१३ फागुन, एजेन्सी ।
विज्ञान र प्रविधिले मानव सभ्यतालाई सधैं अगाडि बढाइरहेको छ, हाम्रा कल्पनाहरूलाई यथार्थमा परिणत गर्ने प्रयास निरन्तर भइरहेको छ । यसैक्रममा, हालसालै अमेरिकास्थित स्टार्टअप कम्पनी एलेफ एरोनटिक्सले विज्ञान–कथामा मात्र देखिने उड्ने कार वास्तविकतामा बदल्ने ऐतिहासिक सफलता प्राप्त गरेको छ।
कम्पनीले आफ्नो मोडेल जिरो नामक उड्ने कारको सफल परीक्षण गर्दै भविष्यको यातायात प्रणालीको नयाँ युगको सुरुवात गरेको छ। एलेफ एरोनटिक्सले सार्वजनिक गरेको भिडियोमा मोडेल जिरो उड्ने कारलाई क्यालिफोर्नियाको एक सडकमा पार्क गरिएको गाडीमाथि उड्न सफल भइरहेको देख्न सकिन्छ।
कम्पनीका प्रमुख कार्यकारी अधिकृत जिम डुखोभ्नीका अनुसार, यो परीक्षण केवल प्रविधिको प्रगति मात्र नभएर मानव यातायात प्रणालीको विकासमा कोसेढुंगा सावित हुनेछ। उनले भनेका छन्, “यो क्षण राइट ब्रदर्सको पहिलो उडानजस्तै ऐतिहासिक बन्न सक्छ। हामी प्रमाणित गर्न चाहन्छौं कि अब नयाँ ढंगले यात्रा गर्न सम्भव छ।“
हालसम्मका धेरैजसो उड्ने कारहरू ठूलो ड्रोन जस्तै डिजाइनमा निर्माण गरिएका छन्, जसमा बाहिर खुल्ला रूपमा रोटर ब्लेडहरू रहने गर्छन्। केहीमा पखेटा फोल्ड गरेर खोल्नुपर्ने प्रविधि अपनाइएको छ, जसले उडान भर्न पर्याप्त खुला ठाउँ आवश्यक हुन्छ। तर, एलेफ एरोनटिक्सको मोडेल जिरो यी सबैभन्दा भिन्न छ।
यसको डिजाइन साधारण कार जस्तै देखिन्छ, जसमा उडानका लागि आवश्यक रोटर ब्लेडहरू चेसिसभित्र लुकेको छन्। पूर्ण रूपमा इलेक्ट्रिक उड्ने कारका रूपमा विकसित गरिएको मोडेल जिरो ३२० किलोमिटरसम्म साधारण सडकमा गुड्न सक्छ भने आकाशमा १६० किलोमिटरसम्म उडान भर्न सक्छ।
एलेफ एरोनटिक्सले यो प्रविधिलाई केवल धनाढ्यहरूका लागि सीमित नराखी सामान्य जनतासम्म पहुँच बनाउन चाहन्छ। कम्पनीको स्थापना सन् २०१५ मा गरिएको थियो, जुन वर्ष Back to the Future Part II जस्तो साइन्स–फिक्सन फिल्ममा उड्ने कारको भविष्य देखाइएको थियो।
कम्पनीले आफ्नो मोडेल ए को उत्पादन प्रक्रिया सुरु गर्न PUCARA Aero / MYC नामक प्रतिष्ठित विमान निर्माण कम्पनीहरूसँग सम्झौता गरिसकेको छ। अहिले नै ३३ सय भन्दा बढी प्रि–अर्डर प्राप्त गरिसकेको यो कारको मूल्य ३लाख अमेरिकी डलर तोकिएको छ।
तर, कम्पनीले आगामी दिनमा सस्तो मूल्यमा मोडेल जेड सार्वजनिक गर्ने योजना बनाएको छ, जसको अनुमानित मूल्य ३५ हजार अमेरिकी डलर हुनेछ। एलेफको वेबसाइटका अनुसार, मोडेल जिरो साधारण सडकमा गुड्न, आवश्यक परेमा ठाडो उडान गर्न र ट्राफिक जाममाथिबाट उडेर अगाडि बढ्न सक्षम छ।
यो कार सामान्य पार्किङ स्पेसमा अट्न सक्छ र घरको ग्यारेजमा राख्न सकिन्छ। आजको वैज्ञानिक युगमा एलेफ एरोनटिक्सको उड्ने कार विज्ञान र प्रविधिको महान उपलब्धि हो। यो केवल विलासी सुविधा मात्र नभएर यातायात क्षेत्रमा नयाँ क्रान्ति ल्याउने आविष्कार सावित हुन सक्छ।
यदि सफलतापूर्वक व्यावसायीकरण गर्न सकियो भने, भविष्यमा ट्राफिक जामको समस्या समाधान गर्न, यात्रालाई थप सहज बनाउन र नयाँ पुस्तालाई विज्ञानप्रति झन् आकर्षित गराउने महत्वपूर्ण साधन बन्नेछ। उड्ने कारको सपना अब केवल कल्पना मात्र नभएर नयाँ यथार्थ बन्ने दिशामा अगाडि बढिरहेको छ ।
