१ वैशाख , एजेन्सी ।
नेपालमा मन्त्रीपरिषद्को निर्णयका नाममा त कहिले कानूनी छिद्र खोेजेर अनि कहिले शक्तिको आडमा रोपनीका रोपनी, विघौं बिघा जग्गा हडप्दा पनि नेताहरु अनुसन्धानको दायरमा समेत आउन सकेका छैनन् ।
उता बंगलादेशमा भने १० कठ्ठा जग्गा अवैध तरिकाले लिएको भन्दै पूर्व प्रधानमन्त्री शेख हसिनाविरुद्ध पक्राउ पूर्जी नै जारी भएको छ । हुन त देश छाडेर भागेकी हसिनामाथि कयौं मुद्याहरु चलाइएको छ ।
जसमध्ये १० कठ्ठा जमिन कब्जा गरेकोमा भने पक्राउ पुर्जी पनि जारी भएको हो । बंगलादेशको एक अदालतले आइतवार शेख हसिना, उनकी बहिनी शेख रेहाना र भतिजी टुलिप रिजवाना सिद्दिकीसहित अन्य ५० विरुद्ध पक्राउ पुर्जी जारी गरेको छ ।
राजनीतिक शक्तिको दुरुपयोग गरी गैरकानूनी रुपमा जग्गा अधिग्रहण गरेको अभियोगमा राजधानी ढाकाको एक अदालतले यी सबैविरुद्ध पक्राउ पुर्जी जारी गरेको हो । यो आदेश पुरानो र संवेदनशील मुद्दामा आएको हो, जसले सरकार भित्र मात्रै हलचल मच्चाएको छैन तर शेख हसिनाका विपक्षीहरूलाई नयाँ राजनीतिक हतियार पनि दिएको छ ।
स्थानीय मिडिया रिपोर्टहरूका अनुसार ढाका महानगरीय वरिष्ठ विशेष न्यायाधीश जाकिर हुसेन गालिबले भ्रष्टाचार विरोधी आयोग (एसीसी) द्वारा दायर गरिएको तीनवटा छुट्टै आरोप पत्रहरूको संज्ञान लिएका हुन ।
अभियुक्तहरू अदालतबाट अनुपस्थित भएका कारण पक्राउ पुर्जी जारी गर्नु परेको जनाइएको छ । अदालतले पक्राउ आदेश कार्यान्वयनको प्रतिवेदन पुनरावलोकनका लागि अप्रिल २७ गते तोकेको छ ।
एसीसीले भर्खरै जग्गा बाँडफाँटमा भ्रष्टाचार गरेको तीनवटा छुट्टाछुट्टै मुद्दामा ५३ जनाविरुद्ध अदालतमा आरोपपत्र दायर गरेको ढाका ट्रिब्युनले जनाएको छ । यसअघि यही अप्रिल १० मा सोही अदालतले शेख हसिना, उनकी छोरी साइमा वाजेद पुतुल र अन्य १६ जनाविरुद्ध राजउकको जग्गा बाँडफाँडमा भ्रष्टाचार गरेको छुट्टै मुद्दामा पक्राउ पुर्जी जारी गरेको थियो ।
हामी तपाईंलाई यो जानकारी गराउदछौं कि यस वर्ष जनवरी १३ मा एसीसीका उपनिर्देशक सलाहुद्दीनले शेख रेहाना विरुद्ध पूर्वाञ्चल न्यू टाउन प्रोजेक्टमा १० कठा जग्गा प्राप्त गर्न आफ्नो अधिकारको दुरुपयोग गरेको आरोपमा मुद्दा दर्ता गरेका थिए ।
शेख हसिना र उनकी भतिजी टुलिप रिजवाना सिद्दिकीसहित १५ जना अभियुक्तलाई मुद्दामा नाम दिइएको थियो । अनुसन्धानपछि एसीसीका सहायक निर्देशक अफनान जन्नत केयाले फ्रेबुअरी १० मा १७ जनाविरुद्ध मुद्दा दायर गरेका थिए, जसमा पछि थप दुई जनाको नाम थपिएको थियो ।
यसैबीच अर्को मुद्दामा अफनान जन्नत केयाले पनि पूर्वाञ्चलमा १० कठा जग्गा अधिग्रहणमा समान अनियमितताको लागि अजमीना सिद्दिकी विरुद्ध आरोपपत्र दायर गरेका हुन ।
यस मुद्दामा सुरुमा टुलिप सिद्दिक र शेख हसिनासहित १६ जना अभियुक्तको नाम राखिएको थियो तर मार्च १० मा पेश गरिएको अन्तिम आरोपपत्रमा १८ जनाको नाम राखिएको थियो ।
गत वर्षको हिंसात्मक विरोध पछि शेख हसिनाको सरकारलाई पतन गरेको थियो । त्यसपछि शेख हसिना ५ अगस्ट २०२४ मा भारत भागेकी थिइन्, त्यसपछि उनी भारतमै बस्दै आएकी छिन ।
