२९ माघ , काठमाण्डौ।
नेपाली कांग्रेसको १४ औँ महाधिवेशनमा सभापति र महामन्त्रीका लागि एउटै समूह बनाएर लडेका शेखर कोइराला र गगन थापाबीच समूहको नेतृत्वको विषयलाई लिएर भाँडभैलो मच्चिएको छ । महामन्त्री गगन थापाको समूह परिवर्तनलाई लिएर सर्वत्र चासो बढी रहेका बेला कुनै स्थानमा बसेर रेकर्ड गराएको एउटा भिडियोमा गगनले समूह परिवर्तनका बारेमा मुख खोलेका छन्।
शेखरसमूहबाटै महामन्त्रीमा विजयी भएका गगन शेखर समूह छाडेर देउवा समूहतर्फ ढल्किएको आशंका भइरहेका बेला गगनले आफूले समूह नछाडेको भन्दै शेखर नै आफ्नो समूहका आएको बताएका छन् ।
सार्वजनिक भिडियोमा उनले भनेका छन्, ‘१४ औँ महाधिवेशनमा डाक्टर शेखर कोइराला सभापतिमा र महामन्त्रीमा लडेको हो । म त्यो समूहको केन्द्र हो । म अर्को कुनै समूहबाट आएको हैन। त्यो मैले बनाएको समूह हो । १४ औँ महाधिवेशनमा म सबै सभापतिकाउम्मेदवारहरुको महामन्त्रीको उम्मेदवार हो । फेरी १४ महाधिवेशनमा कुनै सभापतिले मलाई छानेको हैन् मैले छानेको हो । त्यसैले १४ औँ महाधिवेशनको समूह भनेको मेरो समूह हो भन्दै गगनले थपेका छन्, समूह मैले बदल्ने हैन,अरू कसैले बदल्ने हो । म त जहा छु त्यही छु । कोही नयाँ साथी जोडिँदै जाने कुरा भयो । त्यसैले मैले बनाएको समूह हो । त्यो मेरो समूह हो । कोही त्यस भित्र रहने कि नरहने त्यो उहाँका निजी कुरा भए । म पार्टीको महामन्त्री भएकाले सिङ्गो जिम्मेवारी छ । त्यो जिम्मेवारी निर्वाह गर्ने कोसिसमा छु । मैले आफ्नो कोसिस गर्ने नै भए । १५ औँ महाधिवेशनका बारेमा मैले सोचेको छैन । मेरो जिम्मेवारीमा रहेको सदस्यताको कुरा टुङ्गो लगाएपछि मात्र गर्ने कुरा भयो । यस पटक अधिवेशनको ६ महिना अघि सदस्यको विवाद टुङ्गो लगाई सक्ने प्रयास छ । पहिलाको जस्तो सदस्यको विवाद महाधिवेशनमा नदेखाऊ भन्ने हो । त्यो सकिएपछि १५ औँ महाधिवेशनमा कोको मिलेर गर्ने त्यही बेला छलफल गरौँला ।
नेपाली काँग्रेसको १३ औँ महाधिवेशनमा कृष्णप्रसाद सिटौला समूहबाट महामन्त्री पदमा उम्मेदवार बनेका गगन थापा १४ महाधिवेशनमा आइ पुग्दा शेखर कोइराला समूहबाट महामन्त्री पदको उम्मेदवार बने ।
१३ औँ महाधिवेशनको हारको बदला लिँदै अत्यधिक मत सहित महामन्त्री त बने तर उनको समूहका शेखरले भने सभापतिमा शेरबहादुरसँग हार व्यहोर्नु प¥यो । उनले दलको नेतामा देउवासँग प्रतिस्पर्धा गर्दैगर्दा पनि शेखरलाई सभापतिका रुपमा अघि सार्ने समझदारी गरेका थिए ।
तर रात रह्यो अग्राख पलायो भनेजस्तै गगनको लक्ष्य १५ औँ महाधिवेशनमा सभापति पदको उम्मेदवार बन्ने छ । शेखर समूहबाट सभापति पदमा उम्मेदवार बन्न नपाउने पक्का भए सँगै गगन शेरबहादुर देउवाको शरणमा गएका हुन भन्नेहरु पनि उत्तिकै छन् भने उनी छुट्टै समूह बनाएर चुनावी मैदानमा आउँछन् भन्नेहरूको संख्या पनि धेरै छ ।
यस्ता अनुमानहरुका बीचमा गगनले आफूले समूह नछाडेको र छाड्नै परे आफ्नो समूहमा आएकाहरुले छाड्नु पर्ने भन्दै शेखर कोइराला र उनको भनिएको समूहका नेताहरुका लागि आफ्नो अर्जुनदृष्टि सभापति रहेको र शेखरको साथमा नरहेको सन्देश दिएका छन् ।
