दुर्गा प्रसाईंलाई अब दिल्लीले त्यागेको हो ?

१८ कार्तिक , काठमाण्डौ ।

भारतीय प्रधानमन्त्री नरेन्द्र मोदीलाई सत्तामा पु¥याउन महत्त्वपूर्ण भूमिका खेलेको हिन्दू राष्ट्रवादी संस्था राष्ट्रिय स्वयंसेवक सङ्घ (आरएसएस)सहित, उत्तर प्रदेशका मुख्यमन्त्री योगी आदित्यनाथहरुले पनि नेपालमा हिन्दुराज्य र राजसंस्था पुनर्वाहालीका लागि निकै प्रयास गर्दै आएको ओपन सिक्रेट जस्तै छ ।

भारतीय मठाधिसहरु, धर्म गुरुहरु नेपाल आएर यसका लागि प्रवचन दिनेदेखि यहाँका हिन्दुवादी संघसंस्थामा लगानी गरेका कुराहरु प्नि आए । नेपालका पूर्वराजालाई हिन्दु नरेश भन्दै आदित्यनाथसहितले विशेष सम्मानसमेत दिए ।

पछिल्लो पटक काठमाडौंमा पूर्वराजा ज्ञानेन्द्र शाहको समर्थनमा निस्किएका र्याली, प्रदर्शनहरुमा योगीका फोटोसहित आरएसएसको पोस्टर पनि देखियो । यद्यपि भारतीय पक्षले यसको खण्डन पनि गरेको थियो ।

तर भारतको हिन्दु पक्षधरहरुले नेपालमा हिन्दुराज्य चाहेको र राजसंस्थालाई पनि स्पेस दिलाउनका लागि प्रयास गरेका कयौं उदाहरणहरु र दुवैतर्फका कुटनीतिज्ञहरुका बयानहरु पनि आइरहेकै थिए ।

यसबीच राजसंस्था पुनस्थापनासहित हिन्दु राज्यका लागि राप्रपासहितका राजावादी दल वा समूहहरुलाई ओभरटेक गर्दैै नेपालमा मेडिकल व्यवसायी दुर्गा प्रसाईँ एकाएक उदाए । एकाएक किन भने यसअघि उनी माओवादी हुँदै एमालेका कट्टर कार्यकर्ता भएका थिए ।

तर मेडिकल कलेजलाई सम्वन्धनसहितका आफ्ना स्वार्थ पूरा नहुने देखिएपछि उनले प्रचण्ड र ओलीसंग दूरीमात्रै बढाएनन्, उनीहरुको विरुद्धमा धाराप्रवाह वाकयुद्ध सुरु गरे । त्यसपछि राजावादी पथमा हिड्न थाले ।

राष्ट्र, राष्ट्रियता, धर्म, संस्कृति र नागरिक बचाउ महाअभियानको संयोजक भए । पूर्वराजालाई झापामा बोलाएर कार्यक्रम गरे, नागरिक अभिनन्दनका गराए । राजावादीकै एजेण्डाका लागि मेचीदेखि महाकालीसम्म बैंकका ऋणी, सहकारी र लघुवित्त पीडितहरुलाई सडकमा उतारेर कार्यक्रम गर्दैआए ।

पछिल्लो पटक चैत्र १५ मा काठमाडौंमा भएको राजावादीहरुको प्रदर्शनको कमाण्डर भएपछि उनी झनै चर्चाको शिखरमा पुगे । सो प्रदर्शनलाई उग्र बनाएको आरोपमा प्रहरीले पक्राउ गर्न खोज्दा उनी भागेर भारत पुगे ।

केही दिनपछि नेपाल फर्किदा प्रहरीको नियन्त्रणमा पुगेर, पूर्पक्षका लागि केही महिना कारागारमा समेत रहे । रिहा भएपछि केही दिन शान्त रहेका उनी जेनजी आन्दोलनपछि एकाएक फेरि सक्रिय भएका छन् ।

जेनजीले राजनीतिक उथलपुथल पारेपछि त्यसको एक स्टकहोल्डरका रुपमा सैनिक मुख्यालयमा समेत पुगे । उनको यो मुभले धेरैलाई आश्चार्यचकित नै बनायो । दुर्गा प्रसाईँ एक्लै छैनन्, उनका पछाडि ठूलै शक्ति छ र त्यो भारत हो भन्नेहरुलाई ठूलै बल दियो ।

अब प्रसाइँले आगामी मंसिर ७ गतेदेखि देशव्यापी आन्दोलन गर्ने र त्यसले व्यवस्था नै परिवर्तन गर्ने भन्दै चेतावनीसहित जनताहरुलाई सो अवधिका लागि तयारी गर्न समेत आह्वान गरेका छन् । यसैबीच भारतीय पक्षबाट भने दुर्गा प्रसाईँ, उनको अभियान वा आन्दोलनमा आफ्नो कुनै सरोकार नभएको भन्दै खण्डनहरु आउन थालेको छ ।

भारतीय सञ्चारमाध्यम एनडीटिभीका अनुसार भारत सरकारले नेपालका राजतन्त्रवादी व्यवसायी दुर्गा प्रसाईंको राजनीतिक अभियानप्रति आफ्नो कुनै चासो र सम्बन्ध नभएको बताएको छ । क्यान्सर उपचारका लागि प्रसाईं यसै हप्ता भारत आइपुगेको तर उनले यस भ्रमणलाई ’नेपालको राजतन्त्र र हिन्दु राज्य पुनस्र्थापना गर्ने अभियानका लागि भारतीय नेताहरूसँग सम्पर्क गर्ने र नैतिक समर्थन प्राप्त गर्ने प्रयास’ भनेका छन् ।

