विराटनगर, असोज ३१
नेपालीहरुको महान चाड बडादशैं अर्थात नवरात्रको आठौंदिन आज महाअष्टमी । महाअष्टमीको मध्यरातमा बलीसहित कालरात्रीको पुजा गर्ने चलन छ । महाअष्टमीका दिन दशैघर र कोतलगायत मुलुकका विभिन्न शक्तिपीठमा बलिसहित पूजाअर्चना तथा दुर्गा सप्तशती पाठ गर्ने गरिन्छ ।
यसदिन घटस्थापना गरिएको स्थानमा विशेष पूजा आजा गर्ने परम्परा छ । यसदिन घर तथा कलकारखानामा रहेका हतियारलाई धोइपखाली महादेवी दुर्गाको हतियारको रुपमा स्थापना गरी पूजा गर्ने गरिन्छ ।
महाअष्टमीको मध्यरातमा बलिसहित कालरात्रीको पूजा गर्ने चलन छ । पशुबली नचढाउनेहरुले जमराकोठामा घिरौंला, कुभिन्डो, मूला, नरिवल आदिको बली दिएर दुर्गाभवानीलाई खीर चढाउने गर्दछन् ।
मध्यरातको यस्तो पूजाबाट प्रसन्न भई देवीले शुभफल र कल्याण दिने विश्वास गरिन्छ । महाअष्टमी पर्वमा मुलुकभर शक्तिका प्रतिक महाकाली महालक्ष्मी महासरस्वती र देवी भगवतीका मन्दिरहरुमा श्रद्धालुहरुको घुईंचो लाग्ने गर्छ । महाअष्टमी पर्वको अवसरमा पुर्वाचलकै प्रसिद्ध शक्तिपिठ मध्यको एक सप्तरीको भारदहस्थित कंकालीनी र छिन्नमस्ता मन्दिरमा बलिदिने भक्तजनहरुको घुईचो लाग्ने गर्दछ ।
