विराटनगर,असोज १९
शेयर बजार सम्बन्धी जानकारी दिन पहिलो पल्ट बिराटनगरमा प्रादेशिक पूँजी बजार प्रदर्शनी २०७५ शुरु भएको छ । नेपाल धितोपत्र बोर्डद्वारा आयोजित दुई दिने प्रर्दशनीमा धितोपत्र सम्बन्धी ज्ञान र आवश्यक सेवा एकै स्थानबाट उपलब्ध गराउने उद्देश्यका साथ काठमाडौँ बाहिर पहिलो पटक ‘प्रादेशिक पूँजी बजार प्रदर्शनी आयोजना गरिएको हो ।
प्रदर्शनीमा लगानीकर्तासहित लगानकर्ताका लागि जानकारी दिने, धितोपत्र बजार नियमन निकाय नेपाल धितोपत्र बोर्ड, नेपाल स्टक एक्सचेञ्ज, सिडिएससी, क्रेडिट रेटिङ संस्था, सामूहिक लगानी कोष, मर्चेन्ट बैंक, धितोपत्र दलाल व्यवसायी, डिम्याट खाता खोल्ने निक्षेप सदस्यसम्बन्धी सेवा प्रदान गरिनेछ ।
पूँजीको विकासबिना अर्थतन्त्रको विकास असम्भवः मुख्यमन्त्री राई
प्रर्दशनीको उद्घाटन गर्दे प्रदेश १ का मुख्यमन्त्री शेरधान राईले पूँजीको विकासबिना अर्थतन्त्रको विकास असम्भव रहेको बताएका छन । मुख्यमन्त्री राईले पूँजी बजारलाई विकास गर्न संघीय,प्रादेशिक र स्थानीय गरी तीनवटै सरकार मिलेर अघि बढ्नुपर्नेमा जोड दिए ।
बोर्डका अनुसार प्रर्दशनीमा सहभागीहरुले निःशूल्क डिम्याट खाता खोल्ने सुविधा पाउने र एक नेपाली एक डिम्याट खाता अभियानको सुरुवात गरिउको छ ।
प्रदर्शनी समारोहमा नेप्सेका प्रमुख कार्यकारी अधिकृत चन्द्रसिंह साउद, धितोपत्र बोर्डका अध्यक्ष रेवतबहादुर कार्की , सीडीएससीका प्रमुख कार्यकारी अधिकृत देव प्रकाश गुप्ता, मर्चेन्ट बैंकर एसोसिएनका महासचिव मेखबहादुर थापा, स्टक ब्रोकर एसोसिएसनका अध्यक्ष भरत रानाभाट, मोरङ चेम्बर एण्ड कमर्शका अध्यक्ष सुरेशमान श्रेष्ठ, उद्योग संगठन मोरङका अध्यक्ष भीम घिमिरे, नेपाल राष्ट्र बैंक विराटनगर कार्यालयका प्रमुख विनोद आचार्य, मोरङ जिल्लाका प्रमुख जिल्ला अधिकारी रमेश कुमार केसी, लगायतको सहभागीता रहेको थियो । उक्त प्रदर्शनीमा १२० स्टलहरु रहेका छन् ।
