२२ असोज , काठमाण्डौ ।
आईसीसी टी–२० विश्वकप एशिया तथा इस्ट एशिया प्यासिफिक छनोटका खेल आजदेखि ओमानमा शुरू हुँदैछन् । पहिलो दिन नेपालले आज कुवेतसँग खेल्दैछ । खेल नेपाली समयअनुसार राति पौने नौ बजे शुरू हुनेछ ।
नेपालले विश्वकप छनोटको समूह चरणमा कुवेतसँगै जापानसँग पनि खेल्नेछ । समूहको शीर्ष दुईमा रहने टोली सुपर–सिक्समा पुग्नेछ । सुपर–सिक्समा ६ टोलीमध्ये शीर्ष तीनमा पर्ने टोलीले आउँदो वर्ष भारत र श्रीलङ्कामा हुने टी–२० विश्वकप खेल्न पाउनेछन् ।
आज समूह बीमा रहेका दुबै टोली जितका साथ अघि बढ्न चाहन्छन् । सुपर सिक्सका दुबै प्रमुख टोलीलाई यस खेलको नतिजा निकै महत्वपूर्ण हुनेछ । यी दुबै टोली सुपर सिक्समा पुगेको खण्डमा आजको विजेताले सुपरसिक्समा पनि दुई अंक पाउनेछ ।
छनोटको नियम अनुसार समूहमा आफूले हराएको टोली सुपर सिक्समा पुग्दा सुपर सिक्समा दुई अंक मिल्नेछ । त्यसैले आजको खेल निकै महत्वपूर्ण हुनेछ । नेपालको कप्तानी रोहित पौडेल र कुवेतको मोहम्मद अस्लामले गर्नेछन् ।
नेपालका ओपनर कुशल भुर्तेल, अलराउण्डर दीपेन्द्रसिंह ऐरी र स्पिनर सन्दीप लामिछानेको प्रदर्शन आजको खेलमा महत्वपूर्ण हुनेछ । उता कुवेतमा मित भावसार, यासिन पटेल र रविजा सान्दारुवानको प्रदर्शन निकै महत्वपूर्ण हुनेछ ।
गत अप्रिलमा चार देश सम्मिलित टि ट्वान्टी आई सिरिजको फाइनलमा कुवेतले नेपाललाई ३ रनले हराएको थियो । श्रीलंकाबाट घरेलु क्रिकेट खेलेका रविले ३६ बलमा ६३ रनको महत्वपूर्ण योगदान दिएका थिए ।
कुवेतको टोलीमा ब्याटिङमा गहिराई हुँदा सुरुवातमा विकेट लिन आवश्यक देखिन्छ । उक्त खेल हार्दाका ९ खेलाडीले आजपनि नेपालबाट खेल्ने देखिन्छ । बसिर अहमद टोलीमा नहुँदा ललित नारायण राजवंशीको स्थानमा सन्दीप खेल्ने देखिन्छ ।
यता नेपालको पनि ब्याटिङ लाइनअप लामो छ । राम्रो सुरुवात पाएमा सजिलै बलियो योगफल बनाउन सक्छ । कुवेतका स्पिनर यासिन पटेल मुख्य हतियार हुन् । कुवेतलाई यस प्रतियोगिता अन्डरडग टोलीको रुपमा हेरिएको छ ।
कुवेतले नेपाल, युएई र ओमान मध्य एकलाई पछि पार्दै पहिलो पटक विश्वकप खेल्ने सपना देखेको छ । नेपाल र कुवेतबीच टि ट्वान्टी आईमा ३ खेल भएका छन् । नेपाल २ खेलमा विजयी हुँदा १ खेलमा पराजित भएको छ ।
गत अप्रिलमा सिरिजकै खेलमा १ सय ८६ रनको लक्ष्य नेपालले ४ विकेट गुमाउँदै ६ बल अगाडि पूरा गरेको थियो । सन् २०१९ मा नेपालले कुवेतलाई ७ विकेटले हराएको थियो ।
