१३ फागुन, काठमाण्डौ।
बलिउडका चर्चित गायक उदित नारायण झा पछिल्लो समय एकपछि अर्को गर्दै विवादमा पर्न थालेका छन् । केही दिन अघिमात्रै उनी स्टेजमै फ्यानलाई चुम्बन गरेपछि विवादमा परेका थिए । यो घटना नसेलाउँदै अब उनी अर्को गम्भीर कानुनी झमेलामा परेका छन् ।
भारतीय सञ्चारमाध्यमका अनुसार उनीविरुद्ध जेठी पत्नी रञ्जना झाले सुपौल पारिवारिक अदालतमा उजुरी दिएकी हुन् । जसमा उनले उदितले आफ्नो अधिकार हनन् र सम्पत्तिको दुरुपयोग गरेको आरोप लगाएकी छन् ।
सो मुद्दामा उदित नारायण यही फेब्रुअरी २१ मा सुपौल पारिवारिक अदालतमा हाजिर भए । तर उदितले रञ्जनाका कुनै पनि माग स्वीकार गरेनन् । रञ्जनाले आफ्नो बढ्दो उमेर र स्वास्थ्यका कारण आफू अब उदित नारायणसँग बस्न चाहेको अदालतमा बताइन् ।
तर उदितले अब यस्तो सम्भावना नरहेको बताए । रञ्जना र उदित नारायणबीच १९८४ डिसेम्बर ७ मा विवाह भएको थियो । तर सम्बन्ध राम्रो हुन सकेन । जब उदितले १९८८ मा फिल्म उद्योगमा प्रसिद्धि पाउन थाले, तब उनले आफ्नी पत्नी रञ्जनालाई छाडे ।
यसपछि रञ्जनाले महिला आयोगमा उजुरी दिइन् । त्यसपछि उदितले उनलाई फ्ल्याट र अन्य आर्थिक सहयोगको वाचा गरे तर पछि दिएनन् । रञ्जनाको आरोपको विरोध गर्दै उदित नारायणले रञ्जनाले पैसा उठाउन खोजेको र अदालतलाई गलत जानकारी दिएको दाबी गरे ।
उनले २०१३ मा बिहार महिला आयोगमा पहिलेको विवाद सौहार्दपूर्ण रूपमा समाधान गरिएको बताए । जसअन्तर्गत रञ्जनालाई हरेक महिना १५ हजार रुपैयाँ दिने सहमति भएको थियो । पछि २०२१ मा यो रकम बढाएर २५ हजार पु¥याइयो ।
उनले रञ्जनालाई १ करोडको घर,२५ लाखको कृषि जग्गा र गहना समेत दिएको दाबी गरेका छन् । तर, रञ्जनाले यी दाबी अस्वीकार गर्दै आफूसँग १८ लाख मूल्यको जग्गा रहेको भन्दै उदित नारायणले बेच्न रोकेको बताइन् ।
यस्तै रञ्जनाले आफू उदितलाई भेट्न मुम्बई पुग्दा दुव्र्यवहार गरिएको आरोप पनि लगाइन् । यस मुद्दामा मानवअधिकार अधिवक्ता एस.के. झाले राष्ट्रिय मानव अधिकार आयोग र बिहार मानवअधिकार आयोगमा दुईवटा याचिका दायर गरेका छन् ।
एस.के. झाले भारतीय संविधान र हिन्दु विवाह ऐनअन्तर्गत कुनै पनि व्यक्तिलाई आफ्नो अघिल्लो विवाह कानुनी रूपमा समाप्त नगरी फेरि विवाह गर्ने अधिकार नभएको बताए । उदित नारायणका गतिविधिले महिला अधिकार हनन् भएको र यो मानवअधिकार हनन् पनि भएको उनले बताए ।
अब यस विषयमा अदालतमा सुनुवाइ जारी रहनेछ । रञ्जना झा र उदित नारायणको सम्बन्धमा के नयाँ मोड आउँछ त्यो भने प्रतिक्षाकै विषय बनेको छ । भारतीय सञ्चारमाध्यमका अनुसार उदित नारायणले बिहारकी रञ्जनासँग सन् १९८४ मा विवाह गरेका थिए ।
जतिबेला उदित बलिउडमा चर्चित नाम थिएनन् । उनी आफ्नो करिअर बनाउन संघर्षरत थिए । यसपछि उनी श्रीमतीलाई छाडेर मुम्बई हानिए । मुम्बईमा उदितले दीपा गहतराजलाई भेटे र प्रेममा परे । अनि उनीहरूले सन् १९८५ मा विवाह गरे ।
उनीहरू एक छोरा आदित्य नारायण छन्, जो गायक पनि हुन् । उदितका हिन्दी, नेपाली लगायत विभिन्न भाषामा सयौं चर्चित गीतहरु छन् ।
