१९ कार्तिक , काठमाण्डौ ।
यूएईमा जारी लिग २ क्रिकेटको शृंखलामा लगातार तीन हार बेहोरेर खराब लयमा रहेको नेपाली क्रिकेट टोलीले आज सिरिजको अन्तिम खेलमा आयोजक यूएईसँग खेल्दैछ । खेल नेपाली समयअनुसार बिहान सवा ११ बजे युएईको दुबई इन्टरनेशनल क्रिकेट मैदानमा हुनेछ ।
जारी सिरिजमा नेपालले तीन खेलमै हार बेहोरेको छ । नेपाल अमेरिकासँग १०६ रन र ४ विकेटले, युएईसँग ५ विकेटले पराजित भएको थियो । लिग–२ को अंक तालिकामा अमेरिका २४ खेलबाट ३६ अंकसहित शीर्ष स्थानमा छ ।
नेपाल १९ खेलमा १२ अंकसहित सातौं स्थानमा छ भने १९ खेल खेलेको यूएई ८ अंकसहित पुछारमा छ । नयाँ प्रशिक्षक स्टुअर्ट ल को आगमनपछि जुनमा स्कटल्यान्डमा भएको लिग २ शृंखलामा राम्रो प्रदर्शन गरेको अनि टी–२० विश्वकप छनोटमा शानदार प्रदर्शनसहित उच्च मनोबलका साथ यूएई पुगेको नेपाली टोलीको प्रदर्शन भने अपेक्षाकृत हुन सकेन ।
अमेरिका र यूएईसँग सुरुवाती दुई खेलमा एकपक्षीय हार बेहोरेको नेपालले तेस्रो खेलमा अमेरिकासँग अलि सुधारिएको प्रदर्शन गरेपनि जित भने निकाल्न सकेन । लिग २ मा अझै १७ खेल खेल्दै लामो यात्रा तय गर्न बाँकी भएपनि यी तीन हारले नेपालको सोझै विश्वकप छनोट खेल्ने यात्रा कठिन मात्र नभएर एकदिवसीय मान्यता जोगाउन समेत मुस्किल देखिएको छ ।
नेपाल यसका लागि तालिकाको शीर्ष ५ भित्र पर्नुपर्ने छ। टी–२० विश्वकप छनोटको तयारीका लागि नेपालले टी–२० अभ्यास खेलसहित वेस्टइन्डिजसँगको ऐतिहासिक शृंखला खेल्दै शानदार प्रदर्शन गरेर विश्वकप छनोटमा पनि त्यही लय निरन्तरता दिएर विश्वकपमा छनोट भएको नेपाल एकदिवसीय विश्वकप लिग २ मा भने कमजोर देखिएको छ ।
नेपालको ब्याटिङ नै मुख्य कमजोरीको रूपमा देखियो, जुन् ब्याटिङ यसअघिको शृंखलामा परिपक्क भनेर बुझिएको थियो । नेपालको मध्यक्रममा बलियो प्रदर्शन हुन नसक्दा पहिलो खेलमा १०६ रनको फराकिलो हार बेहोरेको थियो ।
दोस्रो खेलमा नेपालले मध्यम योगफल खडा गरेको भएपनि कप्तान रोहित पौडेलको शतकबाहेक अन्यको प्रदर्शन राम्रो हुन सकेन । यूएईले २३४ रनको लक्ष्य आरामले पूरा ग¥यो । त्यस्तै नेपालको बलिङ पनि कमजोर देखिएको छ ।
यसअघिकै समस्याका रूपमा रहँदै आएको डेथ बलिङले नेपाललाई बारम्बार सताउँदै आएको छ । तेस्रो खेलमा नेपालले अन्तिम १० ओभरमा ७१ रन डिफेन्ड गर्न सकेको थिएन । त्यसअघि पनि नेपालले अमेरिकाको मध्यक्रममा बनेको साझेदारी तोड्न सकेको थिएन ।
फलस्वरुप अमेरिकाले १ ओभर अगावै २७३ रनको लक्ष्य पूरा गरेको थियो । पहिलो खेलमा पनि नेपालले अमेरिकाविरुद्ध अन्तिम १० ओभरमा ९१ रन बेहोरेको थियो र जम्मा १ विकेट मात्र निकालेको थियो । त्यही खेलमा नेपालको नेपालको ब्याटिङ पनि ‘कोल्याप्स’ हुँदा फराकिलो हार बेहो¥यो ।
शृंखलामा एक शतक हानेका कप्तान रोहित पौडेलले खेलमा ब्याटिङको फिनिसिङ राम्रो हुन नसक्दा हार बेहोरेको बताएका छन् । उनले अन्तिम खेलमा जित निकाल्दै २ अंक जोड्ने लक्ष्य रहने बताएका छन् ।
लिग २ तालिकामा १९ खेलमा १२ अंक जोडेर सातौं स्थानमा रहेको नेपालले सबै ४ खेल जितेमा पनि अंकतालिकामा १९ अंक रहेको नामिबियालाई पछि पारेर सातौंबाट छैटौंमा उक्लन सक्ने थियो। तर नामिबियालाई उछिन्न पनि नेपालले अब कम्तीमा अर्को शृंखला कुर्नुपर्ने भइसकेको छ ।
लगातार तीन हारपछि अब नेपाल यूएईबाट सान्त्वना जितका साथ २ अंक लिएर फर्किने उद्देश्यमा हुनेछ । त्यसो हुँदा लिग २ को तालिकामा नेपालको २० खेलमा १४ अंक हुनेछ र सातौंमा यथावत् रहनेछ ।
अन्तिम खेलमा जित निकालेमा अंकतालिकामा कुनै हलचल नल्याएपनि नेपालका लागि सान्त्वना जितका रूपमा रहनेछ र लिग २ को यस शृंखलामा सुखद अन्त्य हुनेछ ।