तर भारतीय अधिकारीहरूले उनका गतिविधिमा भारतको कुनै संलग्नता वा चासो नभएको बताएका छन् । कूटनीतिक र सुरक्षा स्रोतहरूका अनुसार बरु भारतीय अधिकारीहरूले प्रसाईंको राजनीतिक सक्रियतालाई एक अनावश्यक विचलनका रूपमा हेरेका छन् र नेपालको निर्वाचित सरकारसँग स्थिर सम्बन्ध कायम राख्न र यसको आन्तरिक मामिलामा हस्तक्षेप नगर्न भारत अडिग देखिएको छ ।

यस विषयका जानकार एक अधिकारीले एनडीटीभीसँग भनेका छन्, ‘भारतीय अधिकारीहरूले दुर्गा प्रसाईंलाई भारतमा रहँदा राजनीतिक गतिविधि नगर्न र भारतीय समर्थनको भ्रामक दाबी नगर्न चेतावनी दिएका छन्।’

दिल्लीका अधिकारीहरू प्रसाईंले गरेको भारतीय सहानुभूतिको दाबीबाट चिढिएको भनेर समाचारमा उल्लेख छ । ‘प्रसाईंको राजनीतिसँग भारतको प्रत्यक्ष वा अप्रत्यक्ष कुनै सम्बन्ध छैन’, नेपालसँग कूटनीतिक सम्बन्धमा संलग्न एक वरिष्ठ अधिकारीले भने, ‘उनका गतिविधिलाई भारतबाट कुनै समर्थन छैन।’

कूटनीतिक र सुरक्षा स्रोतहरूका अनुसार, भारतीय अधिकारीहरूले प्रसाईँको राजनीतिक सक्रियतालाई एक अनावश्यक झन्झटका रूपमा लिएका छन् । अहिले भारत नेपालको निर्वाचित सरकारसँग स्थिर सम्बन्ध कायम राख्न र नेपालको आन्तरिक मामिलामा कुनै पनि हस्तक्षेपको अनुभूति हुन नदिनमा सचेत छ ।

एनडीटीभीसँग कुरा गर्दै विषयसँग परिचित एक अधिकारीले भने, ‘भारतीय अधिकारीहरूले दुर्गा प्रसाईँलाई भारतमा रहँदा राजनीतिक गतिविधि नगर्न र भारतीय समर्थनको भ्रामक दाबी नगर्न चेतावनी दिएका छन् ।’

स्रोतले प्रसाईँ वा उनका छोरा दुवैले यस भ्रमणका क्रममा कुनै पनि भारतीय सरकारी वा पार्टीका प्रतिनिधिसँग भेटघाट गर्न नसकेको बतायो । तर भारतीय मिडियामा प्रकाशन भएको यो खबरलाई प्रसाईले भने अफवाह भएको भन्दै खण्डन गरेका छन् ।

उनले समाचारलक्षित गर्दै समाजिक संजालमा लेखेका छन्, अबको आन्दोलन कसैको इसारामा होइन, यो आन्दोलन नितान्त नेपालीको, नेपाली माटोको र नेपाली आत्मसम्मान र स्वाभिमानको आन्दोलन हुनेछ, म निजि काममा भारतमा छु।

तर विदेशी डलरमा चल्ने केही झोले मिडियाहरूले दुर्गा प्रसाइको भारत दुरी भ्रामक शीर्षकका समाचार फैलाइरहेका छन् । त्यसप्रति मेरो घोर आपत्ति छ। म स्पष्ट रूपमा भन्छु — अहिले म कसैसँग भेटघाटमा छैन।यदि कोही कसै संग भेट भए फोटोसहित प्रमाण सार्वजनिक गर्ने छु ।

आन्दोलनलाई लिएर भ्रम नफैलाऔँ, देशलाई अझै भद्खालो मा हाल्ने काम नगरौ, सत्य र देशप्रेमको बाटोमा दृढ रहौँ, यो आन्दोलन कुनै विदेशी शक्तिको आडमा होइन, यो आन्दोलन हाम्रो बैदिक सनातन धर्मको रक्षा, हिन्दु राज्य पुनस्र्थापना, र राष्ट्रिय स्वाभिमान पुनर्जागरणको पवित्र अभियान हो। यो नेपालको अन्तिम निर्णायक लडाइँ हो, जहाबाट स्थायी शान्ति र एकताको युग सुरु हुनेछ।

आगामी मंसिर ७ गतेदेखि सुरु हुने अनिश्चितकालीन देशव्यापी आम हड्ताल सहितको आन्दोलन हाम्रो राष्ट्रिय स्वाभिमान, आत्मनिर्भरता र स्वतन्त्रताको प्रतीक हुनेछ । उनले थप लेखेका छन्, अर्को कुरो धर्म भुसालजी को झुटको खेति गर्ने अनलाइन ले दुर्गा प्रसाई लाइ भारतले डिपोट गर्ने शीर्षकको समाचार देखेर नै म त्रिभुवन बिमानस्थल हुदै नेपाल एयरलाइन्स बाटै भारत आयको हु। अनलाइनको झुटको खेति येति ले पुस्टि भएन र ?

गएको चैतमा उनकै नेतृत्वमा आयोजना भएको आन्दोलन हिंसात्मक बनेपछि उनी भागेर भारत गएका थिए । भारतले उनलाई पक्राउ गरेर नेपाललाई बुझाएको थियो । प्रदर्शनको क्रममा समर्थकहरूले दर्जनौं सार्वजनिक र निजी भवनहरूमा आगजनी गरेका थिए । सो घटनामा प्रसाईविरुद्धको मुद्धा अहिलेपनि अदालतमा विचाराधीन छ ।