– गत बिहीबार विराटनगर मेनरोडमा सञ्चालित ग्यालेक्सी मार्ट र साकेत ट्रेडर्सले खरिद गरेको मुल्यको नौ गुणासम्म बढी मुल्य राखेर कालोबजारी गरेको भेटियो । जिल्ला प्रशासन कार्यालय मोरङले गरेको अनुगमनका क्रममा यस्तो कालोबजारी गरेको देखेपछि सात दिन भित्र उपस्थित हुन पत्र काटियो । बिहीबार नै गोल्छा डेरी उद्योगका उत्पादनमा मिसावटको आशंका गर्दै समितिले उत्पादन र बिक्री रोक लगायो ।
– गत शुक्रबार अनुगमनका क्रममा न्यु चाईना बजारले पनि २२० रुपैँया पर्ने कपडालाई २०० प्रतिशत मुनाफा राखेर बिक्री गरेको पाईएपछि सात दिनभित्र जिल्ला प्रशासन कार्यालयमा उपस्थित हुन निर्देशन दिईयो ।
माथीका कालोबजारीका घटना स्थानीय प्रशासनले अनुगमनका क्रममा भेटिएको हो । दशैँको मुखमा रेडिमेड कपडादेखि जुत्ता–चप्पल, खाद्यान्न चिनी लगायत दैनिक उपभोग्य वस्तुमा कालोबजारी छ ।
तर जनताको मत पाएका जनप्रतिनिधि भने कालोबजारीको मौन समर्थनमा बसेका छन् । अनुगमनको जिम्मेवारी पाएका जनप्रतिनिधिले चाडबाडमा हुने कालोबजारी नियन्त्रण गर्न खासै चासो देखाएका छैनन् । उपभोक्ता हित संरक्षण ऐन २०७५, स्थानीय सरकार सञ्चालन ऐन २०७४ र गाउँपालिका , नगरपालिकाबाट गरिने बजार अनुगमन निर्देशिका २०७४ ले स्थानीय सरकारलाई अनुगमनको जिम्मवारी दिएको छ ।
तर दुई ऐनका साथै एउटा निर्देशिकाले अनुगमनको अधिकार दिएपनि जनप्रतिनिधीले अनुगमनको चासो दिएका छैनन् । कालोबजारी मौलाएको बेला अनुगमन समिती गठन समेत भएको छैन ।
विराटनगर बजारमा ४७५ रुपैँया मुल्य पर्ने सामाग्रीको ९ गुण मुल्यवृद्धि गरी कालोबजारी भएपनि जनप्रतिनिधिले अनुगमनमा खासै चासो देखाएका छैनन् ।,यो समाचार आजको उद्घोष दैनिकमा छापिएको छ ।
