११ फागुन , काठमाण्डौ।
काठमाडौंमा जारी इन्टरनेसनल वुमेन्स च्याम्पियनसिपमा आज नेपालले म्यानमारलाई चुनौती प्रस्तुत गर्दैछ । त्रिपुरेश्वरस्थित दशरथ रंगशालामा हुने यो खेल साँझ ६ बजे सुरु हुनेछ । सिंगल लिगमा भइरहेको प्रतियोगितामा यी दुई टोली अपराजित रहँदै एक खेलअगाबै फाइनलमा प्रवेश गरिसकेका छन् ।
नेपालले किर्गिस्तान र लेबनानलाई समान १–० ले पराजित गरेको थियो । म्यानमारले भने लेबनानलाई ३–१ र किर्गिस्तानलाई ५–० ले पराजित गर्दै फाइनलमा स्थान बनाएको हो । त्यसैले आजको खेल यी दुई टोलीका लागि फागुन १४ गते हुने उपाधि भिडन्तका लागि ‘रिहर्सल’ खेल मात्रै हुनेछ ।
नेपाल र म्यानमार तेस्रोपल्ट भिड्न लागेका हुन् । म्यानमारलाई भने नेपालले अहिलेसम्म पराजित गर्न सकेको छैन । आजको खेलमा दुवैलाई फाइनलअघि एकअर्काका बलियो र कमजोर पक्ष थाहा पाउने मौका हुनेछ ।
उसो त अहिलेसम्मको नतिजाले नेपालभन्दा म्यानमार बलियो देखाएको छ । फिफा वरीयतामा पनि नेपालभन्दा म्यानमार बलियो टोली हो । नेपाल फिफा वरीयतामा १०३औं स्थानमा छ भने म्यानमार ५५औं स्थानमा छ ।
नेपाल र म्यानमारबीच सन् २०१८ मा पहिलो पटक प्रतिस्पर्धा भएको थियो । सन् २०२२ को टोकियो ओलम्पिक्सको छनोट खेल खेल्न नेपाल म्यानमार गएको थियो । सो खेल एक एक गोलको बराबरीमा सकियो ।
नेपालले तेस्रो मिनेटमा सावित्रा भण्डारी साम्बाको पेनाल्टी गोलबाट अग्रता लिए पनि म्यानमारले १४ मिनेटमा बराबरी गोल फर्कायो । सन् २०१९ मा भारतमा भएको हिरो महिला गोल्डकपमा नेपाल र म्यानमारले दुई पटक प्रतिस्पर्धा गरे ।
दुवै खेलमा नेपालले हार ब्यहो¥यो । लिग चरणमा नेपालमाथि म्यानमारले ३–० गोलको जित निकालेको थियो । यद्यपी नेपालले इरान र भारतलाई पराजित गर्दै फाइनलमा स्थान बनाएको थियो । तर फाइनलमा म्यानमारसँग भिड्दा नेपाल फेरि पराजित भएको थियो ।
सोबेला नेपालमाथि म्यानमारले फाइनलमा ३–१ गोलको जित निकालेका थियो । नेपालका लागि मन्जलीकुमारी योन्जनले पहिलो हाफको इन्जुरी समयमा बराबरी गोल फर्काए पनि म्यानमारले दोस्रो हाफमा दुई गोल गरेको थियो ।
म्यानमारले तीन खेलमा नेपालविरूद्ध ७ गोल गरेको छ भने नेपालले २ गोल गर्न सफल भएको छ । लिग चरणको आज हुने अन्तिम खेल अघि दिउँसो २ बजे लेबनान र कीर्गिस्तानले खेल्दैछन् । लेबनान र कीर्गिस्तान उपाधि होडबाट बाहिरीसकेका छन् । नेपाल र म्यानमारबीचको फाइनल खेल बुधवार हुनेछ ।