आज कुवेतविरुद्ध नेपालको सम्भावित–११ मा कुशल भुर्तेल, आसिफ शेख, रोहित पौडेल, कुशल मल्ल, सन्दीप जोरा, दीपेन्द्रसिंह ऐरी, करण केसी, सोमपाल कामी, नन्दन यादव, गुल्शन झा र सन्दीप लामिछाने रहेका छन् ।
आज हुने अन्य खेलहरुमा समूह सी अन्तर्गत ओमानविरुद्ध सामोआ अहिले ११ः४५ मा खेल्दैछन् । यस्तै समूह एमा दिउँसो ४ ः १५ मा कतारविरुद्ध युएई मैदानमा उत्रिदैछ ।
हालसम्म विश्वकपमा पुगेका देशहरुमा आयोजकका तर्फबाट भारत र श्रीलंका यस्तै अफगानिस्तान, पाकिस्तान, बंगलादेश, इंग्ल्यान्ड, दक्षिण अफ्रिका, अष्ट्रेलिया, वेष्टइण्डिज,आयरल्यान्ड, जिम्बावे, नामिबिया, अमेरिका, क्यानडा, नेदरल्यान्ड्स, इटाली जुन पहिलो पटक विश्वकपमा पुगेको हो र न्युजिल्यान्ड रहेका छन् ।
आइसिसी टि ट्वान्टी वरीयताको १८ औं स्थानमा रहेको नेपाल सन २०१४ र २०२४ गरी दुई पटक विश्वकप सहभागी भइसकेको छ । आइसिसी टि–ट्वान्टी आई वरीयताको २३ औं स्थानमा रहेको कुवेत अहिलेसम्म विश्वकपमा सहभागी भएको छैन । खेलहरु आईसीसी टिभीमा लाईभ हेर्न सकिनेछ ।
यस पटकदेखि एसिया र इस्ट एसिया प्यासिफिक क्षेत्रलाई एउटै बनाइएको हो । जसले गर्दा जापान, सामोआ र पपुवा न्युगिनी एसिया क्षेत्रकै टोलीसँग खेल्न आइपुगेका हुन् । नेपाललाई प्रतियोगिताको दाबेदारमा हेरिएको छ ।
तर, कुवेत यही टोली हो, जोसँग नेपाल अप्रिलमा हङकङसँग चार राष्ट्र सहभागी प्रतियोगिताको फाइनलमा ३ रनले पराजित भएको थियो । हङकङको सानो मैदानमा कुवेतले पहिला ब्याटिङ गर्दै ४ विकेट गुमाई १ सय ७४ रन बनाएको थियो ।
बसिर अहमद र नन्दन यादवको साहसी इनिङ्सका बावजुद नेपाल १९.३ ओभरमा १ सय ७१ रनमै रोकिएको थियो । त्यसै प्रतियोगिताको राउन्ड रोबिनको खेलमा नेपालले कुवेतमाथि ६ विकेटको आरामदायी जित निकालेको थियो ।
त्यसयता नेपाली टोलीमा ठूलो परिवर्तन आइसकेको छ । टोलीको प्रशिक्षण जिम्मा अस्ट्रेलियाका स्टुवार्ट लको काँधमा छ । उनको प्रशिक्षणमा नेपालले उच्च प्रर्दशन गर्दै आएको छ । विश्वकप लिग २ मा नेपालको प्रदर्शन कमजोर बनिरहँदा एकदिवसीय अन्तर्राष्ट्रिय क्रिकेट संकटमा परेको थियो ।
तर, स्टुवार्टको प्रशिक्षणमा नेपालले स्कटल्यान्डको डन्डीमा नेदरल्यान्ड्ससम्मिलित लिग २ को चारमध्ये ३ खेल जितेको थियो । लगत्तै ग्लास्गोमा भएको त्रिकोणात्मक ट्वान्टी–२० शृंखलामा एसोसिएट क्षेत्रको बलियो टोली नेदरल्यान्ड्स र स्कटल्यान्डलाई पराजित गरेको थियो ।
