२१ फागुन , एजेन्सी ।
दुई पटकको च्याम्पियन भारत च्याम्पियन्स ट्रफीको फाइनलमा प्रवेश गरेको छ । मंगलबार भएको सेमिफाइनलमा दुई पटकको च्याम्पियन अष्ट्रेलियालाई ४ विकेटले हराउँदै भारत लगातार तेस्रो पटक फाइनलमा पुगेको हो ।
दुबई इन्टरनेशनल स्टेडियममा २ सय ६५ रनको लक्ष्य भारतले ११ बल अगाडि ६ विकेटको नोक्सानीमा पूरा गर्यो । भारतले ४३ रन जोड्दा दुई ओपनरलाई गुमायो । शुभमन गिल ८ रनमा र कप्तान रोहित शर्मा २८ रनमा आउट भए ।
पहिलो पावर प्लेमा भारतले २ विकेटको नोक्सानीमा ५५ रन बनाएको थियो । सुरुवात दमदार गर्न नसकेको भारतको लागि विराट कोहली र श्रेयस अयरले तेस्रो विकेटको लागि ९१ रनको साझेदारी गरे । श्रेयस अर्धशतकबाट ५ रनले चुके ।
४५ रन जोडेका उनी एडम जाम्पाद्वारा बोल्ड आउट भए । विराटले भने अर्धशतक बनाए र क्रिजमा टिकिरहे । विराटसँग मिलेर चौथो विकेटको लागि ४४ रनको साझेदारी गरेपछि अक्षर पटेल २७ रनना आउट भए ।
त्यसपछि क्रिजमा जमेका विराटलाई जम्पाले पबिलियनको बाटो देखाइदिए । ९८ बलको सामना गर्दै ५ चौका प्रहार गर्दै ८४ रनको पारी खेले । योसंगै आईसीसीको एकदिवसीय(विश्वकप र च्याम्पियन्स ट्रफी) दुवैमा कोहलीले २४ पटक ५० वा सोभन्दा बढी रन बनाएका छन् ।
उनले भारतका महान् ब्याटर सचिन तेन्दुलल्करको रेकर्ड उछिनेका हुन् । सचिनले २३ पटक यो उपलब्धि हात पारेका थिए । यसैगरी च्याम्पियन्स ट्रफीमा पनि कोहलीले ७ पटक ५० वा सोभन्दा बढी रन बनाएका छन् ।
उनले सौरभ गांगुली, राहुल द्रविड र शिखर धवनको ६ पटकको रेकर्ड उछिनेका हुन् । बिराटले च्याम्पियन्स ट्रफीमा आफूले भाग लिएका सबै तीन सेमिफाइनलमा अर्धशतक बनाएका छन् । ती सबै लक्ष्यलाई पछ्याउँदै आएका हुन् ।
उनले यसअघि सन् २०१३ मा श्रीलंकाविरुद्ध ५८ रन तथा सन २०१७ मा बंगलादेशविरुद्ध ९६ रन बनाएका थिए । बिराट र अष्ट्रेलियाका स्टिभ स्मिथले आईसीसी प्रतियोगिताको नकआउट चरणमा ५ पटक ५० वा सोभन्दा बढी रन बनाएका छन् ।
यस मामिलामा सचिन तेन्दुल्कर मात्र उनीहरुभन्दा अघि रहेका छन्, जसले ६ पटक ५० वा सोभन्दा माथिको रन बनाएका छन् । यता मंगलबारको खेलमा बिराट आउट हुँदा भारतले ४२.२ ओभरमा २ सय २५ रन बनाएको थियो ।
त्यसपछि हार्दिक पाण्ड्या र के एल राहुलले भारतलाई जिततर्फ डोर्याए । २४ बलमा ३ छक्का र १ चौका प्रहार गर्दै हार्दिकले २८ रनको महत्वपुर्ण योगदान दिए । केएल राहुलले अविजित ४२ रनको उत्कृष्ट पारी खेले ।
उनले ३४ बल खेल्दै २ चौका र २ छक्का प्रहार गरे । बलिङमा एडम जाम्पा र नथान इलिसले समान २ विकेट लिए । यस्तै बेन ड्वारसेस र कुपर कनोलीले समान १ विकेट झारे । त्यसअघि टस जितेर अष्ट्रेलियाले पहिलो ब्याटिङ रोज्यो ।
४९.३ ओभर सम्पूर्ण विकेट गुमाउँदै अष्ट्रेलिया २ सय ६४ रनमा समेटियो । अष्ट्रेलियाका ओपनर कुपर कनोली रनको खाता नखोली मोहम्मद सामीको बलमा आउट भए । दोस्रो विकेटको रूपमा ट्राभिस हेड ३९ रनमा वरूण चक्रवर्तीको बलमा शुभमन गीलको बलमा क्याच आउट भए ।
त्यसपछि कप्तान स्टेभन स्मिथ र मार्नस लाबुसेनले तेस्रो विकेटको लागि ५६ रनको साझेदारी गरे । मार्नस २९ रनमा आउट भए । लगत्तै जोस इङ्लिस ११ रनमा आउट भए । त्यसपछि स्मिथले फेरि एलेक्स क्यारीसँग ५४ रनको साझेदारी गरे ।
उनी ७३ रन जोडेर मोहम्मद सामीको बलमा बोल्ड आउट भए । त्यसपछि अर्धशतक बनाएका एलेक्स ६१ रन जोड्दै रन आउट भए । उनले ५७ बलको सामाना गर्दै ८ चौका र १ छक्का सहित ६१ रनको पारी खेले ।
बलिङमा मोहम्मद सामीले १० ओभरमा ४८ रन दिएर ३ विकेट झारे । वरूण चक्रवर्ती र रविन्द्र जडेजाले समान २ विकेट लिए । आज हुने दोस्रो सेमिफाइनलमा न्युजिल्यान्ड र दक्षिण अफ्रिकाबीच प्रतिस्पर्धा हुनेछ ।
भारतले यी दुईको विजेतासँग उपाधिको लागि खेल्नेछ । यो खेल पाकिस्तानको लाहोरमा दिउँसो पौने तीन बजे शुरू हुनेछ । न्युजिल्यान्ड समूह ‘ए’ को उपविजेता र दक्षिण अफ्रिका समूह ‘बी’ को विजेता बन्दै सेमिफाइनलमा पुगेका हुन् । फाइनल खेल आइतबार दुबईमा हुनेछ ।
