विराटनगर,असोज १९
विराटनगरका विभिन्न पसलहरुमा खरिद मूल्य भन्दा अत्यधिक मुनाफा लिएर विक्री गर्ने गरेको भेटिएकोछ । दुईदिनदेखि जारी राखिएको अनुगमनका क्रममा बिक्रेताले सर्वसाधरणलाई अत्यधिक ठगीरहेको पाइएको हो ।
अनुगमानका क्रममा विराटनगरको मेनरोडमा रहेको न्यू चाइना बजारले नाफासहित ३ सय ३५ रुपैयाँमा बेच्नु पर्ने जिन्सको पाइन्टलाई १२ सय ७० मा बेचेको भेटिएको छ ।
यस्तै पाल भेराइटिजमा लोट्सको सन्स क्रिम एसपिएफ ७० को नाफासहित ६ सय ९० मा बेच्नु पर्नेमा ९ सय ५० मा बेचेको भेट्टिएको छ । उनीहरुलाई तत्काल कारवाही गर्नुको साँटो आवश्यक काजगपत्रसहित ७ भित्र बाणिज्य कार्यालयमा उपस्थित हुन निर्देशन दिइएको छ ।
यस्तै सगुन टेडर्समा वाणिज्य कार्यालयबाट जारी भएको प्रमाणपत्र नविकरण नभएको हुदा ७ दिन भित्र आवश्यक कागजपत्रसहित उपस्थित हुन निर्देशन दिइएको छ ।
यस्तै पण्डितजीको मिठाई पसलमा उत्पादन मिति र उपभोग्य मिति संकेत नदेखिएकोले त्यो संकेत राख्न निर्देशन दिइएको छ । चाडपर्व नजिकिदै जादा जिल्ला प्रशासन कार्यलय मोरङले नेतृत्व गर्दे विराटनगरका बजारमा अनुगमन गर्दे आएको छ ।