नेपालले अझ यूएईको शारजहाँमा ४–५ प्रमुख खेलाडीबिनै आएको वेस्ट इन्डिजलाई तीन ट्वान्टी–२० खेलको शृंखलामा २–१ ले पराजित गरेको थियो । त्यसैले नेपाल मस्कटमा उच्च मनोबलसहित उत्रने निश्चित छ ।
नेपालले पहिलो अभ्यास खेलमा ओमानलाई ६ विकेट र दोस्रो खेलमा कतारलाई १६ रनले हराएको स्थिति छ । कतारविरुद्ध ओपनर कुशल भुर्तेलले आफ्नै शैलीमा अर्धशतक बनाए, जुन नेपाली टोलीका लागि सकारात्मक पक्ष रह्यो ।
वेस्ट इन्डिजसँगको शृंखलामा आफ्नो लेग स्पिन बलिङ र फिल्डिङबाट प्लेयर अफ द सिरिजमा चुनिए पनि भुर्तेलको ब्याट राम्रोसँग चल्न सकिरहेको थिएन । आसिफले ओमानविरुद्धको अभ्यास खेलमा अर्धशतक बनाएका थिए ।
कुशल मल्लले पनि आफ्नो पुनरागमनमा राम्रो ब्याटिङ गरिरहेकाले नेपाली टोलीको ब्याटिङ थप बलियो बन्न पुगेको छ । कुवेतले पनि ओमानमा आफ्नो एकमात्र अभ्यास खेलमा कतारमाथि ३४ रनको विजय नतिजा निकालेको थियो ।
त्यसक्रममा टोलीले १ सय ८४ रन बनाएको थियो । क्लिन्टो एन्टोले २७ बलमै ६३ र मित भवसारले ४८ बलमा ६५ रन बनाएका थिए । यसले पनि कुवेतको ब्याटिङ ट्वान्टी–२० संरचनाका लागि सुहाउँदो देखाउँछ ।
एसिया क्षेत्रको क्षेत्रीय छनोट ‘ए’ बाट मलेसिया र कुवेतले छनोट चरण पार गरेका थिए । तर, हङकङ भ्रमणपछि कुवेतले खासै ट्वान्टी–२० क्रिकेट खेलेको छैन । ओमानमा गएर ओमानसँग दुई ट्वान्टी–२० अन्तर्राष्ट्रिय खेल खेल्नेक्रममा कुवेत दुवै खेलमा समान ५ विकेटले पराजित भएको थियो ।
यो अवस्थामा नेपालका लागि अनुभव निकै महत्त्वपूर्ण हुनेछ । कुवेतपछि नेपालले शुक्रबार जापानसँग खेल्ने छ । कुवेत र जापानको खेल बिहीबार नै हुनेछ । नेपाललाई ओमानको पछिल्लो भ्रमण खासै सम्झनुपर्ने कारण छैन ।
सन् २०२२ मा ओमानमा भएको ग्लोबल छनोटमा समूह चरणका सबै तीन खेल जितेपछि सेमिफाइनलमा यूएईसँग पराजित भएर ट्वान्टी–२० विश्वकपमा पुग्न असफल रहेको थियो । अहिले भने नेपाली क्रिकेट टोली फेरि एक ऐतिहासिक मोडमा छ । नेपाल तेस्रो पटक टी–२० विश्वकप पुग्ने यात्रामा छ ।
सन् २०१४ को पहिलोपल्ट विश्वकप खेलेको नेपालले त्यसको ठ्याक्कै एक दशकपछि त्यही मञ्चमा पुनरागमन गरेको थियो। यसपल्ट नेपाल फेरि एकपटक विश्वमञ्चको ढोका ढकढक्याउँदैछ । यसपटक गन्तव्य भने श्रीलंका र भारत छ । बाटोचाहिँ ओमानको मस्कट हुँदै जानेछ ।
