासागरको भानुआटु तटमा मङ्गलबार ७ दशमलव ३ म्याग्निच्युडको भूकम्प गएको छ। युएसजीएसका अनुसार भूकम्पको केन्द्र भानुआटुको सबैभन्दा ठूलो सहर पोर्ट विलाबाट ३० किलोमिटर पश्चिममा ५७ किलोमिटर गहिराइमा रहेको थियो।
त्यसपछि सोही स्थान नजिकै ५ दशमलव५ म्याग्निच्युडको पराकम्प आएको थियो। भूकम्पले गर्दा भएको क्षतिको विवरण तत्काल स्पष्ट हुन नसकेको अन्तराष्ट्रिय संचारमाध्यामहरुले उल्लेख गरेका छन् ।
शक्तिशाली भूकम्पपछि भानुआटु सरकारको वेबसाइट बन्द भएको छ । प्रहरी र सार्वजनिक निकायका फोन नम्बरहरूले पनि काम गरिरहेका छैनन्। भूकम्पका कारण अहिलेसम्म कुनै क्षति भएको खबर आएको छैन।
यो भूकम्प भानुआटुका लागि ठूलो प्राकृतिक प्रकोप साबित हुन सक्ने आशंका गरिएको छ। डिजास्टर डेलीद्वारा सोसल मिडियामा पोस्ट गरिएको भिडियोमा ग्यारेजमा कारहरू हल्लाइरहेको देख्न सकिन्छ।
केही अन्य तस्बिरहरूले धेरै कूटनीतिक मिसनहरू र अन्य भवनहरूमा क्षति देखाएको छ। धेरै भवनका झ्यालका सिसाहरू चकनाचूर भएर केही घरहरू क्षतिग्रस्त भएको देखाइएको छ । युएसजिएसले भानुआटुका केही तटहरूमा सुनामीको चेतावनी जारी गरेको छ।
लहरहरू ज्वारको स्तरभन्दा ० दशमलव ३ मिटरदेखि १ मिटर सम्म पुग्न सक्ने चेतावनी दिइएको छ । युएसजीएसले पपुवा न्यू गिनी, फिजी र सोलोमन टापुहरू लगायत वरपरका धेरै प्रशान्त टापु राष्ट्रहरूका लागि ज्वारको स्तर भन्दा ० दशमलव ३ मिटर भन्दा कमको सुनामी छालहरूको चेतावनी जारी गरेको छ ।
यता प्रशान्त महासागरमा अवस्थित अस्ट्रेलिया र न्युजिल्यान्डका अधिकारीहरूले भने आफ्ना देशहरूमा सुनामीको कुनै खतरा नभएको पुष्टि गरेका छन्। भानुआटु ८० टापुहरूको समूह हो, जहाँ लगभग ३ लाख ३० हजार मानिसहरू बस्छन्।
टापुहरूको तल्लो भूभागले तिनीहरूलाई सुनामीको जोखिममा पार्ने गरेको छ । भानुआटु ज्वालामुखीय उत्पत्तिको देश हो। यहाँ सक्रिय ज्वालामुखीहरू, उष्णकटिबंधीय वर्षा वन, र सफा समुद्र तटहरू छन्।
संसदीय लोकतन्त्र रहेको यो देश सन् १९८० मा फ्रान्स र बेलायतबाट स्वतन्त्र भएको थियो । यहाँको मुख्य आयको स्रोत उद्योग कृषि, मत्स्यपालन, पर्यटन र विदेशी सहयोग रहेको छ भनेयहाँका
प्रमुख कृषि उत्पादनहरूमा नरिवल, कावा, कफी, कोको र फलफूल रहेका छन् ।
प्राकृतिक सुन्दरता, स्कूबा डाइभिङ र सांस्कृतिक अनुभवले पर्यटकलाई यहाँ आकर्षित गर्ने गरेको छ । जलवायु परिवर्तनले भानुआटुलाई गम्भीर रूपमा प्रभावित गरेको छ। समुद्रको सतह वृद्धि, चक्रवात र मौसमीय अनियमितताले यहाँको जीवन र अर्थतन्त्रलाई चुनौती दिएको छ।
भानुआटु जलवायु न्यायको पक्षमा विश्व मञ्चमा सक्रिय रूपमा आवाज उठाउने राष्ट्र हो। भूकम्पपछिको क्षणमा सञ्चारमा अवरोधले राहत र उद्धार गर्न गाह्रो बनाएको बताइएकोछ । अन्तर्राष्ट्रिय समुदायको नजर भानुआटुमा टिकेको छ ।
उनीहरुले सहयोगको हात बढाइरहेका छन् । न्युजिल्यान्डजस्ता छिमेकी देशहरू आफ्ना नागरिकहरूको सुरक्षाको बारेमा चिन्तित छन्। आगामी केही दिनमा स्थिति स्पष्ट भएपछि क्षतिको पूर्ण परिमाण मूल्याङ्कन गर्न सकिने बताइएको छ ।
