१९ चैत, एजेन्सी।
चीनले व्यावसायिक रुपमा उड्ने ट्याक्सी उद्योग सिर्जना गर्ने दिशामा ठूलो कदम चालेको छ । चिनियाँ नियामक निकायहरूले पहिलोपटक दुई कम्पनीलाई स्वायत्त यात्रु ड्रोन सञ्चालन गर्न अनुमति प्रदान गरेका छन्।
राज्य नियन्त्रित समाचार संस्था सिन्ह्वाका अनुसार, सूचीकृत इह्याङ होलिडेज र हिईफिाई हेई एयरलाइन्सले चीनको नागरिक उड्डयन प्रशासनबाट एयर अपरेटर प्रमाणपत्र प्राप्त गरेका छन्।
अनुमतिसँगै यी दुवै कम्पनीहरूलाई चालकबिहीन हवाई सवारी साधन प्रयोग गरेर व्यावसायिक यात्रु सेवा, जस्तै शहरी दृश्यावलोकन प्रदान गर्ने अनुमति दिइएको छ। क्रिटिक सेक्युरिटीको एक रिपोर्टअनुसार एयर अपरेटर प्रमाणपत्र यी कम्पनीहरूको यात्रु ड्रोन सञ्चालनका लागि अन्तिम नियामक बाधा थियो।
यसअघि, यी ड्रोनले टाइप प्रमाणपत्र, उत्पादन प्रमाणपत्र र एयरवर्थिनेस प्रमाणपत्र प्राप्त गरिसकेका थिए। “हामी अनुमान गर्छौं कि अब कम–उचाइमा नयाँ पर्यटन व्यवसायको सुरुवात हुनेछ,“ रिपोर्टमा उल्लेख गरिएको छ कि, “ ईह्याङको शहरी दृश्यावलोकन सेवाले यस उद्योगको विकासलाई तीव्र पार्न सक्छ।“
हालैका महिनाहरूमा चीनले पर्यटनबाट कम–उचाइ अर्थतन्त्रको विकास तीव्र पार्न विभिन्न पहलहरू अघि सारेको छ, जसमा ड्रोन डेलिभरी, एयरशिप र उड्ने कारहरू जस्ता प्रविधिहरू समावेश छन्।
चिनियाँ नेताहरूले यस क्षेत्रमा ठूलो आर्थिक सम्भावना देखेका छन्। मार्चको सुरुमा नेशनल पिपुल्स कांग्रेसमा दिएको भाषणमा प्रधानमन्त्री ली छ्याङ ले कम–उचाइ अर्थतन्त्रलाई बायो म्यानुफ्याक्चरिङ, क्वान्टम कम्प्युटिङ, इम्बोडिड आर्टिफिसियल इन्टेलिजेन्स, र सिक्स जी मोबाइल नेटवर्क सँगै समेटेका थिए।
चीन इन्फर्मेसन एसोसिएसन को कम–उचाइ इकाईका उपाध्यक्ष छेङ बो लिन ले मार्च २८ मा आयोजित एक औद्योगिक सम्मेलनमा भनेका छन्, “कम–उचाइ अर्थतन्त्र नयाँ वृद्धि चालक हो, र यो चीनको तीव्र आर्थिक विकासलाई अघि बढाउने प्रमुख इन्जिन बन्नेछ।“
चीनको नागरिक उड्डयन प्रशासनको तथ्याङ्कलाई उद्धृत गर्दै अनुसन्धान समूहद्वारा प्रकाशित रिपोर्टअनुसार, सन् २०२५ सम्म चीनको कम–उचाइ अर्थतन्त्रको बजार मूल्य १.५ ट्रिलियन युआन (२०७ अर्ब अमेरिकी डलर) पुग्नेछ।
सन् २०३५ सम्म यो २.५ ट्रिलियन युआनसम्म विस्तार हुन सक्छ। यस क्षेत्रमा चीनका प्रमुख कम्पनीहरूमा इह्याङ ,फेइहांग एभिएशन ,परम्परागत कार निर्माता एक्सपेंग र जीली समावेश छन्।
यी कम्पनीहरू बोइङ एयरबस र ब्राजिलियन कम्पनी एक्सपेंग जस्ता अन्तर्राष्ट्रिय प्रतिस्पर्धीहरूसँग प्रतिस्पर्धामा छन् । रिपोर्टमा भनिएको छ कि, “भविष्यमा, कम–उचाइ अर्थतन्त्रलाई समर्थन गर्ने नीति निरन्तर जारी हुने भएकाले यो क्षेत्रमा प्रतिस्पर्धा अझ तीव्र हुनेछ।“
उड्ने कारहरूको विकासमा अमेरिका र संयुक्त अरब इमिरेट्सजस्ता देशहरूमा पनि महत्वपूर्ण प्रगति भइरहेको छ। अमेरिकामा उड्ने कारको परीक्षण भएको छ । क्यालिफोर्नियास्थित एलेफ एअरोनटिक्स कम्पनीले विश्वको पहिलो उड्ने कारको नमूना परीक्षण गरेको छ।
यो विद्युतीय कारले सडकमा यात्रा गर्नका साथै आकाशमा उडान गर्न सक्छ। दुई सिट क्षमतायुक्त यस कारको उडान दूरी ११० माइल (१७७ किलोमिटर) र सडकमा २०० माइल (३२२ किलोमिटर) सम्म यात्रा गर्न सक्ने क्षमता छ।
कम्पनीले आगामी एक वर्षभित्र उपभोक्ताहरूलाई यो कार बिक्री गर्ने लक्ष्य राखेको छ, जसको मूल्य ३ लाख अमेरिकी डलर तोकिएको छ। यस्तै दुबईले सन् २०२६ सम्ममा उड्ने ट्याक्सी सेवा सुरु गर्ने योजना बनाएको छ।
यसका लागि दुबई सरकारले जोबी एभिएसन र स्काइपोर्ट इन्फ्रास्ट्रक्चर कम्पनीहरूसँग सम्झौता गरेको छ। जोबी एभिएसनले विद्युतीय हवाई ट्याक्सीहरू सञ्चालन गर्नेछ, जसले दुबई अन्तर्राष्ट्रिय विमानस्थल, पाम जुमेराह, डाउनटाउन दुबई र दुबई मारिना जस्ता स्थानहरूलाई जोड्नेछ।
यी ट्याक्सीहरूले ३२१ किलोमिटर प्रति घण्टाको गति हासिल गर्न सक्नेछन्, जसले यात्रुहरूलाई छिटो र सुविधाजनक यात्रा प्रदान गर्ने अपेक्षा गरिएको छ। यी प्रयासहरूलाई उड्ने सवारीसाधनहरूको व्यावसायिक प्रयोगलाई नजिक ल्याउने दिशामा महत्वपूर्ण कदमहरू मानिएको छ।
