९ साउन , काठमाण्डौ ।
काठमाडौंको टोखामा बरामद भएको २५ करोड रुपैयाँभन्दा बढीको अवैध विदेशी मुद्राको मुद्दामा मालिक छुटेका छन् भने भरिया जेलमा बस्नु परेको छ ।
यसका मुख्य योजनाकार भनिएका व्यक्ति सामान्य धरौटीमा रिहा हुँदा पैसा बोक्ने भरिया (ट्रक चालक) भने पुर्पक्षका लागि कारागार चलान भएका छन्। यो घटनाले उच्च प्रोफाइल अपराधमा पहुँच र शक्तिको प्रभावबारे गम्भीर प्रश्न उठाएको छ।
गत चैत ४ गते टोखाबाट बरामद भएको २५ करोड बराबरको युरो र डलरको मालिक भनिएका सिन्धुपाल्चोक, भोटेकोशीका ३५ वर्षीय नारायण पौडेल ३५ लाख रुपैयाँ धरौटीमा छुटेका हुन्।
सुरुमा फरार रहेका पौडेल सुटुक्क अदालतमा उपस्थित भएर सामान्य धरौटीमा रिहा भएका हुन्, जबकी पैसा ओसारपसारमा प्रयोग भएका ट्रक चालक कुसाङ लामा भने वैशाखदेखि नै केन्द्रीय कारागारमा थुनामा छन्।
गत चैत ४ गते, काठमाडौं उपत्यका अपराध अनुसन्धान कार्यालयको टोलीले विशेष सूचनाको आधारमा झोरबाट ना७ख १६५२ नम्बरको ट्रक र चालक कुसाङ लामालाई नियन्त्रणमा लिएको थियो।
ट्रकमा बनाइएको फल्स बटमभित्र लुकाइएको अवस्थामा १३ लाख ७५ हजार १५० युरो र ३ लाख २० हजार ८५० अमेरिकी डलर बरामद भएको थियो, जुन नेपाली २५ करोड रुपैयाँभन्दा बढी हुन आउँछ।
प्रहरीले अनुसन्धानको जिम्मा राजस्व अनुसन्धान विभागलाई दिएको थियो। विभागको अनुसन्धानले ट्रक चालक कुसाङ लामा केवल भरिया भएको र उक्त रकमको वास्तविक मालिक नारायण पौडेल भएको निष्कर्ष निकालेको थियो।
पौडेल फरार रहेकै अवस्थामा विभागले दुवै जनाविरुद्ध विदेशी विनिमय (नियमित गर्ने) ऐन, २०१९ अन्तर्गत जिल्ला अदालत, काठमाडौंमा मुद्दा दायर गरेको थियो।
यो मुद्दामा अदालतबाट दुई फरक–फरक इजलासले विरोधाभासपूर्ण आदेश दिएको देखिन्छ । वैशाख ३ गते न्यायाधीश ठाकुरप्रसाद खरेलको इजलासले ट्रक चालक कुसाङ लामालाई पुर्पक्षका लागि थुनामा पठाउने आदेश दियो।
जबकि असार ३२ गते फरार रहेका मुख्य अभियुक्त नारायण पौडेल अदालतमा हाजिर भए। न्यायाधीश कृष्णप्रसाद शर्मा नेपालको इजलासले उनलाई जम्मा ३५ लाख रुपैयाँ धरौटीमा रिहा गर्ने आदेश दियो।
पौडेलले उक्त धरौटी बुझाएर तत्कालै उन्मुक्ति पाए। सिन्धुपाल्चोकका नारायण पौडेल विवादित पृष्ठभूमिका व्यक्ति हुन्। उनका चार दाजुभाइमध्ये तीन जनाको बलियो राजनीतिक पहुँच रहेको खुलेको छ ।
जेठो दाजु, ध्रुव पौडेलः नेकपा (एमाले) मा आबद्ध र फुल्पिङकट्टीका पूर्वगाविस अध्यक्ष। साइलो दाजु, बच्चु पौडेल हिमालय सीमापार व्यापार संघका पूर्वअध्यक्ष,यस्तै कान्छो भाइ, राजकुमार पौडेल नेकपा (माओवादी केन्द्र) बाट २०७४ मा भोटेकोशी गाउँपालिकाका अध्यक्ष निर्वाचित।
एक प्रहरी अधिकृतका अनुसार, चारै दाजुभाइको पृष्ठभूमि शंकास्पद देखिन्छ। नारायण पौडेल यसअघि पनि विदेशी मुद्रा अपचलनकै कसुरमा पक्राउ परी धरौटीमा छुटेका थिए।
उनको राजनीतिक र आर्थिक पहुँचकै कारण यति ठूलो मुद्दामा पनि उनले सहजै उन्मुक्ति पाएको आशंका गरिएको छ। गत चैत ४ गते काठमाडौंको टोखाबाट प्रहरीले ट्रक र २५ करोड बराबरको विदेशी मुद्रा बरामद गरेको थियो।
काठमाडौं उपत्यका अपराध अनुसन्धान कार्यालयको टोलीले झोरबाट नारायणी प्रदेश–७ ख १६५२ नम्बरको ट्रक र चालक कुशाङ लामालाई नियन्त्रणमा लिएको थियो।
गाडीभित्र फल्सबटम बनाएर १३ लाख ७५ हजार १५० युरो र ३ लाख २० हजार ८५० डलर बरामद भएको थियो। अनुसन्धानका लागि राजश्व अनुसन्धान विभागमा पठाइएको थियो।
राजश्व अनुसन्धान विभागले अनुसन्धान गरी यसमा पक्राउ परेका कुशाङ लामा भरियामात्रै भएको निष्कर्ष निकालेको थियो। उक्त रकमको मालिक भने सिन्धुपाल्चोकका नारायण पौडेल भएको निष्कर्ष निकालेको थियो।
पौडेल पक्राउ भने परेनन्। उनी फरार रहेकै अवस्थामा विभागले जिल्ला अदालत काठमाडौंमा मुद्दा दायर गरेको थियो। विदेशी विनिमय (नियमित गर्ने) ऐन २०१९ अन्तर्गत मुद्दा दायर हुँदा जिल्ला अदालतले कुशाङलाई पुर्पक्षको लागि थुनामा पठाउने आदेश दिएको थियो।
कुशाङलाई वैशाख ३ गते न्यायाधीश ठाकुरप्रसाद खरेलको इजलासले थुनामा पठाएको थियो तर मालिक भनिएका व्यक्ति भने धरौटीमा छुटेका हुन्।
