एजेन्सी,असोज २१
बंगबन्धु गोल्ड कपको साविक विजेता नेपाल यसपटक समूह चरणबाटै बाहिरिएको छ । बंगलादेशमा जारी प्रतियोगितामा नेपाल लगातार दुई खेलमा पराजित हुँदै बाहिरिएको हो ।
शनिबार प्यालेस्टाइनसँग १–० को पराजित भएसँगै नेपालको यात्रा अन्त्य भएको हो । पहिलो खेलमा ताजकिस्तानसँग २–० ले पराजित भएको नेपालको यात्रा टुङ्ग्याउन खालेद सलेमले ७० औं मिनेटमा गरेको गोल नै खेलको निर्णायक बन्यो । क्रसमा आएको बलमा हेडमार्फत सलेम गोल गरेका थिए ।
यो सँगै प्यालेस्टाइन लगातार दुई खेल जित्दै समूहको विजेता र ताजकिस्तान उपविजेताका रुपमा अन्तिम चारमा प्रवेश गरेका छन् ।पहिलो खेलमा नेपाल ताजकिस्तानसँग २–० ले पराजित भएको थियो । ताजकिस्तान अर्को खेलमा प्यालेस्टाइनसँग २–० ले नै पराजित भएको थियो ।
सन् २०१६ को बंगबन्धु गोल्ड कप जितेको नेपालले यसपटक अन्तिम समयमा मात्र सहभागिता निश्चित गरेको थियो । विजेता बनेपछि प्राप्त हुनुपर्ने ५० हजार अमेरिकी डलर मध्येको आधा बंगललादेश फुटबल संघले केहि दिन अघि मात्र पठाएपछि नेपालको सहभागिता निश्चित भएको थियो ।
