१८ भदौ , काठमाण्डौ ।
काठमाडौँको गोङ्गबुबाट बरामद भएको रकम ४ करोड बढी रहेको पुष्टि भएको छ। प्रहरीले मंगलबार रातिसम्म गरेको गणनामा ४ करोड २५ लाख ५० हजार रुपैयाँ रहेको काठमाडौँ परिसरका प्रवक्ता एसपी अपीलराज बोहराले बताएका छन् ।
गोरखाको गोरखा नगरपालिका–६ बसपार्क स्थाई घर भएका ७६ वर्षीय विनोदकुमार श्रेष्ठको गंगबुस्थित घरमा नगद र सुन रहेको जानकारी पछि उपत्यका प्रहरी कार्यालय रानीपोखरी र काठमाडौँ जिल्ला प्हरी परिसरको संयुक्त टोलीले छापा मारेको थियो ।
काठमाडौँ महानगरपालिका–२६ गोङ्गबुस्थित श्रेष्ठको घरमा अवैध रुपमा लुकाएर राखिएको नगद र सुन प्रहरीले बरामद गरेको थियो। श्रेष्ठको घरबाट ९ किलो ३९ ग्राम सुनका गहना बरामद भएको थियो। यस्तै ३ किलो २१ ग्राम चाँदीका गहना पनि प्रहरीले बरामद गरेको छ।
यी गहना धितोमा राखेर उनले मिटरब्याजमा रकम दिएको खुलेको छ। उनले आफ्नो घरको बैठक कोठामा यो नगद र गहना लुकाएर राखेका थिए। श्रेष्ठलाई पन प्रहरीले पक्राउ गरेर अनुसन्धान अगाडी बढाएको छ। विनोदकुमार श्रेष्ठ, जसलाई उनका छिमेकीहरूले एक सामान्य वृद्ध व्यक्तिका रूपमा चिन्थे, उनको घरमा प्रहरीले छापा मारेपछि एउटा ठूलो खुलासा भयो।
काठमाडौं उपत्यका प्रहरी कार्यालय रानिपोखरी र जिल्ला प्रहरी परिसर काठमाडौंबाट खटिएको विशेष टोलीले गोप्य सूचनाका आधारमा श्रेष्ठको काठमाडौं महानगरपालिका–२६, गोंगबुस्थित घरमा छापा मारÞ्यो। घरभित्र प्रवेश गर्दा प्रहरीले जुन दृश्य देख्यो, त्यो अचम्मित पार्ने खालको थियो।
खाटमुनि, दराजभित्र र अन्य गोप्य ठाउँमा ठूलो परिमाणमा नगद लुकाइएको थियो। यो रकम देखेर प्रहरी टोली पनि चकित भयो। नगद मात्र होइन, प्रहरीले सुनका गरगहना पनि ठूलो मात्रामा फेला पारेको थियो। उपत्यका प्रहरी कार्यालय रानीपोखरीका एसएसपी तथा प्रवक्ता शेखर खनालले प्रारम्भिक अनुसन्धानमा श्रेष्ठ मिटरब्याजी रहेको पुष्टि भएको बताए।
“उनले सुनका गरगहना धितो राखेर अनुचित लेनदेन गर्ने गरेको देखिन्छ,“ खनालले भनेका छन् । श्रेष्ठको जीवनशैली र उनको वास्तविक कारोबारबीचको तालमेलले सबैलाई आश्चर्यचकित तुल्यायो। बाहिरबाट शान्त र साधारण देखिने श्रेष्ठले भित्रभित्रै मिटरब्याजको जालो फिँजाएका रहेछन्, जसमा कयौं सर्वसाधारण फसेका हुन सक्थे।
प्रहरीका अनुसार श्रेष्ठको गोरखामा पनि घर रहेको पाइएको छ ।
