७ पुष ,विराटनगर।
प्रदेश राजधानी समेत रहेको विराटनगरका नगरवासीले आफूलाई सबैभन्दा सुरक्षित महसुस गर्ने गर्दछन् । यसको कारण भनेको चाँही यहाँ अन्य स्थानमा भन्दा प्रहरीको सुरक्षा व्यवस्था कडा रहन्छ भन्ने हो । तर विराटनगरमा घटेका पछिल्ला दुई घटनाले भने विराटनगरवासीलाई असुरक्षित भएको आवास गराएको छ ।
विराटनगरको एयरपोर्ट लाइनमा रहेको तृष्णा–द क्रेभिङ टेल्समा गएका एक युवकलाई मरणासन्न हुने गरी कुटेको भिडियो सार्वजनिक भएलगत्तै हिजो विराटनगरको मुटुमा रहेको बालाजी कपडा पसलमा गएर युवाहरुको अर्काे समूहले जथाभावी आक्रमण गरेको अर्काे भिडियो सामाजिक संजालमा भाइरल भइरहेको छ ।
यी दुई भाइरल बनेका भिडियोको बास्तविकता बारे जानकारी दिँदै मोरङ प्रहरीले भने दुवै भिडियो एकअर्का घटनासँग जोडिएको भन्दै अनुसन्धान अन्तिम चरणमा रहेको र त्याहा सम्लग्नहरुको खोजी भइरहेको बताएको छ ।
मोरङ प्रहरीका प्रवक्ता वेदप्रकाश जोशीका अनुशार अहिलेसम्म कुनै पक्षबाट पनि जाहेरी नपरेपनि शान्ति सुरक्षामा खलल पुर्याएको घटनामा सम्लग्नहरुको खोजी भइरहेको छ । तृष्णामा कुटिएका युवा पक्षको भनाइ अनुशार शुक्रबार राती तृष्णामा गएका रुस्तम उपे्रती, गोपाल दास र गौतम भगतले मादक पर्दाथ सेवन गरेपछि संचालकसँग विवाद भएको थियो ।
सोही विवाद बढ्दै गएपछि तृष्णाका संचालक मध्येका एक बालाजी कपडा पसलका संचालक समेत रहेका विजयले सुरुमा रुस्तममाथि झापड प्रहार गरेका थिए । त्यसलगत्तै विवादले उग्ररुप लिदा रुस्तममाथि तृष्णा बाहिरको खाली जग्गामा मरणासन्न हुने गरी कुटपिट भएको थियो ।
सो कुटपिटमा संचालक विजयसहित अमन साहले नेतृत्व गरेको उनीहरुको आरोप छ । आक्रमणबाट घाइते भएका रुस्तमको टाउकोमा ९ वटा टाका लगाइएको भनिएको छ । यस घटनाका सम्बन्धमा मोरङ प्रहरीमा जाहेरी दिन गएपनि आफूहरुको जाहेरी नलिई तृष्णा पक्षको मात्रै जाहेरी लिएको उनीहरुले दावी गरेका छन् ।
अर्काे तर्फ तृष्णाका संचालकमध्येका एक अमन साहले भने तृष्णामा आएर रुस्तमसहितका युवाहरुले अर्काे पक्षलाई धाकधम्की दिँदै विवाद गरेपछि आफूहरुले छुट्याएपनि विवाद बढ्दै गएपछि बाहिर सो घटना भएको देखिएको बताएका छन् ।
उनले आफूहरु होटल व्यवसाय संचालक रहेको र कुनैपनि ग्राहकलाई आफूहरुको तर्फबाट आक्रमण गर्ने विषयमा सोच्न समेत नसकिने बताएका छन् । विवाद बढ्दै गएपछि त्याहा रहेका बाउन्सरहरुबाट सम्झाउने प्रयास गर्दा पनि केही नलागेपछि सो घटना भएको हुन् सक्ने संचालक साहले बताएका छन् ।
त्याहा विवाद भएपछि आफूहरुले प्रहरीलाई खबर गरेपनि प्रहरी त्याहा नपुग्दै १ मिनेटको समयमा सो घटना भएको उनले बताएका छन् । यता घाइते भएका रुस्तम पक्षले भने विवाद भए प्रहरी बोलाएर कानूनी कारबाहीमा लैजानु पर्नेमा तृष्णाका सबै मिलेर कुटपिट गरिएको बताएका छन् ।
विवाद हुँदा सम्झाउनुको साटो बाउन्सरसहितबाटै आक्रमण हुनु दुखद् भएको बताएका छन् । शुक्रबारको यो घटनापछि शनिबार विराटनगरको ट्राफिक चोकमा रहेको बालाजी कपडा पसलमा दिनदहाडै केही युवाहरुको समूहले आक्रमण गरेको छ । सो आक्रमण तृष्णामा भएको घटनासँग जोडिएको प्रहरीले बताएको छ । सो आक्रमणमा सम्लग्न भएकाहरुको पनि खोजी भइरहेको मोरङ प्रहरीले बताएको छ ।
