काठमाडौँ,असोज १५
भुटानमा जारी साफ यू–१८ महिला च्याम्पियनसिपमा नेपाल एक खेल अगावै को सेमिफाइनलमा स्थान सुरक्षित गरेको छ ।
आइतबार साँझ बंगलादेशले पाकिस्तानमाथि १७–० को फराकिलो जित दर्ता गरेपछि नेपाल एक खेल अगावै अन्तिम चारमा पुग्न सफल भएको हो ।
पाकिस्तानमाथिको फराकिलो जितमा बंगलादेशकी सिरत जाहान सोप्नाले दोहोरो ह्याट्रिकसहित ७ गोल गरिन् । मार्जियाले ह्याट्रिक पुरा गरिन् । सिउली अजिमले दुई तथा मिस्रात, अखि खातुन, कृष्णा रानी सरकार र तोहुरा खातुनले समान १ गोल गरिन ।
लगातार दोस्रो हारसँगै पाकिस्तान समूह चरणबाटै बाहिरिए पछि नेपालले सेमिफाइनलमा स्थान सुरक्षित गरेको हो ।
नेपालले पाकिस्तानलाई १२–० को फराकिलो जित निकाल्दै विजयी शुरुवात गरेको थियो । नेपालको जितमा रेखा पौडेलले दोहोरो ह्याट्रिक पुरा गरेकी थिइन् ।
अब नेपाल र बंगलादेशबीच समूह विजेताको रुपमा प्रतिस्पर्धा हुनेछ । नेपाल र बंगलादेशबीच मंगलबार खेल हुनेछ । उक्त खेलमा जित हात पारे नेपाल समूह विजेताको रुपमा अघि बढ्नेछ ।बंगलादेश गोल अन्तरमा नेपाल भन्दा अघि छ ।
