२६ पुष , काठमाण्डौ।
कास्कीको सूर्यदर्शन सहकारीको बचत रकम अपचलनमा धरौटमा रिहा भएका राष्ट्रिय स्वतन्त्र पार्टी (रास्वपा) सभापति रवि लामिछानेले अब काठमाडौँ जिल्ला अदालतमा हाजिर हुनु पर्नेछ । बिहीबार कास्की जिल्ला अदालतका न्यायाधीश नीतिज कुमार राईले मागेको ६५ लाख धरौटी बुझाएर लामिछाने रिहा भइसकेका छन् ।
उनी अब आफै काठमाडौंको स्वर्णलक्ष्मी सहकारीको वचत रकम अपचलनको अभियोगमा काठमाडौं अदालतमा दायर मुद्दाका लागि अदालतमा उपस्थित हुनेछन् । तर आज आज नै उनी काठमाडौं जिल्ला अदालतमा उपस्थित हुने सम्भावना न्यून बन्दै गएको छ ।
पोखराबाट काठमाडौं आउन हवाइजहाजको टिकट दिउँसो २ः१५ को मात्रै पाइएकाले उनी आजै अदालतमा उपस्थित हुने सम्भावना न्यून बन्दै गएको रास्वपा स्रोतले जनाएको छ । यसले गर्दा पूर्वउपप्रधान एवं पूर्वगृहमन्त्री लामिछाने आइतबार मात्रै अदालतमा हाजिर हुने सम्भावना बढी देखिएको छ ।
यसअघि उनी पोखराको हवाइजहाजको पहिलो फ्लाइटबाट आज बिहानै काठमाडौं आउने रास्वपाका कार्यवाहक प्रवक्ता मनीष झाले बताएका थिए । लामिछानेलाई कास्की प्रहरीको हिरासतबाट बिहीबार साँझ रिहा गरेर परिवारको जिम्मा लगाइएको थियो ।
अदालतबाट छुटेपछि प्रहरीले पोखराको फिस्टेल अस्पतालमा स्वास्थ्य परीक्षण गराएर लामिछानेलाई परिवारको जिम्मा लगाएको हो । अदालतको आदेशानुसार ६५ लाख रुपैयाँ धरौटी बुझाएर उनी रिहा भएका हुन् ।
उक्त मुद्दामा लामिछानेसँगै ६ जना प्रतिवादी धरौटी रकम बुझाएर रिहा भएका छन् । लामिछाने, छविलाल जोशी, लीला पछाईँ, रामबहादुर खनाल, कृष्णबहादुर गुरुङ र आरती गुरुङले धरौटी रकम बुझाएर रिहा भएको कास्की जिल्ला अदालतका श्रेस्तेदार राजन खनालले जानकारी दिए ।
लामिछाने गत कात्तिक २ गते काठमाडौंबाट पक्राउ परेका थिए । त्यसपछि उनलाई पोखरा लगिएको थियो । उनीविरुद्ध काठमाडौँ जिल्ला अदालतमा स्वर्णलक्ष्मी बचत तथा ऋण सहकारीको रकम अपचलन गरेको आरोपमा मुद्दा दर्ता भएको छ ।
स्वर्णलक्ष्मीको रकम अपचलन गरेको आरोपमा पक्राउ परेका लेखा समिति सदस्य सुनिता नेवा र ऋण उपसमिति सदस्य कमल लामा धरौटीमा रिहा भइसकेका छन् । स्वर्णलक्ष्मीमा रवि लामिछाने र पूर्व डीआईजी छविलाल जोशी सहित ३९ जनालाई प्रतिवादी कायम गरिएको छ ।
काठमाडौँ आएपछि अदालतमा उपस्थित भएर निवेदन दिनुपर्छ । निवेदन कानुन व्यवसायीमार्फत पनि दिन सकिन्छ । प्रतिवादीको निवेदन आएपछि मात्र इजलास तोकिने काठमाडौँ जिल्ला अदालतका श्रेस्तेदार रामु शर्माले बताएका छन ।
गोला प्रणालीबाट इजलास तोकिएपछि रवि लामिछानेसँग बयान लिइन्छ । बयान सकिएपछि थुनछेक बहस सुरु हुन्छ । बयान र थुनछेक पूरा नहुँदासम्म उनलाई अदालतले पुनः हिरासतमा पठाउन सक्नेछ। थुनछेक बहस पुरा भएपछि न्यायाधीशले उनलाई पुर्पक्षका लागि थुनामा पठाउने वा धरौटी लिएर छाड्ने भन्नेबारे आदेश गर्छन् ।
लामिछाने विरुद्ध चितवन, बुटवल र पर्सामा पनि सहकारीको रकम अपचलन गरेको कसुरमा अनुसन्धान भइरहेको छ । ती ३ वटा जिल्लाको मुद्दा अदालतमा दर्ता भएको छैन । चितवनमा सहारा बचत, पर्सामा सानो पाइला र बुटवलमा सुप्रिम सहकारीको रकम अपचलन गरेको कसुरमा लामिछनेसँग अनुसन्धान अधिकृतहरूले बयान लिइसकेका छन् ।
अब ती जिल्लामा समेत मुद्दा अदालतमा पुगे रविले ती जिल्ला अदालतमा पनि अन्य अदालतमा जस्तै बयान र थुनछेक बहसको प्रक्रियामा सहभागी हुनुपर्नेछ ।
