१७ माघ,एजेन्सी ।
अमेरिकी एअरलाइन्सको विमान राजधानी वासिङ्टन डीसीमा सेनाको हेलिकोप्टरसँग ठोक्किएको छ । आकस्मिक सेवाका कर्मचारी उद्धार कार्यमा जुटेका छन् । अहिलेसम्म डेढ दर्जन यात्रुको शव निकालिएको सीबीएस न्यूजले जनाएको छ ।
यसैबीच अमेरिकी राष्ट्रपति डोनाल्ड ट्रम्पले ट्रुथ सोसलमा यस घटनाको बारेमा बोलेका छन् । उनले हेलिकोप्टरले किन बाटो परिवर्तन नगरेको भन्दै प्रश्न गरेका छन् । उनले लेखेका छन्, “विमान विमानस्थलतर्फ जाँदै थियो । हेलिकोप्टर सिधै विमानतर्फ गइरहेको देखिन्छ । यो रात स्पष्ट थियो । विमानको बत्ती पनि बलिरहेको थियो ।
त्यसो हुँदा पनि हेलिकोप्टर किन घुमेन ? वा किन माथि या तल गएन ?” “यदि कन्ट्रोल टावरले विमान देखेको थियो भने किन हेलिकोप्टर चालक दललाई के गर्ने भनेर बताएन ? यो नराम्रो अवस्था हो । यस्तो हुनबाट रोक्नुपर्ने थियो । यो ठीक होइन ।” उनले भनेका छन् । यस्तै विज्ञहरुलेपनि
अमेरिकामा हवाइजहाज र हेलिकोप्टर ठोक्किएर भएको दुर्घटनामा आफूलाई अचम्मित बनाएको बताएका छन् । बीबीसीसँग कुरा गर्दै अमेरिकी उड्डयन सल्लाहकार जेफ्री थोमसले दुर्घटनाले आफूलाई अचम्मित बनाएको बताएका छन् ।
उनकाअनुसार अमेरिकामा संसारको सबैभन्दा सुरक्षित एयरलाइन प्रणाली छ । उनले भनेका छन्, ‘यस्ता टक्करहरू विगतको कुरा मानिन्थ्यो र नयाँ प्रविधिले विमानहरूलाई इलेक्ट्रोनिक रूपमा एकअर्कासँग कुरा गर्न सक्षम बनाएको छ, जसले पाइलटहरूलाई यस्ता आसन्न टक्करहरूको बारेमा चेतावनी दिन्छ।’
ट्राफिक कोलिजन एभोइडेन्स सिस्टम भनिने यस्तो प्रणालीले विगत केही दशकहरूमा हजारौंको ज्यान बचाएको उनको भनाइ छ । वासिङ्टन डिसी नजिकै अमेरिकी एयरलाइन्सको विमान अमेरिकी सेनाको ‘ब्ल्याक हक’ हेलिकप्टरसँग ठोक्किएर बिहीबार दुर्घटना भएको हो ।
विमानमा ६० जना यात्रु र चार जना चालक दलका सदस्यसहित ६४ जना सवार रहेका थिए । दुर्घटनामा उद्धारकार्य जारी रहेपनि जिवितै भेटिने संभावना क्रमश कम हुँदै गएको उद्धार अधिकारीहरुले बताएको अमेरिकी संचारमाध्यामहरुले उल्लेख गरेका छन् । अमेरिकामा यसअघि पनि भयानक विमानदुर्घटनाहरु भएका छन् ।
फेब्रुअरी १२, २००९ ः न्युयोर्कबाट सानो सहर बफेलोतर्फ उडेको कोलगन एयर बोम्बार्डियर विमान दुर्घटनाग्रस्त भएको थियो । जसमा सवार ४९ यात्रुहरूको ज्यान गएको थियो ।१५ जनवरी, २००९ः १५० जनाभन्दा बढी मानिस बोकेको युएस एयरवेजको एयरबस ए ३२० चराहरूको झुण्डसँग ठोक्किएको थियो ।तर विमानलाई सहज रुपमा न्युयोर्कको हडसन नदीमा अवतरण गराइएको थियो ।
अगस्ट २७,२००६ः एक क्षेत्रीय यातायात विमानले तोकिएको रनवेको सट्टा लेक्सिङ्टन एयरपोर्टमा गलत, अनलिट रनवे प्रयोग गरेको थियो । केन्टकीबाट उडान भरेको केही समयपछि दुर्घटनाग्रस्त भयो, जसमा सवार करिब ५० जनाको मृत्यु भएको थियो ।
डिसेम्बर १९,२००५ः मियामी र बहामासको एक टापुलाई जोड्ने ओसन एयरवेजद्वारा सञ्चालित ग्रुम्यान जी–७३टी मल्लार्ड हाइड्रा ेप्लेन टेकअफको केही समयपछि समुद्रमा दुर्घटनाग्रस्त भएको थियो । जसमा चालक दलका सदस्य र १८ यात्रु मारिएका थिए ।
अक्टोबर १९,२००४ः खराब मौसमका कारण किक्र्सभिल, मिसौरी नजिकै अमेरिकन कनेक्सनद्वारा सञ्चालित बीएई जेटस्ट्रीम ३२ दुर्घटनाग्रस्त भएको थियो । जहाजका दुवै पाइलट र १३ यात्रुमध्ये ११ जनाको मृत्यु भएको थियो ।
जनवरी ८,२००३ः युएस एयरवेज बीचक्राफ्ट १९००, उत्तरी क्यारोलिनाको शार्लोट र दक्षिण क्यारोलिनाको ग्रीनभिलको बिचमा टेकअफको केही समयपछि ह्याङ्गरमा दुर्घटनाग्रस्त भएको थियो । दुवै पाइलट र जहाजमा सवार १९ यात्रु मारिएका थिए ।
नोभेम्बर १२,२००१ः सेप्टेम्बर ११ को आक्रमणको दुई महिना पछि, न्यूयोर्कबाट सेन्ट–डोमिन्ग्यु उडान गर्ने अमेरिकन एयरलाइन्सको एयरबस ए–३००, जेएफके विमानस्थलबाट उडान भरेको केही समयपछि दुर्घटनाग्रस्त भएको थियो । जहाँ २५१ जना यात्रु र नौ जना चालक दलका सदस्य मारिएका थिए । दुर्घटनाका कारण जमिनमा, धेरै घरहरू ध्वस्त भएका थिए जहाँ पाँच स्थानीयबासिन्दाहरूको मृत्यु भएको थियो ।
जनवरी १३,१९८२ः एयर फ्लोरिडा बोइङ ७३७–२२२ एक हिउँको आँधीको समयमा टेकअफ पछि नदीमा दुर्घटनाग्रस्त हुनु अघि पोटोम्याक माथि पुलमा ठोक्किएको थियो । दुर्घटनामा ७८ जना यात्रुसहित पुलमा रहेका ४ जना मोटरसाइकल चालकको ज्यान गएको थियो ।
