२२ माघ ,एजेन्सी ।
अमेरिकी राष्ट्रपति डोनाल्ड ट्रम्प छिमेकीहरु क्यानाडा र मेक्सिकोविरुद्ध घोषित ट्यारिफ प्रस्तावबाट पछि हटेका छन् । उनले मेक्सिको र क्यानडामा लगाएको कर तत्कालका लागि रोकेका छन् । मेक्सिको र क्यानडाले सीमा सुरक्षा सुधार गर्न र लागूपदार्थ तस्करी नियन्त्रण गर्न सहमति जनाएपछि अमेरिकाका राष्ट्रपति डोनाल्ड ट्रम्प तत्कालका लागि पछि हटेका हुन् ।
यससँगै मेक्सिकन र क्यानेडियन नेताहरूले लागूऔषध तस्करी र अवैध आप्रवासनविरुद्ध लड्न अमेरिकासँगको आफ्नो सिमानामा हजारौं प्रहरी पठाउने भएका छन् । यसअघि अमेरिकी राष्ट्रपति ट्रम्पले क्यानडा र मेक्सिकोमा प्रस्ताव गरेको २५ प्रतिशत कर मंगलबारदेखि लागू हुने तय भएको थियो ।
क्यानाडा र मेक्सिको दुबै अमेरिकाको सबैभन्दा ठूला व्यापारिक साझेदार मानिन्छन् । ट्रम्प आफ्नो योजनामा अडिग रहेका खण्डमा यी दुबै मुलुकले समेत जवाफी आर्थिक व्ययभारको उपाय अवलम्बन गर्ने घोषणा गरेका थिए ।
ट्रम्पसँगको सम्झौता अनुसार क्यानाडाले विशेष जाँचकी नियुक्त गर्ने र मेक्सिकोले दश हजार सैनिक सीमामा पठाउनेछ । उता, डेमोक्र्याटहरुले ट्रम्प प्रशासनका गतिविधिलाई लिएर कडा टिप्पणी गरेका छन् ।
उनीहरुले ट्रम्प अमेरिकी सहायता एजेन्सी बन्द गर्न तथा युनाइटेड स्टेट्स एजेन्सी फर इन्टरनेशनल डेभ्लपमेन्ट (युएसएआईडी)लाई अमेरिकी विदेश विभागमा विलय गराउन उद्दत रहेको टिप्पणी गरेका हुन् ।
क्यानाडा र मेक्सिकोमाथि ट्यारिफ लगाउने प्रस्तावको समेत उनीहरुले विरोध गरेका थिए । यसैबीच, विश्व स्वास्थ्य संगठन डब्ल्यूएचओबाट अमेरिका बाहिरिएपछि विश्वभर सञ्चालित स्वास्थ्य आपतकालीन कार्यक्रम जोखिममा परेका छन् ।
डब्ल्यूएचओको बैठकमा प्रस्तुत गरिएको एक दस्तावेजले अमेरिका पुनः डब्लूएचओमा सामेल नभए मध्य पूर्व, युक्रेन र सुडानमा सञ्चालित पोलियो र एचआईभी कार्यक्रम बन्द हुने सक्ने जनाइएको छ ।
स्वास्थ्य आपतकालीन कार्यक्रमका लागि डब्लूएचओ अमेरिकामा निर्भर देखिएको छ । यता दक्षिण अफ्रिकाका राष्ट्रपति सिरिल रामाफोसाले सहयोग कटौती गर्ने अमेरिकी राष्ट्रपति डोनाल्ड ट्रम्पको चेतावनीको जवाफ दिएका छन् ।
उनले दक्षिण अफ्रिकाले अमेरिकी मुलका केही मानिसलाई नराम्रो व्यवहार गरेर मानव अधिकार उल्लङ्घन गरिरहेको भन्ने ट्रम्पको आरोपलाई अस्वीकार गरेका छन् । दक्षिण अफ्रिकामा गोरा किसानको सामूहिक हत्या र जग्गा कब्जा भइरहेको ट्रम्पको दाबीलाई राष्ट्रपति सिरिलले खण्डन गरेका छन् ।
सिरिलले सामाजिक सञ्जाल एक्समा दक्षिण अफ्रिका लोकतन्त्रिक देश रहेको र कानूनको शासन, न्याय र समानता रहेको भन्दै भूमि सुधार नीति र द्विपक्षीय हितका मुद्दाहरूमा ट्रम्प प्रशासनसँग मिलेर काम गर्न तत्पर रहेको उल्लेख गरेका छन् ।
उनले अमेरिका एक प्रमुख रणनीतिक राजनीतिक र व्यापार साझेदार भएको बेला मुख्य रुपमा एचआईभी÷एड्स राहत कार्यक्रमबाहेक दक्षिण अफ्रिकालाई महत्त्वपूर्ण रकम सहायता उपलब्ध नगराएको दाबी गरेको पनि खबरमा उल्लेख छ ।
यसअघि हिजो अमेरिकी राष्ट्रपति ट्रम्पले दक्षिण अफ्रिकामा गोरा किसानहरूको कथित सामूहिक हत्या र जग्गा कब्जाको पूर्ण अनुसन्धान नभएसम्म अमेरिकी कोषबाट हुँदै आएका र भविष्यमा हुने सबै सहायता कटौती गर्ने चेतानवी दिएका थिए ।
