३० माघ , एजेन्सी ।
स्पेनिस क्लब रियल मड्रिडले इङ्ग्लिस क्लब म्यानचेस्टर सिटीमाथि च्याम्पियन्स लिग प्लेअफको पहिलो लेगमा रोमाञ्चक जित निकालेको छ । रियलले बुधवार सिटीमाथि ३–२ को जित निकालेको हो । दुई पटक खेलमा पछि परेर पनि रियल नतिजा उल्टाउन सफल भयो ।
खेलको १९ मिनेटमा हालान्डको गोलबाट सिटीले खेलमा अग्रता लियो । ६० मिनेटमा रियलका लागि केलियन एमबाप्पेले बराबरी गोल फर्काउन सफल भए । फेरि ८० मिनेटमा हालान्डले नै पेनाल्टीबाट गोल गर्दा सिटीले २–१ को अग्रता लियो ।
तर रियलले ८६ मिनेटमा डियाजको गोलबाट बराबरी गर्न सफल भयो । रियलले रोमाञ्चक जित निकाल्ने क्रममा दोस्रो हाफको इन्जुरी समयमा गोल ग¥यो । उसका लागि बेलिङघमले ९०+२ मिनेटमा गोल गरेका थिए ।
यसले के देखाउँछ भने, रियल मड्रिडका स्टारहरू कहिल्यै हार मान्दैनन् । तर, म्यानचेस्टर सिटीले भने बारम्बार उही गल्ती दोहो¥याइरहेको हुन्छ । सिटीले सुरुआती अग्रता लिए पनि अन्तिमतिर पुगेर गोल खाएको यो पहिलो खेल होइन ।
च्याम्पियन्स लिगमा यो सिजन मात्र सिटीले खेलको अन्तिम १५ मिनेटमा सात गोल खाएको छ, जुन चिन्ताजनक तथ्यांक हो । ‘हामीले खेललाई राम्रोसँग सम्हाल्न आवश्यक छ,’ सिटीका डिफेन्डर जोन स्टोन्सले भने, ‘यो नतिजा अहिले सकारात्मक देखिँदैन । तर, हामीले मनोबल उच्च राख्नुपर्छ।’
प्लेअफको दोस्रो लेग अब फेब्रुअरी १९ मा रियलको मैदानमा हुनेछ । अर्को खेलमा पेरिस सेन्ट–जर्मेन (पिएसजी) ले ब्रेस्टलाई ३–० ले हराउँदै अर्को चरणमा जाने सम्भावना बलियो बनाएको छ । ब्रेस्टको घरेलु मैदानमा भएको खेलमा पिएसजीको जितमा ओस्मान डेम्बेलेले २ र भिटिन्हाले १ गोल गरे ।
भिटिन्हाले २१औं मिनेटमा पेनाल्टीमार्फत गोल गर्दै टोलीलाई जिताएका थिए । डेम्बेलेले खेलको ४५औं र ६६औं मिनेटमा गोल गरेका थिए । अब दोस्रो लेग पिएसजीको घरेलु मैदानमा फेब्रुअरी २० मा हुनेछ । यस्तै युभेन्टसले डच क्लब पिएसभीलाई पराजित गरेको छ ।
घरेलु मैदानमा भएको खेलमा युभेन्टस २–१ ले विजयी भयो । दुई टोली बीचको दोस्रो लेगको खेल फेब्रुअरी २० मा हुनेछ । अर्को खेलमा जर्मन क्लब बोरुसिया डर्टमुन्डले पोर्चुगलको क्लब स्पोर्टिङ लिस्बनलाई पराजित गरेको छ । स्पोर्टिङको घरेलु मैदानमा भएको खेलमा डर्टमुन्ड ३–० ले विजयी भएको हो । दुईबीचको दोस्रो लेगको १९ फेब्रअरीमा डर्टमुन्टको मैदानमा हुनेछ ।
