२१ पुष , काठमाण्डौ।
पूर्वउपराष्ट्रपति नन्दबहादुर पुन औपचारिक रुपमै पार्टी नेकपा माओवादी केन्द्रको राजनीतिमा फर्किएका छन् । यसअघि स्थायी कमिटी बैठकमा पुगेका पुन आइतबारबाट शुरू भएको केन्द्रीय कमिटी बैठकमा उपाध्यक्षका हैसियतमा प्रचण्डसँगै बसेका छन् ।
बैठकमा मिलाइएको कुर्सी व्यवस्थापन अनुसार प्रचण्डपछिको वरीयतामा पुनलाई राखिएको छ । प्रचण्डको दायाँतिर पुन र बायाँतिर वरिष्ठ उपाध्यक्षमा नारायणकाजी श्रेष्ठ रहनेगरी आसन व्यवस्थापन गरिएको छ ।
राष्ट्रपति र उपराष्ट्रपति भएका व्यक्ति सक्रिय राजनीतिमा फर्किनेमा पुन पहिलो भएका छन् । नेपालमा हालसम्म रामवरण यादव र विद्यादेवी भण्डारी राष्ट्रपति र परमानन्द झा तथा नन्दबहादुर पुन उपराष्ट्रपतिबाट बिदा भएका छन् ।
विद्या भण्डारी पनि एमालेको राजनीतिमा फर्किने चर्चा चलिरहेका बेला माओवादीले पुनलाई पार्टीको जिम्मेवारीमा फर्काएको छ ।नन्दबहादुर पुन गणतन्त्र नेपालको दोस्रो उपराष्ट्रपतिसहित तत्कालीन एकीकृत नेकपा (माओवादी)का स्थायी समिति सदस्य एवम् पूर्व लडाकु कमाण्डर हुन् ।
उनी नेपाली कांग्रेसका उम्मेदवार अमियकुमार यादवलाई पराजित गर्दै उपराष्ट्रपतिमा निर्वाचित भएका थिए । मुलुकका पाँचवटा विशिष्ट पदमध्ये दोस्रो स्थानमा रहेको उपराष्ट्रपतिअहिले भने पार्टी राजनीतिमा फर्किएका छन् ।
नन्दकिशोर भनेर चिनिने ‘पासाङ’को वास्तविक नाम भने नन्दबहादुर पुन हो । पासाङ भने सशस्त्र सङ्घर्षले जन्माएको नाम हो । राङ्सी–९, रोल्पामा २०२२ कात्तिक ७ गते जन्मिएका उनी उहाँ पाँच भाइमध्ये माइलो हुन् ।
नँका तीन दिदीबहिनी श्रीमती र दुई छोरा रहेका छन् । पुनले तत्कालीन राङ्सी निमाविबाट २०३७ सालमा ७ कक्षा उत्तीर्ण गरेका थिए । उनले २०४२ सालमा एसएलसी उत्तीर्ण गरेका थिए। शान्ति प्रक्रियापछि अध्ययनलाई पुनः निरन्तरता दिँदै उनले राजनीतिशास्त्रमा स्नातक गरेका छन् ।
प्रवेशिका परीक्षा उत्तीर्ण भएपछि पुनले पार्टी कामको साथसाथै शिक्षण पेसा पनि अङ्गालेका थिए । २०४८ पछि पुन वाइसिएलको रोल्पा जिल्ला अध्यक्ष थिए । सशस्त्र सङ्घर्षअगावै स्थानीय प्रशासनले पुनको टाउकाको मूल्य ३५ हजार तोकेको थियो ।
उनी माओवादी सेनाको बटालियन कमिसार, बटालियन कमाण्डर, ब्रिगेड कमाण्डर, डिभिजन कमाण्डर, डिपुटी कमाण्डर र जनसेना प्रमुख सम्म बनेका थिए । उनी दुवै मिर्गौला ८० प्रतिशत काम नगर्ने अवस्थामा पुगेपछि केही समय थलिएका थिए ।
अहिले उनी स्वस्थ रहेका छन् । २०७० मा भएको दोस्रो संविधानसभा निर्वाचनमा उनी काठमाडौँ क्षेत्र नं ४ मा गगन थापासम्ग पराजित भएका थिए । नेकपा (माओवादी केन्द्र)को केन्द्रीय समिति बैठक आजदेखि सुरु भएको छ ।
धुम्बाराहीस्थित स्मार्ट दरबार ब्याङ्केटमा जारी बैठकमा माओवादी केन्द्रका अध्यक्ष पुष्पकमल दाहाल ‘प्रचण्ड’ले राजनीतिक तथा साङ्गठनिक प्रतिवेदन प्रस्तुत गर्नेछन् । ‘पार्टी रुपान्तरण र पुननिर्माणको सङ्कल्प ः आजको आवश्यकता’ शीर्षकको राजनीतिक प्रतिवेदनमाथि केन्द्रित रही बैठकमा छलफल हुने पार्टी उपाध्यक्ष एवं प्रवक्ता अग्निप्रसाद सापकोटाले जानकारी दिएका छन् ।
बैठकको प्रारम्भमा अध्यक्ष प्रचण्डले पछिल्लो राजनीतिक परिस्थितिका बारेमा ‘ब्रिफिङ’ गर्ने र लगत्तै उनीबाट प्रस्तुत प्रतिवेदनमाथि छलफल हुनेछ । उता नेकपा माओवादी केन्द्रका उपमहासचिव जनार्दन शर्माले उपाध्यक्ष तथा प्रवक्ता अग्नि सापकोटाले स्थायी कमिटीको निर्णय भनेर दिएको वक्तव्यप्रति आपत्ति जनाएका छन् ।
शर्माले सापकोटाको नाम नलिई कतिपय सञ्चार माध्यममा स्थायी कमिटीको निर्णय भनी आएको कुरामा आफ्नो ध्यानाकर्षण भएको जनाएका छन् । केन्द्रीय कमिटी बैठकका एजेण्डा तय गर्न शनिबार बसेको स्थायी कमिटी बैठकले अहिले विवाद र फरक मतका विषय बैठकमा नलगी अभियानमा एकताबद्ध भएर तलसम्म जाने निर्णय भएको सापकोटाले बताएका थिए ।
तर, शर्माले आइतबार सामाजिक संजालमार्फत सापकोटाको सो भनाइको खण्डन गरेका हुन् । गत स्थायी कमिटी बैठकमा कार्यविभाजन लगायत अध्यक्ष प्रचण्डको कार्यशैलीविरुद्ध लिखितरूपमा फरक मत राखेका शर्मा यसपटक पनि आफ्नो मत केन्द्रीय कमिटीमा छलफलका लागि लैजाने तयारीमा छन् ।
तर, शनिबारको स्थायी कमिटी बैठकले फरक मत र विवादका विषयमा यसपटक छलफल नगर्ने निर्णय भएको सापकोटाले बताएका थिए ।
