१२ फागुन, काठमाण्डौ ।
च्याम्पियन्स ट्रफीमा पाकिस्तानलाई हराउँदै भारतले लगातार दोस्रो जीत हासिल गरेको छ । हिजो भएको खेलमा भारतले पाकिस्तानलाई ६ विकेटले पराजित गरेको हो । पाकिस्तानले दिएको २ सय ४२ रनको लक्ष्य भारतले ४२ ओभर ३ बलमा ४ विकेट गुमाएर पूरा ग¥यो ।
भारतको जितमा विराट कोहलीले नट आउट रहँदै सर्वाधिक १ सय रन जोडे । पाकिस्तानका लागि शाहिन शाह अफ्रिदीले २ तथा अबरार अहमद र खुसदिल साहले समान १ विकेट लिए । त्यसअघि दुबई अन्तर्राष्ट्रिय क्रिकेट स्टेडियममा टस जितेर पहिले ब्याटिङ गरेको पाकिस्तान ४९ ओभर ४ बलमा २ सय ४१ रनमा समेटियो ।
पाकिस्तानका लागि सउद सकिलले सर्वाधिक ६२ रन जोडे । भारतका लागि कुलदिप यादवले ३, हार्दिक पाण्ड्याले २ तथा हर्षित राना, अक्षर पटेल र रविन्द्र जडेजाले समान १ विकेट लिए । भारतले पाकिस्तान जान अस्विकार गरेपछि उसको सबै खेल यूएईमा भइरहेको छ ।
यसअघि भारतले बङ्गलादेशलाई पनि ६ विकेटले पराजित गरेको थियो । च्याम्पियन्स ट्रफीमा भारत दुई खेलमा अपराजित रहँदै ४ अङ्कका साथ समूह ‘ए’ को शीर्ष स्थानमा छ । पाकिस्तान २ खेलमा अङ्कविहीन रहँदै समूह ‘ए’ को पुछारमा छ ।
पहिलो खेलमा न्युजिल्याण्डसँग फराकिलो अन्तरले पराजित भएको पाकिस्तान अर्को हारसँगै प्रतियोगिताबाट बाहिरिने संघारमा पुगेको हो । भारत भने सेमिफाइनल नजिक पुगेको छ । यसबीच हिजो भएको खेलमा भारतीय क्रिकेट टोलीका पूर्व कप्तान विराट कोहलीले महान् क्रिकेटर सचिन तेन्दुल्करको कीर्तिमान तोडे ।
उनले सबैभन्दा कम इनिङमा १४ हजार ओडिआई रन बनाउने सचिनको कीर्तिमान तोडेका हुन् । कोहलीले २ सय ८७ इनिङमा १४ हजार रन पूरा गर्ने कीर्तिमान बनाएका हुन् । यसअघि सचिनले ३ सय ५० इनिङमा १४ हजार ओडिआई रन बनाई कीर्तिमान बनाएका थिए ।
कोहलीले सचिनले भन्दा ६३ इनिङ कममा १४ हजार रन बनाएका हुन् । कोहली एकदिवसीय क्रिकेटमा १४ हजार रन बनाउने तेस्रो ब्याट्सम्यान बनेका छन् । कोहली अघि भारतका सचिन र श्रीलंकाका कुमार संगाकारा ओडिआई क्रिकेटमा १४ हजार रन बनाएका थिए ।
समग्रमा कोहली ओडिआई क्रिकेटमा सर्वाधिक रन बनाउने खेलाडीको सूचीमा तेस्रो स्थानमा छन् । भारतका सचिन १८ हजार ४ सय २६ रनका साथ शीर्ष स्थानमा छन् । श्रीलंकाका संगाकारा १४ हजार २ सय ३४ रनको साथ दोस्रो स्थानमा छन् ।
कोहलीको नाममा ओडिआई क्रिकेटमा सर्वाधिक शतक बनाउने कीतिमान पनि छ । विराट हालसम्म ओडिआई क्रिकेटमा ५१ शतक प्रहार गरिसकेका छन् । उनले सन् २०२३ को ओडिआई विश्व कपमा सचिनको ४९ शतकको कीर्तिमान तोडेका थिए ।
पाकिस्तानविरुद्धको खेलमा कोहलीले ओडिआई क्रिकेटमा भारतका लागि फिल्डरका रुपमा सर्वाधिक क्याच लिने कीर्तिमान समेत बनाएका थिए । पाकिस्तानविरुद्धको सबै आईसीसी प्रतियोगितामा प्लेयर अफ दि म्याच अवार्ड जित्ने विराट एकमात्र खेलाडी हुन् ।
विराटले एकदिवसीय विश्वकपमा १, टी २० विश्वकपमा ३ र च्याम्पियन्स ट्रफीमा १ प्लेयर अफ दि अवार्ड जितेका छन् । उनले एसिया कपमा पाकिस्तानविरुद्ध पनि यो पुरस्कार जितेका छन् । यस्तै कप्तान रोहितले एकदिवसीयमा ओपनरको रुपमा सबैभन्दा छिटो ९ हजार रन बनाए ।
यता भारतीय टोलीले एकदिवसीयमा लगातार १२ औं पटक टस हार्यो । कुलदीप यादवले अन्तर्राष्ट्रिय क्रिकेटमा ३०० विकेट पूरा गरे । उनले सलमान आगालाई रवीन्द्र जडेजाको हातबाट क्याच गराएर यो उपब्धि हासिल गरे ।
कुलदीपले पाकिस्तानविरुद्ध खेलेका ६ खेलमा १५ विकेट लिएका छन् । हार्दिक पाण्ड्याले अन्तर्राष्ट्रिय क्रिकेटमा २०० विकेट पूरा गरेका छन् । हार्दिक साउद शकीललाई आउट गरेर यो रेकडै आफ्नो नाममा बनाएका हुन् ।
उनले हिजो २ विकेट लिए । उनले बाबर आजमलाई पनि आउट गरे । प्रतियोगितामा आज बङ्गलादेश र न्युजिल्याण्ड खेल्दैछन् । पाकिस्तानको रावलपिन्डिमा हुने खेल दिउँसो पौने ३ बज शुरू हुनेछ ।
