१७ चैत , विराटनगर ।
कोशी प्रदेशको राजधानी विराटनगरमा डेढ सय भन्दा बढी प्रतिस्पर्धीहरुले खुला ब्यायाम प्रतियोगितामा प्रतिस्पर्धा गरेका छन् । नेपाली युथ फिटनेस एण्ड केलिसथेनिक्स विराटनगरको आयोजनामा खुल्ला व्यायाम प्रतियोगिता भब्यताका साथ सम्पन्न भएको छ ।
स्थानीय शहिद रङ्गशाला विराटनगरमा आयोजित प्रतियोगिताको पुरुष सर्किट विधा तर्फको खेलमा आयुष नेम्वाङ, मुकेश अगुवा र एइनिस प्रधान क्रमश प्रथम, द्वितीय र तृतीय भएका छन् ।
त्यसैगरी महिला सर्किट विधा तर्फको खेलमा महिमा यख्खा राई, सपना मगर र भावना घिमिरे क्रमश प्रथम, द्वितीय र तृतीय स्थान प्राप्त गर्न सफल भएका छन् ।यसैगरी खुल्ला बार विधा तर्फको खेलमा साहिल लिबाङ्ग,सुशान्त नरसिंह राणा, संजोक थापाले क्रमश प्रथम, द्वितीय र तृतीय स्थान प्राप्त गर्न सफल भएको नेपाली युथ फिटनेस एण्ड केलिसथेनिक्सविराटनगर संस्थाका संस्थापक अध्यक्ष सुमन बन्जाराले जानकारी दिएका छन् ।
बन्जाराका अनुशार हरेक विधा अन्तर्गतको खेलमा प्रथम, द्वितीय र तृतीय स्थान हासिल गर्ने खेलाडीहरुलाई एन.वाइ.एफ.सि विराटनगर को तर्फबाट प्रोत्साहन स्वरुप क्रमश मेडल ट्रोफी सहित नगद रु १५हजार, ९ हजार र ६ हजार नगद पुरस्कर र विभिन्न आकर्षक उपहारहरु समेत प्रदान गरिएको छ ।
कोशी प्रदेश खेलकुद विकास बोर्डका सदस्य सचिब पर्शुराम वस्नेतको प्रमुख आतिथ्यतामा सम्पन्न भएको प्रतियोगिताको उद्घाटन समारोमा विराटनगर महानगरमा मेयर नागेश कोइराला लगायतका अतिथिहरुको सहभागिता रहेको थियो । खुल्ला व्यायाम प्रतियोगितामा १३० जना पुरुष खेलाडी ३० जना महिला खेलाडी गरि १६० जना खेलाडीहरुले सहभागिता जनाएका थिए ।
विराटनगर महानगरको प्रवद्र्धन र कोशी प्रदेश खेलकुद विकास बोर्डको संयोजनमा सम्पन्न भएको प्रतियोगिताबाट प्रतियोगीहरूको समग्र फिटनेस क्षमता मापन गरिएको संस्थापक अध्यक्ष बन्जराले जानकारी दिएका छन्।
खेलकुद तथा फिटनेसप्रति युवाहरूको चासो र संलग्नतालाई प्रोत्साहन गर्ने उद्देश्यले यो प्रतियोगिता आयोजना गरिएको उनले बताएका छन् ।
