एजेन्सी, कात्तिक ६
विज्ञान र प्रविधिको क्षेत्रमा जति पनि चमत्कार देखिएका छन्, त्यसमा पछिल्लो समय अग्रणी स्थान चीनले नै राख्दै आएको छ । समुद्रमा ५५ किलोमिटर लामो पुल बनाएर चीनले पूरै विश्वलाई चकित बनाएको छ ।
विज्ञान र प्रविधिको विकासले छलाङ मार्दै जाँदा त्यसको सदुपयोग चीनले राम्रैसँग गरेको छ । चीनले समुद्रमा निर्माण गरेको ५५ किलोमिटर पुल अहिले विश्वव्यापी चर्चाको विषय बनेको छ ।
यो पुलको मंगलबार चिनियाँ राष्ट्रपति सी चिनफिङले उद्घाटन गरे । संसारकै सबैभन्दा लामो सामुद्रिक पुल मंगलबारदेखि सन्चालनमा आएको हो । उद्घाटन समारोहमा चीनसँगै मकाउ र हङकङका शीर्ष नेताहरु पनि सहभागी थिए । सर्वसाधारणका लागि भने यो पुल बुधबारबाटमात्रै खुल्ला गरिनेछ । यो पुल निर्माणसँगै अब चीनबाट दक्षिणी सहर झुहाई, हङकङ, र मकाउसम्म सीधै यात्रा गर्न सकिनेछ ।
पुलको कुल लम्बाइमध्ये ३० किलोमिटर समुद्रको माथि पर्छ । बाँकी भाग समुद्रको मुनि पर्दछ । यो पुलको बीचभाग ६.७ किलोमिटर गहिरो छ । पुलको मार्गमा दुई ठाउँमा कृत्रिम ‘आइल्यान्ड’ बनाइएको छ । पानीजहाजलाई ओहोरदोहोर गर्न सजिलो होस् भनेर समुद्रमुनिबाट पुललाई लगिएको हो । सामुद्रिक आँधी र ८ म्याग्निच्यूडसम्मको भूकम्पले यसलाई कुनै क्षति पुर्याउनसक्ने छैन ।
यो पुलमा चार लाख टन स्टील प्रयोग गरिएको छ । जुन ६० ओटा ‘आइफल टावर’ बनाउन पुग्ने बराबरको छ । पुल बनाउनेक्रममा १८ जना कामदारको ज्यानसमेत गएको थियो भने सयौं मजुदर घाइते भएका थिए । यसको निर्माणमा २० बिलियन अमेरिकी डलर अर्थात नेपाली दुई खर्ब रुपैयाँभन्दा बढी खर्च भएको छ । पुल निर्माण सम्पन्न गर्न ९ वर्षको समय लागेको थियो ।
यो पुल बनेसँगै चीनबाट हङकङ, र मकाउसम्मको यात्रा निकै छोटिएको छ । यसअघि, चीनबाट हङकङ र मकाउ जान चार घन्टा लाग्ने गरेकामा अब भने ३० मिनेटमै गन्तव्यसम्म पुग्न सकिनेछ । यो पुलबाट दैनिक ९ हजार २०० सवारी–साधन आवत–जावत गर्नसक्नेछन् । यसमा रेलमार्ग भने बनाइएको छैन । यो पुल सन्चालनमा आएपपछि चीनलाई वर्षेनि ८६ मिलियन अमेरिकी डलर आम्दानी हुने अनुमान गरिएको छ ।
